Bıylǵy jyldyń alǵashqy kúnderinen bastap elektrondy úkimettiń www.egov.kz portalynda jańa kompozıttik qyzmet paıda boldy. Qyzmettiń ataýy – «Zańdy tulǵalardy memlekettik tirkeý, banktik shot ashý jáne óziniń eńbek (qyzmettik) mindetterin oryndaý kezinde jazataıym oqıǵalardan jumyskerdi mindetti saqtandyrýdy eskere otyryp olardyń fılıaldary men ókildikterin eseptik tirkeý».
Atalǵan qyzmettiń artyqshylyǵy jóninde aıtar bolsaq, osy ýaqytqa deıin azamat zańdy tulǵany memlekettik tirkeýge turǵyzǵannan keıin banktik shot ashý úshin memlekettik tirkeýge alynǵany týraly anyqtamany bankke aparýy mindetti shart edi, budan bólek, jumyskerlerdi mindetti saqtandyrýǵa alý úshin saqtandyrý kompanııasyna barýy qajet bolatyn. Al endi birikken jańa kompozıttik qyzmettiń arqasynda azamattarǵa eki kúnniń ishinde (ótinish bergen ýaqytty eseptemegende) zańdy tulǵanyń memlekettik tirkeýge alynǵany týraly kýálikti, banktegi shottyń nómirin, qyzmetkerlerdi jazataıym oqıǵalardan saqtaý týraly qol qoıylǵan kelisimshartty alý múmkindigi týdy.
Bul qyzmetti paıdalaný joldaryn túsindire ketsek, zańdy tulǵany tirkeý barysynda paıdalanýshy eGov.kz portalynda zańdy tulǵa týraly kelesi aqparatty toltyrady: zańdy tulǵanyń ataýy, qyzmetkerler sany, jetekshi men quryltaıshy týraly málimet jáne t.b. Sonymen qatar barlyq quryltaıshylardyń aldyn ala elektrondy úkimette tirkelýi (ESQ bolýy) shart ekenin eske salamyz, sebebi paıdalanýshynyń jeke kabınetine zańdy tulǵany tirkeýge alý týraly ótinishke qol qoıýǵa suratý keledi.
Odan ári osy jańa qyzmettiń sheńberinde paıdalanýshyǵa banktik shot ashýǵa jáne qyzmetkerlerdi jazataıym oqıǵalardan saqtaý týraly kelisimshart bekitý usynylady. Ol úshin paıdalanýshy berilgen tizimnen bank pen saqtandyrýshy kompanııany tańdap, benefısıarlardy, qol qoıýǵa quqyly tulǵalardy kórsetip, saýaldamany toltyryp, eGov.kz-te kórsetilgen qujattardy tirkeý kerek.
Búgingi tańda atalǵan kompozıttik qyzmetke eki bank – «ForteBank» AQ jáne «Sesnabank» AQ, sonymen qatar «Memlekettik annýıtettik kompanııa» ómirdi saqtandyrý kompanııasy» AQ qosyldy.
Aqparat jáne kommýnıkasııalar mınıstrligi «Elektrondy úkimetti» jáne memlekettik qyzmetterdi damytý departamenti dırektorynyń orynbasary Nazgúl Bajaeva habarlaǵandaı, jańa kompozıttik qyzmetke qosylatyn bankter men saqtandyrý kompanııalarynyń sany ósedi, sondaı-aq azamattardyń jaılylyǵy men elimizdegi bıznes-klımattyń jaqsarýy úshin bıylǵy jyly birneshe jańa qyzmet júzege asyrylady. Sonymen qatar N.Bajaevanyń pikirinshe, jańa qyzmet Qazaqstannyń halyqaralyq «Doing Business» reıtıngindegi pozısııasyn arttyrýǵa sebep bolady.
Esterińizge sala keteıik, Dúnıejúzilik banktiń «Doing Business» atty reıtınginde Qazaqstan kásiporyndardy tirkeý, elektrmen jabdyqtaý, menshikti tirkeý, kelisimsharttardyń oryndalýyn qamtamasyz etý krıterııleri boıynsha kórsetkishterin jaqsartyp, 36-orynda tur.
Daıyndaǵan
Joldybaı BAZAR,
«Egemen Qazaqstan»
