Jabyq esik jaǵdaıynda ótken kelissózderdiń baspasóz ókilderine arnalǵan jalpy otyrysynda Syrtqy ister mınıstri Qaırat Ábdirahmanov Astana kelissózderiniń kezekti kezeńin qorytyndylady. Onyń aıtýynsha, eki kún ishinde Sırııadaǵy jaǵdaıdy ári qaraı turaqtandyrýǵa jáne aımaqtaǵy gýmanıtarlyq jaǵdaıdy jaqsartýǵa baǵyttalǵan asa mańyzdy ári mazmundy kelissózder ótkizildi.
«Elbasy Nursultan Nazarbaevtyń bastamasymen uıymdastyrylǵan Astana prosesiniń Sırııadaǵy jaǵdaıdy turaqtandyrýǵa qosqan úlesi mol. Sonyń arqasynda Sırııadaǵy jaǵdaı edáýir jaqsaryp, qaıta qalpyna kelý kezeńiniń aldynda tur. Túıini sheshilmesteı kóringen shıelenis kepilger elderdiń kúsh-jigeri men BUU-nyń qoldaýynyń arqasynda tıimdi rettelip keledi. Osy oraıda, múddeli taraptar Astana prosesinde týyndaǵan múmkindikterdi barynsha paıdalana otyryp, qaqtyǵystyń saıası sheshimin tabýǵa kúsh salatynyna senimdimiz. Tatýlyq pen dıalogtyń, ózara kelisimniń nyshany bolyp tabylatyn Astana alańy, osynda qol jetkizilgen ýaǵdalastyqtar Jeneva kelissózderiniń sátti ótýine yqpal jasaıtyny anyq», dedi Q.Ábdirahmanov.
Budan keıin Syrtqy ister mınıstri kepilger memleketter Túrkııa, Iran jáne Reseıdiń birlesken málimdemesimen tanystyrdy. Qujatta Sırııanyń táýelsizdigi men egemendigi, aýmaqtyq tutastyǵyn moıyndaı otyryp, atqarylyp jatqan sharalardyń tıimdiligi aıtylǵan.
Málimdemege súıensek, Sırııadaǵy terrorızmmen kúreste kóptegen jetistikke qol jetkizilgen. Atap aıtqanda, ILIM oısyrata jeńilip, el aýmaǵy olardan birjola tazartyldy. Sonymen qatar ILIM, «Djabhat An-Nýsry» jáne basqa da lańkestik uıymdarmen kúres jalǵasa beretini, olardyń ózge de elder men aýmaqtarǵa qonys aýdarýyna jol bermeýdegi túbegeıli sheshimderi de aıtylǵan. Kepilger úsh el taratqan málimdemede sırııalyq qoǵam ókilderiniń qatysýymen 2018 jylǵy 29-30 qańtarda Sochıde ótetin sırııalyq ulttyq dıalog kongresine daıyndyq máseleleri atalyp ótken.
Sochıdegi kongreske daıyndyq retinde keler jylǵy 19-20 qańtarda úsh kepilger memleket arasynda arnaıy kezdesý ótpek. Ulttyq sırııalyq dıalog kongresi Jenevada ótetin kelissózderge serpin beretinine, sırııaaralyq kelisimge járdemdesetinine senim bildirilgen.
«Sırııadaǵy qarsylas taraptar arasyndaǵy senimdi nyǵaıtý maqsatynda ustalǵandardy azat etý, qaıtys bolǵandardyń denesin berý jáne habar-osharsyz ketkenderdi izdestirý jónindegi jumys toby jóninde ereje qabyldandy. Sonymen qatar aımaqty, IýNESKO-nyń mádenı muralary qataryna engen nysandardy mınadan gýmanıtarlyq jolmen tazalaý týraly ortaq kelisim jasaldy», dedi málimdememen tanystyrǵan Syrtqy ister mınıstri Q.Ábdirahmanov.
Budan bólek, Reseı, Túrkııa jáne Iran tarapy bıyl 4 mamyrda Astana prosesi aıasynda qabyldanǵan Memorandýmnyń qyzmetin jalǵastyrýǵa, oq atýdy toqtatýdy odan ári nyǵaıtý men tórt deeskalasııa aımaǵynyń tıimdi jumys isteýine jaǵdaı jasaýǵa kepil bolyp otyr. Málimdemeniń sońynda Sırııadaǵy jaǵdaıǵa alańdaýshylyq bildirip, Astana prosesin ótkizýge muryndyq bolǵan Prezıdent N.Nazarbaevqa alǵys aıtylyp, kelesi kelissózderdiń keler jylǵy aqpannyń ekinshi jartysynda ótetini habarlanǵan.
Jıynda BUU-nyń Sırııa boıynsha arnaıy ókili Stefan de Mıstýra sóz sóıledi. Onyń aıtýynsha, Astana prosesiniń arqasynda Sırııada senimdi nyǵaıtýǵa baılanysty birqatar sharalar atqarylyp, mınadan tazartý jumystary alǵa jyljydy. Sonymen qatar S.Mıstýra aımaqtyń kez kelgen bóliginde gýmanıtarlyq kómektiń qajettigin atap ótti. Otyrys sońynda Sırııa bıligi men oppozısııa ókilderi de óz pikirlerimen bólisti. Olar Astana prosesiniń tıimdiligine toqtalyp, kelissózderdiń elde tynyshtyq ornatýǵa orasan úles qosyp jatqanyna alǵysyn bildirdi.
Abaı ASANKELDIULY,
«Egemen Qazaqstan»
Sýretti túsirgen
Erlan OMAR,
«Egemen Qazaqstan»
