Osydan bir aı buryn Evgenıı Koreshkov shákirtteri QHL-diń 10 kúndik úzilisine deıingi sońǵy oıynyn Máskeýdiń SSKA klýbyna qarsy ótkizip, 5:3 esebimen jeńiske jetken edi. Bul oıynda «Barys» tek jeńiske jetip qana qoımaı, maýsym aralyq úziliske «Shyǵys» konferensııasynda birinshi orynmen shyqqan-dy. Úzilisten keıin elorda ujymy ne qyrsyq shalǵany belgisiz, sońǵy oıyndarda jeńilisten kóz ashpaı keledi.
Dál qazirgi ýaqytta «Barys» komandasy «Shyǵys» konferensııasynda 60 upaımen segizinshi orynda tur. Al toǵyzynshy satydaǵy «Amýr» bizdiń klýbtan úsh upaı artta. Degenmen, Habarovtyń komandasy «Barystan» eki oıyn kem ótkizgendigin eskersek, otandastarymyz áli de tómenge syrǵıtyny anyq. Eger «Barys» úzdik segizdikten túsip qalatyn bolsa, onda olar úshin maýsym aıaqtaldy deı berýge bolatyn shyǵar.
11 oıynda «Barys» komandasy óz qaqpasyna 42 shaıba ótkizip alsa, qarsylastarǵa 14 golmen jaýap bergen. Bul aralyqtaǵy tórt oıynda Astana ujymy shaıba soǵýdy múldem umytyp qalǵan sııaqty. Eń ókinishtisi, syrt alańda SKA komandasymen kezdesý ótkizip, 9:1 esebimen ońbaı utyldy. Bul «Barystyń» KHL tarıhyndaǵy ekinshi eń iri jeńilisi edi. Bir jyl buryn dál osy SKA klýby «Barys» qaqpasyna jaýapsyz toǵyz shaıba toǵytqanyn jankúıerler áli umyta qoıǵan joq shyǵar.
Joǵaryda «Barystyń» jeńiliske toly serııasy shaǵyn úzilisten keıin bastalǵanyn aıtyp qaldyq qoı. Sol aralyqta Eýrotýrdyń birinshi kezeńi ótken bolatyn. Bul synǵa «Barys» sapynan tek Lınden Veı ǵana qatysqan. Qalǵan hokkeıshilerdiń barlyǵy Astanada qalyp, jattyǵý jumystaryn jalǵastyrǵan-dy. Aralyq úzilis kezinde ulttyq qurama oıynyna ketken Veıdiń joqtyǵy «Barystyń» daıyndyǵyna keri áserin tıgizdi de aıta almaımyz. Barlyq másele bir oıynshyǵa tireletin bolsa, maýsym basynda kapıtansyz oınaǵan «Barystyń» áldeqashan saly sýǵa ketýshi edi. Jyl basynda «Barys» Doýssyz-aq táp-táýir oıyn kórsetkeni jankúıerlerdiń esinde.
Sondaı-aq, dál qazirgi ýaqytta komanda sapynda jaraqat alyp, emdelip jatqan eshbir oıynshy joq. Úzdik hokkeıshilerdiń barlyǵy da muzaıdynǵa shyǵyp júr. Sonda da «Barys» óz oıynyn taba almaı áýre. Demek, jeńilistiń sebebi ishki máselede bolyp tur.
Mamandardyń aıtýynsha, komandadan Brendon Bochenskı men Dastın Boıd ketken soń, «Barystyń» oıyny álsirep, shaıba soǵý azaıǵan. Ras, «Barysqa» qazir Bochenskı men Boıd sekildi komandany alǵa súıreıtin oıynshy jetispeıdi. Leı men Doýs bar ǵoı dep ýáj aıtýyńyz múmkin, biraq tómengi ekeýin joǵarydaǵy eki oıynshymen salystyrýǵa múldem kelmeıdi. Kelesi maýsymda «Barys» komandany alǵa súıreıtin hokkeıshi almasa, bıylǵy kúıdi kelesi jyly da keshetini anyq. Aıtpaqshy, gol soǵýdan bir-birimen jarysyp, aldaryna jan salmaı júrgen Leı men Doýs juby ótken 11 oıynda alty-aq shaıba soqqan.
«Astana» prezıdenttik klýby qamqorshylar keńesiniń eks-tóraǵasy, qazirgi Parlament Senatynyń depýtaty Darhan Qaletaev elimizdiń basylymdarynyń birine bergen bir suhbatynda «Prezıdenttik klýbtyń 40 paıyz bıýdjeti «Barys» hokkeı klýbyna bólinedi. 30 paıyzy «Astana» fýtbol klýbyna, 25 paıyz velo klýbqa bólingen. Al qalǵan bes paıyz ózge komandalarǵa úlestiriledi», degen bolatyn.
Jalpy, kez kelgen nárseniń parqy salystyrǵanda bilinedi ǵoı. «Astana» Prezıdenttik klýbynyń bólgen qarjysyn Qazaqstannyń ımıdjin halyqaralyq arenada kóterip, fýtboldan Eýropa lıgasynyń pleı-off kezeńine shyqqan «Astana» fýtbol aqtap júr me, álde on jyldan beri QHL-diń fınalyna shyǵa almaı, qarjyny aýaǵa shashyp júrgen «Barys» hokkeı klýby aqtap júr me?
«Barys» Qurlyqtyq hokkeı lıgasy aıasyndaǵy kelesi kezdesýin 18 jeltoqsan kúni Bratıslavada «Batys» konferensııasynda sońǵy oryndardyń birinde kele jatqan jergilikti «Slovan» komandasymen synǵa túsedi. Budan bólek, «Barys» jyl sońyna deıin taǵy bes oıyn ótkizedi. Osy matchtarda jeńiske jete almaıtyn bolsa, lıganyń pleı-off kezeńinen tys qaldy deı berýge ábden bolady. Byltyrǵy maýsymda «Barys» jartylaı fınalǵa deıin jetken-di.
Álı BITО́RE,
«Egemen Qazaqstan»
