Olar Ázerbaıjan men Qazaqstannyń saıası sahnasyna baýyrlas túrki halqynyń eń mańyzdy jáne asa qıyn kezeńinde kóterildi. Memleket basshylary óz elderin geosaıası aýyrtpalyqtarǵa qaramastan bilgirlikpen basqarý arqyly kezdesken qıyndyqtardan alyp shyqty. Alǵa qoıǵan maqsat-múddelerin ulttyq damý tujyrymdamalary negizinde tabysty júzege asyrdy.
Eger toqsanynshy jyldardyń basyndaǵy saıası úderisterge nazar salatyn bolsaq, bizdiń kóz aldymyzǵa Ázerbaıjannyń ulttyq jáne memlekettik táýelsizdigi jolyndaǵy kúresi keledi. Jalpyulttyq kóshbasshy Geıdar Álıevtiń saıası erik-jigeriniń jáne el basqarýdaǵy mol tájirıbesiniń nátıjesinde Ázerbaıjan óz egemendigin qalyptastyrdy, ýaqyt óte ekonomıkalyq damý jolyna tústi. Dál osyndaı asa qıyn saıası mıssııany Qazaqstan Prezıdenti Nursultan Nazarbaev ta múltiksiz oryndap shyqty. Elin órkenıetti memleketterdiń qataryna qosý úshin qajetti barlyq máselelerdiń jolyn izdestirdi.
О́z Otanyn, óz elin saıası jáne ekonomıkalyq aýyr kezeńde basqarýdy qolǵa alǵan ol halyq aldyndaǵy jaýapkershilikti sezine otyryp, tyǵyryqtan shyǵýdyń eń tıimdi jolyn qarastyrdy. Kóp keshikpeı ony tapty da. Sanaýly jyldar ishinde Qazaqstan basshysy Qazaqstandy qarqyndy damytý arqyly kópshilik seniminen shyqty, el súıispenshiligine bólendi. О́z eliniń múddesin álemdik deńgeıde qorǵaý arqyly bedeldi kóshbasshy ekenin is júzinde dáleldedi. Qazaqstandy, qazaq halqyn halyqaralyq qoǵamdastyq N.Á.Nazarbaev arqyly tanydy.
Nursultan Nazarbaevtyń álemdik deńgeıdegi iri saıasatker, erekshe tulǵa ekendigi onyń kóp etnosty Qazaqstanda etnosaralyq jáne konfessııaaralyq yntymaq pen syılastyqty, bereke men birlikti nyq ornyqtyra bilgendigimen de erekshelenedi. Búginde álemdik qoǵamdastyqqa biregeı ınstıtýt retinde tanylǵan Qazaqstan halqy Assambleıasynyń alatyn orny bólek. О́ıtkeni osy biregeı qurylym Qazaqstanda saıası ekonomıkalyq damýǵa arqaý bolyp otyrǵanyn biz jaqsy bilemiz, qyzyǵa qaraıtynymyzdy jasyrmaımyz.
Qazaq elinde ekonomıkalyq reformalar tabysty júzege asyryldy. Memlekettiń sheteldermen túrli salalar boıynsha qatynastar jasaýyna negizdelgen qajetti zańnamalar qabyldandy.О́z otandastaryn tarıhı otanyna oralýǵa shaqyrǵan, olarǵa jaǵdaılar jasaǵan dúnıe júzinde sanaýly ǵana elder bar. Solardyń biri – túrkitildes ári baýyrlas qazaq halqy jáne onyń Tuńǵysh Prezıdenti N.Á.Nazarbaev ekenin bizder, ázerbaıjandar maqtan etemiz. El basshysynyń bastamasymen iske asyrylǵan «Nurly kósh» memlekettik baǵdarlamasy soǵan naqty dálel bolady.
Erekshe dara tulǵa, iri de bedeldi saıasatker N.Á.Nazarbaevty búginde álem jurtshylyǵy jaqsy biledi jáne jan-jaqty tanıdy. Onyń basshylyǵymen Qazaqstan bolashaqta bıik belesterdi baǵyndyratynyna, álemde eń damyǵan memleketterdiń qatarynan oryn alatynyna senimimiz mol. Ázerbaıjan men Qazaqstannyń baǵyndyratyn belesteri, qol jetkizetin jetistikteri mol bolǵaı dep tileımiz.
Álı GASANOV,
Ázerbaıjan Respýblıkasy Prezıdentiniń qoǵamdyq-saıası máseleler jónindegi kómekshisi
