Búgin Astana qalasynyń prokýratýrasynda «Jasóspirimder arasyndaǵy qylmystyń aldyn alýyn jańartý» áleýmettik jobasynyń alǵashqy kezeńiniń qorytyndylary shyǵaryldy.
Atalmysh jobany qala prokýratýrasy Astana ákimdigimen, IID-men, QR Bas prokýratýrasy janyndaǵy quqyq qorǵaý organdarynyń akademııasymen birlesip aǵymdaǵy jyldyń tamyz aıynan júzege asyra bastaǵan. Ol jasóspirimder arasyndaǵy qylmystylyqtyń teris úrdisin toqtatýǵa, óskeleń urpaqtyń tolymdy damýyna, olardyń tulǵa bolyp qalyptasýyna yqpal etýge baǵyttalǵan.
Jobaǵa sáıkes quqyqbuzýshylyqtardyń aldyn alý isine jasóspirimderdiń ózderi aralasady. Dálirek aıtqanda, engizilgen «Bıoınformatıka jáne Sınergetıka» tehnologııasynyń arqasynda balalar tártiptiń sheginen shyqpaı, eresekterdiń kómegi arqyly qoıylǵan maqsattarǵa qol jetkizý múmkindigin aldy.
Astana qalasy prokýrorynyń aǵa kómekshisi Dana Mulaqovanyń málimetinshe, «Jasóspirimder arasyndaǵy qylmystyń aldyn alýyn jańartý» áleýmettik jobasy 50 myńnan astam jas azamatty qamtyǵan.
«2016 jyldyń 11 aıynyń qorytyndylaryna sáıkes, ıývenaldy polısııanyń esebeinde 287 kámeletke tolmaǵan azamat tursa, bıyl bul kórsetkish 213-ke deıin tómendegen. Naqtyraq aıtqanda, kórsetkish 25 paıyzǵa tómendep otyr», - dedi qala prokýrorynyń aǵa kómekshisi.
Aıta keteıik, «Jasóspirimder arasyndaǵy qylmystyń aldyn alýyn jańartý» áleýmettik jobasy 2018 jyldyń sońyna deıin júzege asyrylatyn bolady.
