Umyt qaldy deýimiz artyq bolar, degenmen kóp maqtaýlylardyń arasynda erekshelenbeı qalǵany baıqalady. Sebebi, kóp jankúıer bile bermes – jasyl alańnyń syrtynda da qanshama qyrýar sharýa atqarylyp jatyr. «2017 jyldyń eń úzdik fýtbol menedjeri» degen marapatqa ıe bolǵan Saıan Jaqsygeldiuly týraly azdy-kem aıta ótsek artyq bolmas.
Álemdik fýtbol menedjerler men bapkerlerdiń qolynda ekenin ekiniń biri biledi. Jarǵaq qulaǵymyz jastyqqa tımeı tún jarymynda shyrt uıqyny buzyp kóretin álemdik fýtbolda Joze Moýrıno, Antonıo Konte, Karlo Anchelottı sekildi bapkerler bar ekenin jáne olardyń alańdaǵy 11 fýtbolshyny ǵana emes kúlli komandany basqaryp otyratyny aıdan anyq. Keıde bir qolyna radıo basqarǵysh alyp alyp álemdik juldyzdardy oınatyp otyrǵan adamdar ma dep qalarsyń. Eýropada mundaı mamandardy – menedjer deıdi. Sebebi, olar jaı ǵana jattyqtyrýshy deńgeıinen ósip ketkender. Lýkakýdyń qaıda aýysatynyn, Neımardyń qaı tusta oınaıtynyn nemese Messıdiń qaı jerde aıyp dobyn oryndaıtynyn solar sheshedi. Olar jasyl alańnan tys máselelerdi de sheshedi. Gol soqqanǵa arnaıy qalamaqy taǵaıyndap, jaqsy oınap kózge túskendi kótermelep, keýdesinde nalasy bar jankúıerlerdiń de kóńilin taýyp – komanda úshin bárin jasaıdy. Tipti, Ser Aleks jaıly álgi ańyz bar ǵoı. «Manchester Iýnaıted» klýbynda jumys istegisi keletin eden jýýshynyń ózi Alekstiń aldynan ótpeı jumysqa qabyldanbaıtyn delinetin. «Astana» komandasynyń jetistikterine arqaý eki menedjer bar delik. Biri jasyl alańdaǵy fýtbolǵa jaýapty – Stanımır Stoılov bolsa, ekinshisi týra soǵan jeteqabyl eńbegi bar alań syrtynda júretin – Saıan Hamıtjanov.
«Astana» fýtbol klýbynyń prezıdenti bolǵaly beri Saıan Hamıtjanov el fýtbolyna eýropalyq menedjmentti alyp kelgendeı. Aldymen onyń elordaǵa alyp kelgen fýtbolshylary men bapkerlerin saralaıyq. Bapker máselesin sheship, Bolgarııada júrgen Stoılovty shaqyrtty. Eshkimge esimi tanys emes «Botevtiń» bapkerin dúıim jurtqa áıdik etken osy kisi. Áıtpese, týa bitti talantty bapker bolsa Stoılov birden Top birinshilikterde qyzmet eter edi. Stanımırdiń ózi de suqbat bergen kezinde Hamıtjanov sekildi menedjermen tandem qurǵanyn maqtana aıtyp júredi. Sebebi, bapker men basqarýshynyń bastary bir qazanda qaınamasa alǵa qoıǵan sharýańnyń berekesi qashady. Talantty aıaqdopshy bolǵanymen, bapkerdiń oı dápterine enbese ondaılardy komandaǵa qur masyl qylýdyń qajeti ne?!
«Astana» bapkeri unatqan, komandaǵa alǵysy kelgen kóp oıynshyǵa klýbtyń qarjysy jetpegen kezder az emes. Al qarjy jetetin oıynshylardy basshy qalaǵanymen, bapker unatpaı jatady. Osy tusta birkelki tańdaý jasaý barysynda Stanımır men Saıan juby Nemanıa Maksımovıch, Ivan Maevskıı, Patrık Tvýması, Djýnıor Kabananga sekildi saıypqyrandardy aldy. Qazaqstan premer-lıgasynan Ispan La-lıgasyna fýtbolshy aýysty degendi estýińiz bar ma edi? Elordalyq ujymnyń sapynda kózge túsken serb jartylaı qorǵaýshysy qazir «Valensııa» sapynda gol soǵyp júr. Odan bólek Tvýmasıge kóz tigip, Kabanangany satyp alǵysy keletinderdiń qatary kóp. Qazaqstannyń kóp klýbtary sekildi ekinshi sortty syrttandardy jınap almaı, sapaǵa mán beretin klýb osy kúni jergilikti qazaqstandyq fýtbolshylardyń da ósýine jol ashty. Osy kúni Ispanııa lıgasyndaǵy «Malaga» komandasy Logvınenkoǵa, reseıdiń birqatar ujymdary Serikjan Mujyqov pen Dmıtrıı Shomkoǵa quda túsip otyr. Bul «Astanaǵa», jalpy Qazaqstanǵa jarnama ekeni daýsyz. Buryndary Qazaqstan birinshiligine aıaq baspaıtyn kóptegen sapaly legıonerler bul oqıǵadan soń, aǵyla túser dep otyrmyz. Mysal izdep alysqa barmaımyz, 10 jyl buryn Reseı fýtboly osyndaı jaǵdaıdan ótken.
Eýropa alańdarynda abroımen óner kórsetip, el ataǵyn shyǵaryp júrgen komanda sonymen qatar azdy-kem qarjy da taýyp júr. Bir maýsymda 17 mıllıon eýro tabys túsirip, azýlylarmen terezesi teń shaıqasty. Munyń ózi el fýtbolynyń damýyna qosqan zor úles.
Jyl saıyn jankúıeri artyp kele jatqan «Astananyń» jetistikteriniń qoınaýynda turǵan adamdar kóp. Klýbqa qyzmet etetin avtobýs júrgizýshisinen bastap, fýtbol teorııasyn talqylaıtyn bapkerlerge deıin Saıan Hamıtjanov sekildi menedjer qurǵan saǵattyń syrtylyndaı úzdiksiz júrip turatyn mehanızminiń bir bólshegi. Sondyqtan da, el fýtbolynda úzdik menedjer atanatyn da jóni bar.
Ermuhamed MÁÝLEN,
«Egemen Qazaqstan»
