Qazirgi tańda zeınetaqy júıesi tolyqtaı eńbek ótiline baılanystyrylǵan. Kim kóp jumys istese, sol kóp zeınetaqy alatyn bolady. Osyǵan oraı, barsha qazaqstandyqtar ózderiniń atqaratyn jumystaryn zańdastyrýǵa zor mán berýi kerektigi de Joldaýda basa aıtyldy.
«2018 jyldyń 1 qańtarynan bastap yntymaqty zeınetaqy 8 paıyzǵa artty. Múgedekterge, asyraýshysynan aıyrylǵan jáne múgedek balalar tárbıelep otyrǵan otbasylaryna arnalǵan járdemaqylar 16 paıyzǵa deıin ósti. 2018 jyldyń 1 shildesinen bastap bazalyq zeınetaqy eńbek ótiline baılanysty ortasha alǵanda 1,8 ese kóbeıetin bolady. Budan bólek, 2018 jyldyń 1 shildesinen bastap kámeletke tolǵan, bala kezinen birinshi toptaǵy múgedekterdi baǵyp otyrǵan ata-analar úshin qosymsha memlekettik járdemaqyny engizýdi tapsyramyn. Bir eń tómengi kúnkóris deńgeıinen kem emes mundaı járdemaqyny shamamen 14 myń otbasy aı saıyn alady. 2018 jyly osy maqsatqa 3 mıllıard teńgege deıin qarjy qajet bolady», dedi Prezıdent N.Nazarbaev bıylǵy jyldyń mańyzdy qujatynda.
Memleket basshysynyń ár jyl saıynǵy Joldaýy halyqtyń ıgiligin arttyrýǵa baǵyttalyp keledi. Onyń dáleli retinde oblysymyzda ótken jyly atqarylǵan jumystardy aıtar edim. 2017 jyly Ońtústik Qazaqstanda tabıǵı gazben qamtamasyz etý baǵytyndaǵy qurylys jumystarynyń kólemi 2016 jylmen salystyrǵanda birden 3 esege artty. Bul maqsatqa bıýdjetten 13 mıllıard 400 mıllıon teńge qarjy bólinip, jyl boıyna 89 nysanda jumys istelgen. Nátıjesinde jyl sońynda 59 nysan el ıgiligine tapsyryldy. Onyń ishinde 44 eldi meken men 2 shaǵyn aýdannyń turǵyndary «kógildir otynnyń» qyzyǵyn kóre bastady. Sondaı-aq bir jylda oblysta 14 eldi mekenge taza aýyzsý, 92 aýylǵa sapaly elektr qýaty jetkizilgen.
«Jumyla kótergen júk jeńil» demekshi, ár azamat Elbasy tapsyrmalaryn oryndaýda ózindik úlesterin qosyp, mańyzdy sharalardy birlese júzege asyrýymyz kerek.
Jeńisbek MÁÝLENQULOV,
oblystyq ardagerler keńesiniń tóraǵasy
Ońtústik Qazaqstan oblysy
