Sharaǵa jınalǵan zııaly qaýym ókilderi men til janashyrlaryna atalmysh basqosýdyń mán-mańyzy jaıly túsindirgen komıtet tóraǵasy Qýat Borash, Elbasy Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynyń jetinshi baǵytynda atap ótilgendeı, adamı kapıtaldyń ózektiligi jáne sonymen qatar termınologııa turǵysynan qazaq tilin halyqaralyq deńgeıge jaqyndatý máselesin júzege asyrý úrdisi negizinde kezekti jıyn ótkizilip otyrǵanyn jetkizdi. Osy oraıda «keńesip pishken ton kelte bolmas» degendeı, ortaq pikir, oramdy oılarǵa jol ashyp, kópshilikpen keleli keńes qurýdyń qajettiligine toqtaldy.
Dóńgelek ústeldiń negizgi baıandamashysy Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń basshysy Erbol Tileshovtiń pikirinen túıgenimiz, memlekettik tildi damytýdyń 2011-2020 jyldarǵa arnalǵan baǵdarlamasyna sáıkes, qazirgi tańda qoǵamǵa qajet oqý-ádistemelik jáne tanymdyq kitaptar shyǵarý máselesi sátti júrip jatyr eken.
Iаǵnı buǵan deıin joǵarydaǵy baǵdarlamaǵa úmitker retinde ortalyqqa ártúrli taqyryptardy qamtyǵan 400-ge tarta shyǵarma kelip túsken. Osy týyndylardy fılolog-ǵalym Jantas Jaqypov bastaǵan saraptamalyq top qarap shyǵyp, suryptalyp alynǵan 70 kitapqa bátýasyn bergen.
Maquldanǵan shyǵarmalar negizinen sózdikter, balalar ádebıeti, til úırený quraldary, tanymdyq týyndylar jáne aýdarma kórkem ádebıetter.
Joǵarydaǵy jıyn barysynda jańadan jaryq kórgen 36 kitaptyń tanystyrylymy boldy. Osylardyń ishindegi basty qundylyq ult ustazy Ahmet Baıtursynovtyń tulǵalyq ensıklopedııasy men ádebıetshi ǵalym Asqar Egeýbaevtyń aýdarmasymen jaryq kórgen Mahmud Qashqarıdyń úsh tomdyǵynyń ekinshi basylymy. Sonymen birge ártúrli salalyq sózdikter, arab-parsy leksıkasy, qyrǵyz jazýshysy Shyńǵys Aıtmatovtyń buǵan deıin qazaq tiline aýdarylmaǵan «Taý qulaǵan» atty týyndysy, Alash qaıratkeri Teljan Shonanovtyń bes tomdyǵy, balalarǵa arnalǵan «Alash qozǵalysy» atty tanymdyq oqýlyq pen Alash ıdeıasyn qoldaǵan aqyndardyń jyr jınaǵy, belgili túrkolog Q.Sartqojaulynyń «Tas kitaptyń qupııasy» atty týyndysy, tilshi ǵalym Á.Júnisbektiń qazaq tiliniń artıkýlıasııalyq bazasy tolyq taldanǵan «Tól álipbı – tól jazý máseleleri» atty eńbegi bar.
Ekinshi bir qýanarlyq jaǵdaı, jaryq kórgen kitaptardyń elektrondy nusqasy jınaqtalǵan SD nusqasy qosa usynylyp otyrsa, aldaǵy kúnderi ulttyq arnadan ár juma saıyn til damytýǵa arnalǵan «Enshi» atty jańa joba kórermenge jol tartpaq. Joba qazaqtyń umyt bolǵan salt-dástúrleri, ulttyq oıyndar, turmystyq mádenıetin dáripteýmen qatar til bilimi, mádenıet, tanym, dástúrimizdi nasıhattaýǵa arnalǵan deıdi sharany uıymdastyrýshylar. Sonymen qatar 15 serııaly «Sóz qazynasy» atty anımasııalyq fılm de keshikpeı «Balapan» arnasy arqyly kórermenge usynylmaq.
Beken QAIRATULY,
«Egemen Qazaqstan»
Sýretti túsirgen
Orynbaı BALMURAT,
«Egemen Qazaqstan»
