Bıylǵy Joldaýda Elbasy eldik murattarmen qatar, óńirlerdiń turmys-tirshiligine de arnaıy toqtalyp, shynaıy kóńil bólgeni bizdi qýantty. Bul bizdiń jumysymyzǵa erekshe serpin berip, aıryqsha jaýapkershilik júkteıdi. Qazirdiń ózinde buǵan tolyq negiz bar. Atap aıtqanda, Taldyqorǵan qalasy jyldan-jylǵa jańa nysandar men sáýletti ǵımarattarmen tolyǵýda. Solardyń ishindegi aıta keterligi – qalada birden 2 úlken ǵımarattyń irgesi qalanýy. Saltanat saraıy men Kórme kesheni kóz qýantyp, qarasha aıynda qatarynan qoldanysqa berildi. Taldyqorǵandyq jas jubaılar nekelerin budan bylaı úlken saltanat saraıynda qııady. Jańa neke saraıy sáýleti jaǵynan qalaǵa erekshe kórik berip qana qoımaı, azamattyq hal aktilerin tirkep, 8 túrli qyzmet kórsetedi. Al shahardyń ońtústik-batys bóliginde ornalasqan kórme alańy 4,5 myń sharshy metr aýmaqta, munda kásiporyndar óz ónimderin jurt nazaryna usyna alady. Ekinshi qabatynda bilikti mamandar kásipkerlerge ártúrli qyzmetter kórsetedi.
Memleket basshysy Joldaýda «Ákimder turǵyn úı-kommýnaldyq ınfraqurylymyn jetildirý máselesin memleket-jekemenshik áriptestigi negizinde belsendi sheshýi kerek», dep aıqyn mindet artty. Bul baǵytta Taldyqorǵan qalasynda birqatar jumystar qolǵa alynǵan bolatyn. О́tken jyly «Turǵyn úı qurylys jınaq bankimen» aradaǵy áriptestik kelisim negizinde eki nysan qurylysy bastalsa, bıylǵy jyly taǵy eki kompanııa óz usynystaryn bildirip, qala ákimdigimen jumys isteýge ynta bildirip otyr.
Sondaı-aq aýyldyq eldi mekenderdi sapaly aýyzsýmen qamtamasyz etý boıynsha bizde jumys belsendi atqarylyp, ótken jyly «Nurly jol» baǵdarlamasynyń aıasynda uzyndyǵy 27 shaqyrym bolatyn sýmen jabdyqtaý jelilerin qaıta qurylymdaý jumystary aıaqtaldy. Al bıylǵy jyly burynǵy ıesiz qalǵan biryńǵaı syrtqy sýmen jabdyqtaý jáne sýdy burý jelilerin qaıta óńdeý jumystary boıynsha 2 jobanyń jumysy jalǵasýda.
Sonymen qatar Memleket basshysynyń «Bilim berý baǵdarlamalarynyń negizgi basymdyǵy ózgeristerge únemi beıim bolýy jáne jańa bilimdi meńgerý qabiletin damytý bolýǵa tıis», degeni der kezinde qabyldanǵan durys sheshim boldy. Mektepke deıingi bilim berý isinde balalardyń erte damýy úshin óz betinshe oqý mashyǵy men áleýmettik daǵdysyn damytatyn baǵdarlamalardyń biryńǵaı standarttaryn engizý qajettigi zaman talaby. Osyǵan oraı búgingi kúni Taldyqorǵanda mektepke deıingi mekemede 3 jáne 6 jastaǵy balalar balabaqshamen 95,7 paıyz qamtylǵanyn aıta alamyn. Biz munymen toqtap qalmaı, aldaǵy ýaqytta Elbasynyń tapsyrmasynyń oryndalýyn jalǵastyryp, kezekte turǵan balalar sanyn azaıtýǵa kúsh sala bermekpiz.
Jer jánnaty Jetisýdyń kindik qalasy Taldyqorǵanda túrli etnostar tatýlyqta ómir súrýde. Osy oraıda Elbasynyń etnostyq top ókilderi týraly pikirin qyzý qýattaımyz. 74 ult jáne ulys ókili turatyn qalamyzda eshqashan ultaralyq alaýyzdyq bolǵan emes.
Al Joldaýdaǵy óńirlik deńgeıde bıznes-klımatty jaqsartý týraly usynysty meılinshe qoldaımyn. Jyl qorytyndysy boıynsha Taldyqorǵanda ónerkásipte 66,2 mlrd teńgeniń ónimderi óndirildi. Qoldanysqa 4 jańa óndiris orny berildi jáne 3 jumys istep turǵan óndiris keńeıtildi. Nátıjesinde 1,5 mlrd teńge ınvestısııa tartylyp, 116 jańa jumys orny ashyldy. 2017 jyl boıynsha qaıta óńdeý óndirisindegi ınvestısııa 4,4 mlrd teńgeni quraıdy, bul – ótken jylmen salystyrǵanda 2,3 esege artyq. Munyń bári árıne Elbasynyń óńirlerge nazar aýdarýynyń nátıjesinde qol jetken tabystar ekeni anyq.
Baǵdat QARASAEV,
Taldyqorǵan qalasynyń ákimi
