Qazaq uǵymynda ıt jeti qazynanyń biri sanalady. Esigimizden engen 2018 jyl sonysymen qazaq úshin qasıetti de qymbat qoı dep oılaımyn. Ǵasyrlar boıy ǵaryshty ıgerýge yntyqqan adamzat ókili alǵash ret alys ta aýyr saparǵa tiri jan-janýar ishinen ıtti ushyrýy, múmkin, belgili bir dárejede oılastyrylmaǵan sáıkestik te shyǵar. Biraq – aqıqat. Adamazat balasy sol bir ǵylymı tájirıbeden soń ǵaryshqa ózi attandy. Qazaq ańshysynyń aldynda ıti nemese tazysy júretinin kóz aldaryńyzǵa elestetińizdershi!..
Qazaqstan táýelsizdik jyldary ishinde jańaǵa degen zor qulshynysy men talpynysy arqasynda ǵarysh salasyn ıgerýde álemde oıyp turyp óz ornyn aldy. Álemdik salmaǵy bar Baıqońyr ǵarysh keshenin kórshi Reseı memleketimen birlese ıgerip kelemiz. Osy arada eskeretin bir jaıt – ǵaryshta, ekonomıkada, halyqaralyq qatynasta búgingi tańda sıfrly tehnogııa eń birinshi orynda tur. Qazir osyndaı álemdik eń úzdik tehnologııadan qol úzip qalsaq, odan keıin biz ony ómir baqı qýyp jete almaımyz. Memlekettik «Bolashaq» baǵdarlamasymen shetelden oqyp kelip jatqan jastarymyz bar. «Qazaqstandy jańa tehnologııa men tehnıkalyq ilim jaǵynan kóteremiz» deıdi olar biraýyzdan, sony óz qulaǵymmen estigende qatty qýanyp qalamyn. Elimizge serpin bergen mundaı ǵasyrlyq jańa tehnologııalyq qozǵalysty men óz basym eki qolymdy kóterip qoldaımyn. Qazaq jastarynyń «Baıqońyr» ǵarysh keshenin emin-erkin ıgerip alatynyna meniń senimim mol. Onyń alǵashqy qadamdaryn kórip te júrmin.
Álemdi aýzyna qaratqan Keńes Odaǵy men Amerıka Qurama Shtattary sııaqty alyp memleketter kezinde ǵarysh keńistigin ıgerý úshin orasan zor qarjy, tipti ásirelep aıtsaq, sońǵy tıynyna deıin jumsady. Eýropadaǵy ǵarysh qaýymdastyǵynyń da belgili mólsherde qarajat paıdalanatyny aqıqat. Kórshimiz Qytaıdyń ǵarysh salasyna degen umtylysy men talpynysy ǵaryshtyq jyldamdyqqa teńesip qaldy. Qazaqstanda qymbatqa satyp alǵan ǵaryshtyq tehnologııalyq qurylymdar paıda bola bastaǵan kezde «Erteń Reseı Baıqońyrdan bar tehnıkasyn alyp ketse, ǵarysh kesheniniń bolashaǵy qandaı kúı keshpek? Biz búgin aýyldy kótere almaı otyrmyz, ǵaryshty qalaı kóteremiz?» degen áńgimelerdi de estigenbiz. Qazir zaman ózgerdi. Eń qýanyshtysy, jańa tehnologııanyń elimizdiń bolashaǵy úshin mańyzy zor ekenin qazaq halqy, Qazaqstanda turatyn barsha ult ókilderi túsindi.
Kúni keshe ǵana Máskeýde ótken TMD memleketteri basshylarynyń beıresmı sammıtinde Reseı Federasııasynyń Prezıdenti Vladımır Pýtınniń Elbasymyz – Qazaqstannyń Tuńǵysh Prezıdenti Nursultan Nazarbaevty Qazaqstanda ótetin sıfrly tehnologııany damytý jónindegi joǵary sarapshy mamandardyń basyn qosý týraly bastamasymen tekten-tek quttyqtamasa kerek. Demek, ol júzdesýdiń álemdik mańyzy zor. Mine, Qazaqstannyń búgingi bolmysy osyndaı!
Meniń jyl basyndaǵy aq tilegim – Qazaqstanymyz jańa tehnologııa salasynda tek qana úzdikter qatarynan kórinsin!
