Kezdesý barysynda ekijaqty qatynastar jáne parlamentaralyq yntymaqtastyq máseleleri talqylandy. Senat Tóraǵasy 1917 jyly táýelsizdik alǵannan beri Fınlıandııa joǵary deńgeıdegi ekonomıkalyq jáne tehnologııalyq damý nátıjesin kórsetip kele jatqanyn atap ótti. Q.Toqaevtyń aıtýynsha, Fınlıandııamen qarym-qatynas, ásirese «jasyl» tehnologııalar men jańartylatyn energııa kózderin paıdalaný transferti máseleleri boıynsha tájirıbesi mol Sýomımen yntymaqtastyq Qazaqstanǵa zor yqylas týǵyzyp otyr.
Q.Toqaev Álemdik jáne dástúrli dinder lıderleriniń 2015 jylǵy V Seziniń jumysyna qosqan úlesine oraı Fınlıandııa Prezıdenti S.Nıınıstıoge rızashylyq bildirdi jáne halyqaralyq mamandandyrylǵan ESKPO-2017 kórmesine belsendi qatysqany úshin fın basshylaryna alǵys aıtty. Taraptar Astanadaǵy EKSPO alańdarynda kórsetilgen jobalar: BUU «jasyl» tehnologııalar men ınvestısııalyq jobalardy damytý jónindegi halyqaralyq hab, «Astana» halyqaralyq qarjy ortalyǵy, Halyqaralyq IT-startap tehnoparki aıasynda budan bylaıǵy yntymaqtastyqtyń keleshegi týraly týraly pikir almasty. Fın depýtatynyń aıtýynsha, bul salanyń ekijaqty yntymaqtastyq áleýetin iske asyrýdyń zor múmkindigi bar.
Senat Tóraǵasy Qazaqstan men Fınlıandııanyń kólik-logıstıka salasyndaǵy, ásirese, qytaıdyń «Bir beldeý, bir jol» jáne Qazaqstannyń «Nurly jol» baǵdarlamasyn ushtastyrý turǵysynda áriptestik qatynastarynyń keleshegi zor ekenin atap ótti. «Biz Fınlıandııany Baltyq jaǵalaýyndaǵy elder men Soltústik Eýropa aımaǵyndaǵy jetekshi kólik haby retinde qarastyramyz», dedi Q.Toqaev.
Senat Tóraǵasy bilim berý salasyndaǵy yntymaqtastyqqa basa nazar aýdara otyryp, keńinen tájirıbe bólisýge, sondaı-aq oqytýshylar men stýdentterdi almastyrýǵa shaqyrdy.
Parlament joǵarǵy Palatasynyń basshysy Prezıdent N.Nazarbaevtyń jyl saıynǵy Joldaýy týraly habardar etip, Tórtinshi ónerkásiptik revolıýsııa jaǵdaıyndaǵy elimizdi jańǵyrtýdyń 10 negizgi mindet jaıynda aıtyp berdi.
V.Skınnarı Joldaýdy joǵary baǵalaı otyryp, eki eldiń aldynda turǵan: sıfrlandyrý, ekonomıkalyq reformalar, «jasyl» tehnologııalardy damytý qajettigi, sybaılas jemqorlyqpen kúres jáne basqa da jaýapty mindetterdiń ortaqtyǵyn atap ótti. «Bul qaterlerdi oıdaǵydaı eńserý úshin bizge birge jumys isteý kerek», dedi fın parlamentshisi. Ol Qazaqstan aldynda aýqymdy mindetterdi sheshýde Fınlıandııanyń járdemdesýge ázir ekenin naqtylady.
Senat basshysy ekijaqty parlamenttik ózara is-qımyldyń qarqynyna rızashylyq bildirip, fın tarapyn parlamenttik delegasııalar almasýǵa shaqyrdy.
