«Daýys berý barysynda 51 adam qoldaǵan bolsa, 48-i qarsy shyqty. Salyqty qysqartý týraly zań qabyldandy», – dedi AQSh vıse-prezıdenti Maık Pens.
Daýys berý nátıjesi shyqqanǵa deıin senat ǵımaratynda narazylyq aksııasy ótti. Saldarynan kúzetshiler qatysýshylardy syrtqa shyǵarýǵa májbúr boldy.
Senattaǵy demokrattardyń kóshbasshysy Chak Shýmer repýblıkalyqtardyń mundaı qolaısyz zań úshin kelesi jyly saılaýda jaýap beretinin eskertti. «Zańnyń túpki máni men saýalnamasy sondaı nashar, tipti keler jyly respýblıkalyqtardyń ózderi daýys berip, qoldaǵandary úshin uıalatyn bolady», – dedi Shýmer.
Osyǵan deıin Respýblıkalyq partııanyń 12 múshesi men ókilder palatasyndaǵy demokrattardyń bári zań jobasyn qoldamaǵan bolatyn. Alaıda daýys berý nátıjesinde 227 adam qoldap, 203-i qarsy shyqty. «Búgin biz el turǵyndaryna óz aqshasyn qaıtaryp beremiz. Túptiń túbinde bul olardyń mańdaı terimen tapqan adal aqshasy», – deıdi respýblıkalyq Pol Raıan.
Sársenbi kúni, ıaǵnı 20 jeltoqsanda qujattar túpkilikti maquldaý úshin ókilder palatasyna jiberildi. Eger zań jobasy qoldanysqa ener bolsa, Donald Tramptyń alǵashqy iri jeńisi bolmaq.
Aıta keteıik, qujatta korporatıvtik salyqty 35 paıyzdan 20 paıyzǵa deıin shekteýsiz tómendetý qarastyrylǵan. Bolashaqta amerıkalyq kompanııalardyń sheteldik kiris kózi tolyqtaı salyqtan bosatylmaq. Sondaı-aq, túrli deńgeıdegi kiris kózi bar amerıkalyqtardyń basym bóligine 2026 jylǵa deıin salyq jeńildikteri qarastyrylǵan.
Zań jobasyna qarsy shyqqandardyń keıbiri Obamacare baǵdarlamasy arqyly salyq tóleýshilerdiń kóbi mindetti saqtandyrý qujatynan bosatylatynyn alǵa tartty.
AQSh kongresi bıýdjet basqarmasynyń esepteýinshe bul shara saqtandyrý syılyqaqylarynyń artýyna ákeledi. Sonymen qatar 13 mln adamdy 2027 jylǵa qaraı saqtandyrý qujatynsyz qaldyrady.
Daıyndaǵan Aıan ÁBDÝÁLI, «Egemen Qazaqstan»
