Konferensııany Bilim jáne ǵylym mınıstrliginiń Ǵylym komıtetine qarasty Zoologııa ınstıtýty men «Qansonar» respýblıkalyq ańshylyq sharýashylyǵy qaýymdastyǵy birlesip uıymdastyrdy.
Konferensııada alǵashqy sózdi alǵan «Qansonar» qaýymdastyǵynyń tóraǵasy Oralbaı Ábdikárimov bul sharaǵa ulttyq muraǵa beıjaı qaraı almaıtyn qonaqtardyń qatysyp otyrǵanyn aıtty.
«Qusbegi eshqashan tiri tabıǵatty aıaqqa taptamaıdy. Bardyń qadirin bilip, qusy arqyly tabıǵattyń jan dúnıesin tanıdy. Bul tabıǵat baılyǵyna ukypty qaraýǵa tárbıeleıdi. Biz múmkindigimizshe osy baǵytta birshama jumys atqarýǵa tyrysyp kelemiz. Aımaqtarda jyrtqysh qustardy tirkep, sanaýdan bólek, qazaq dástúrine saı, ulttyq ańshylyq oıyndaryn ótkizýdemiz», dedi O.Ábdikárimov. Aıtýynsha, mundaı sharalar ańshylyq túrlerine qoǵam qyzyǵýshylyǵyn arttyryp, búrkitshilerdiń dástúrleri men mektebin saqtap qalýǵa úles qosady.
Konferensııa barysynda qatysýshylar Qazaqstan aýmaǵyndaǵy qusbegilik týraly sóz qozǵap, búgingi jaı-kúıin talqylady. Qazaqstan, Qyrǵyzstan, Túrikmenstan, Reseı, Mońǵolııa men Qytaıdaǵy qusbegilik jaıynda tarıhı derektermen bólisti.
«Qansonar» qaýymdastyǵynyń bas dırektory Aleksandr Berber táýelsizdiktiń alǵashqy jyldary Qazaqstanda búrkitshilerdiń sany saýsaqpen sanarlyq bolǵanyn, al qyran baptaýshylardyń múlde bolmaǵanyn tilge tıek etti.
Qazirgi el aýmaǵynda 105 búrkit pen 17 suńqar salyp otyrǵan 102 adam bar. Olardyń sany jyl ótken saıyn arta túsýde. Esesine, qartaıyp nemese qaıtpaı qalyp jatqan qustardyń ornyn toltyrýǵa degen talap ta artyp keledi. Qazaqstandaǵy qusbegiler mektebin damytýǵa arnaıy kvota qarastyrylmaǵan. Mektep basshylyǵyna jyl saıyn tabıǵat aıasynan birneshe qusty alyp úıretýlerine týra kelip tur.
Osyǵan qaramastan Almaty, Qaraǵandy, Shymkent qalalaryndaǵy «Aq Suńqar», «Mılenıým sokol», «Heaven Star» tálimbaqtarynda kommersııalyq baǵytta qus ósirip, ony sátti túrde júzege asyryp otyr. Bul salada kórshi qyrǵyz elindegideı azamattarǵa arnaıy sertıfıkat pen ańshy-búrkitshi kýálikterin berý jetispeı otyr. Bizdiń usynysymyzdy eskere otyryp, quqyqtyq-normatıvtik bazanyń nyǵaıýy dástúrli qusbegilikti odan ári damytyp, bolashaq urpaq úshin saqtap qalýǵa jol ashar edi dedi A.Berber.
Konferensııanyń aıasynda joıylýdyń az aldynda turǵan ıtelgini saqtap qalý máseleleri talqylandy.
Saparbaı PARMANQUL,
«Egemen Qazaqstan»
ALMATY
