Elimizdiń Varshavadaǵy elshiligi uıymdastyrǵan saltanatty qabyldaýǵa Parlament depýtattary, prezıdent ákimshiliginiń ókilderi men kásipkerler jınaldy. Polshadaǵy Qazaqstan elshisi Marǵulan Baımuhan óz sózinde elimizdiń shırek ǵasyrdaǵy jetistigin jipke tizip baıandap berdi. О́z kezeginde polshalyq saıasatkerler Qazaqstannyń halyqaralyq arenadaǵy ornyn aıshyqtap, ekijaqty seriktestiktiń joǵary deńgeıge jetkenin atap ótti. Osy jyly prezıdent Andreı Dýda memlekettik saparmen Qazaqstanǵa kelse, bir jyl buryn Elbasy Nursultan Nazarbaev Polshaǵa barǵan edi. Eýropalyq memleketterdiń halyqaralyq EXPO kórmesine de belsendi qatysqanyn bilemiz. Osylaısha saltanatty qabyldaýdyń qonaqtary qazaq halqyna tilekterin arnady.
– Men Qazaqstandy Táýelsizdik kúnimen quttyqtap, jyly lebiz bildirgim keledi. Sondaı-aq ózara seriktestigimiz kezeńimen damyp kele jatqanyn aıta keteıin. Ekonomıkalyq seriktestikte serpilis bar. Eki jaqqa da tıimdi joǵary deńgeıdegi issaparlar da boldy, – dedi Polsha premer-mınıstri keńsesiniń jaýapty hatshysy Anna Marııa Anders.
– Osy jyly eki el arasyndaǵy taýar aınalymy mıllıard eýrodan asyp túskeli tur. Eń qyzyǵy, qazaqstandyq eksport 70 paıyzǵa, Polsha eksporty 60 paıyzǵa artqan. Muny saıası, ekonomıkalyq seriktestiktiń jetistigi deýge bolady. Sondaı-aq tikeleı reısterdiń ashylýy, bizdiń tarapymyzdan vızalardy joıý Polsha azamattarynyń Qazaqstanǵa, Astanaǵa týrıstik aǵynyn ulǵaıtýǵa jol ashady, – dedi Qazaqstannyń Polshadaǵy Tótenshe jáne ókiletti elshisi Marǵulan Baımuhan.
