Shetel basshylary quttyqtady

Nursultan Nazarbaevtyń atyna Qazaqstan Respýb­lı­ka­sy­nyń Táýelsizdik kúnine oraı shet memleketterdiń basshylary­­nan quttyqtaý jedelhattary kelip tústi.

Reseı Federasııasynyń Pre­zıdenti Vladımır Pýtın óziniń quttyqtaý jedelhatynda: «Qazaqstan álemdik arenada jo­ǵary bedelge ıe bolyp, halyqaralyq ózekti máselelerdi sheshýge, ásirese BUU Qaýipsizdik Keńesiniń turaqty emes múshesi retinde, sondaı-aq Astana prosesi aıasynda eleýli úles qosyp keledi», dep atap ótken.

Qytaı Halyq Respýb­lı­ka­synyń Tóraǵasy Sı Szınpın óziniń quttyqtaý jedelhatynda: «Sizdiń elińiz Táýelsizdigin jarııalaǵannan keıingi 26 jyl ishinde saıası turaqtylyqty qamtamasyz etýde, ekonomıkany damytýda, halyqtyń ómirin jaqsartýda jáne memlekettiń halyqaralyq bedelin kóterýde zor jetistikke jetti. Sondaı-aq memleket qurý isinde de aıtarlyqtaı tabysqa keneldi», dep atap kórsetken.

Túrkııa Prezıdenti Rejep Taııp Erdoǵan quttyqtaý hatyn­da Qazaqstannyń túrki álemi­niń jarqyn ókili retindegi jetis­ti­k­terin joǵary baǵalap, elimizdiń keler jylǵy BUU Qaýipsizdik Keńesindegi tóraǵalyq qyzmetine tabys tiledi.

Amerıka Qurama Shtat­tarynyń Prezıdenti Donald Tramp quttyqtaý hatynda: «Qa­zaqstan Táýelsizdik alǵannan bergi 26 jyl boıy Amerıka Qu­ra­ma Shtattary elderińizdiń egemen­digin, táýelsizdigin jáne aý­maq­tyq tutastyǵyn moıyndap keledi. Qazaqstan Respýblı­ka­synyń BUU Qaýipsizdik Keńesindegi aldaǵy tóraǵalyǵy men energetıka salasyndaǵy yntymaqtastyq arqyly eki el arasyndaǵy ekonomıkalyq baılanystar nyǵaıa túsedi dep oılaımyz», dep atap ótken.

О́zbekstan Respýblıkasynyń Prezıdenti Shavkat Mırzııoev Qazaqstannyń halyqaralyq bedeliniń nyǵaıýyna septigin tıgizgen elimizdiń jahandyq jáne óńirlik bastamalaryna joǵary baǵa berip, eki memleket arasyndaǵy tatý kórshilik yntymaqtastyqtyń odan ári damı beretinine senim bildirdi.
Polsha Respýblıkasynyń Prezıdenti Andjeı Dýda Memleket basshysynyń atyna joldaǵan quttyqtaý hatyn­da «Astana EKSPO-2017» halyqaralyq mamandandyryl­ǵan kórme­siniń joǵary deńgeıde ótkizil­genin atap ótip, Polsha­nyń oǵan belsendi qatysýy saýda jáne ınvestısııa salalaryndaǵy baılanystarymyzdyń jandana túsýine jáne Qazaqstandaǵy seriktester úshin usynylǵan ın­novasııalyq jáne básekeli sheshimderdi paıdalanýǵa múmkindik beretinin aıtty.

Fransııa Prezıdenti Ema­nýel Makron quttyqtaýynda: «Birneshe aptadan keıin Sizdiń elińiz­diń BUU Qaýipsizdik Keńesin­degi tóraǵalyǵy bastala­dy. Fransııa Sizder qoıyp otyr­ǵan kún tártibindegi máselelerge erekshe nazar aýdaryp, ony talqylaýǵa belsendi túrde qatysady», dep atap ótken.

Sondaı-aq Memleket basshysy men Qazaqstan halqyn Belgııa Koroli Fılıpp, Is­pa­nııa Koroli VI Felıpe, Saýd Ara­bııasynyń Koroli Salman ben Ábdel Ázız Ál Saýd, Ven­grııa Prezıdenti Iаnosh Ader, Ún­distan Prezıdenti Ram Nath Kovınd, Birikken Arab Ámir­lik­teri Prezıdenti Halıfa ben Zaıd Ál Nahaıan, Pákistan Pre­zı­denti Mamnýn Hýseın, Slova­kııa Respýblıkasynyń Pre­zı­den­ti Andreı Kıska, Ýkraına Pre­zıdenti Petr Poroshenko, Horvatııa Prezıdenti Kolında Grabar-Kıtarovıch, Saýd Ara­bııasy Koroldiginiń taq mu­rageri, Mınıstrler keńesi tór­aǵasynyń orynbasary, Qorǵanys mınıstri Muhammed ben Salman ben Ábdel Ázız Ál Saýd, Birikken Arab Ámirlikteriniń Vıse-prezıdenti, Premer-mınıstri, Dýbaı ámirliginiń bıleýshisi, sheıh Muhammed ben Rashıd Ál Maktým, Birikken Arab Ámirlikteri Qarýly Kúshteri Joǵarǵy Bas qolbasshysynyń orynbasary sheıh Muhammed ben Zaıd Ál Nahaıan Táýelsizdik kúni merekesimen quttyqtap, baq-bereke tilep, elimizdiń ósip-órkendeýine nıettestik bildirdi.