UN NEWS CENTRE
Birikken Ulttar Uıymynyń shtab-páterinde Qazaqstan Prezıdentiniń tóraǵalyǵymen ótken Qaýipsizdik Keńesiniń joǵary deńgeıdegi pikirtalasynda Nursultan Nazarbaev Soltústik Koreıadaǵy ıadrolyq problemany sheshý úshin Iranmen kelisimge kelýge múmkindik bergen konstrýktıvti joldy qoldaný kerektigin aıtty. Sonymen qatar Qazaqstan Prezıdenti bul týraly Donald Tramppen sóıleskenin jetkizdi. Nursultan Nazarbaevtyń aıtýynsha, týyndaǵan kelispeýshilikti eńserýge bolady.
«Bul probelmany sheshý úshin AQSh, Reseı, Qytaı arasyndaǵy senimdi qaıta qalpyna keltirý kerek. Bul týraly men Aq úıde Donald Tramppen sóılestim. Meniń oıymsha, bul jerde barlyǵymyzdyń ustanymymyz birdeı. AQSh-tyń, Reseı men Qytaıdyń qatysýynsyz bul problemany sheshý qıyn», dedi Nursultan Nazarbaev. Sondaı-aq ol barlyq taraptardy jyldam jáne konstrýktıvti sheshimge shaqyryp, «ıadrolyq bestiktiń» kelissózder jasaý kerektigin atap ótti. N.Nazarbaevtyń aıtýynsha, Qazaqstan kelissózder ótkizýge alań usynýǵa daıyn.
О́z sózinde Qazaqstan Prezıdenti álem boıynsha beıbitshilik pen qaýipsizdikti qamtamasyz etýdegi BUU Qaýipsizdik Keńesiniń róli zor ekenin atap ótti. Sonymen qatar ol Qazaqstan álemdegi tórtinshi ıadrolyq qarý arsenalynan bas tartqanyn, Semeıdegi álemdegi eń iri ıadrolyq synaq alańdarynyń birin japqanyn eske saldy. Nursultan Nazarbaevtyń aıtýynsha, Qazaqstan Ortalyq Azııadaǵy ıadrolyq qarýsyz aımaqty qalyptastyrýda mańyzdy ról atqardy. Qazaqstannyń ıadrolyq qarýsyz álem qurýǵa qosqan taǵy bir úlesi – MAGATE-men Tómen baıytylǵan ýran bankin qurý týraly kelisimi ekeni sózsiz.
Jıynda N.Nazarbaev Taıaý Shyǵysta ıadrolyq qarýsyz aımaq qurýǵa shaqyrdy. «Kúsh ıadrolyq bomba men raketalarda emes. Olar kóp bolsa da, tolyǵymen qorǵan bola almaıdy. Álemdi tek halyqaralyq qoǵamdastyqtyń senimi qorǵap qala alady», dedi Qazaqstan basshysy. Sondaı-aq ol ıadrolyq qarýdy taratpaý rejimine baǵyttalǵan birneshe shara usyndy. «Iаdrolyq derjavalar biz ıadrolyq qarýdy ustaımyz jáne ony damyta beremiz, al basqalaryna tyıym salamyz dese, durys bola ma? Joq, meniń oıymsha, bul durys emes», dep atap ótti N.Nazarbaev.
Qazaqstan 2018 jylǵy qańtardaǵy tóraǵalyǵy merziminde tabysty jumys istep jatyr. Qazaqstannyń BUU Qaýipsizdik Keńesiniń turaqty emes múshesi bolyp saılanýy jáne tóraǵalyq qyzmeti álemdik qoǵamdastyqtyń Nursultan Nazarbaevtyń beıbitshil saıasatyna degen senimin kórsetedi.
THE NEW YORK TIMES
Birikken Ulttar Uıymynyń shtab-páterinde Qazaqstan Prezıdenti Nursultan Nazarbaevtyń tóraǵalyǵymen Qaýipsizdik Keńesiniń «Jappaı qyryp-joıatyn qarýdy taratpaý: senim sharalary» taqyryby boıynsha joǵary deńgeıdegi pikirtalasy ótti. Jıynda Nursultan Nazarbaev senim ahýalyn qalyptastyrýdyń jáne Phenıannyń kelissóz ústeline oralýynyń mańyzdy sharty retinde «ıadrolyq bestiktiń» KHDR-diń qaýipsizdigine kepildik berýin jaqtaıtynyn aıtty. Prezıdenttiń aıtýynsha, múddeli taraptar qajet etken jaǵdaıda, Qazaqstan kelissóz alańyn usynýǵa daıyn.
Nursultan Nazarbaev BUU Qaýipsizdik Keńesine ıadrolyq qarýdan bas tartý arqyly Qazaqstannyń halyqaralyq bedeliniń artqanyn jetkizdi. Onyń aıtýynsha, Soltústik Koreıanyń ıadrolyq qarýǵa umtylýyn AQSh, Reseı men Qytaı arasyndaǵy senimdi nyǵaıta otyryp sheshý kerek.
FOREIGN BRIEF
Qazaqstan osy aıda BUU Qaýipsizdik Keńesine tóraǵalyq etýde. Nıý-Iorkte Qazaqstan Prezıdenti Nursultan Nazarbaevtyń tóraǵalyǵymen Qaýipsizdik Keńesiniń «Jappaı qyryp-joıatyn qarýdy taratpaý: senim sharalary» taqyryby talqylandy. Odan keıin Keńeste Qazaqstannyń tóraǵalyǵymen Aýǵanstandaǵy terrorızm men esirtki trafıgine qarsy kúreske baılanysty pikirtalas ótti.
Keńestiń qańtar aıyndaǵy prezıdenti retinde Qazaqstan Soltústik Aýǵanstandaǵy Islam memleketi men talıbterdiń qaýpine qarsy kúreske alańdaýshylyq bildirdi. Qaýipsizdikti eskere otyryp, Astana shıeleniske keshendi sheshim tabý kerektigin qoldaıtynyn aıtty.
Jıynda byltyr Aýǵanstandaǵy esirtki saýdasy 87 paıyzǵa jetkeni, odan túsken qarjy «Talıban» qyzmetin qarjylandyrýǵa jumsalǵany kóldeneń tartyldy. Qazaqstannyń BUU-daǵy turaqty ókili Qaırat Omarov Keńestiń 15 adamnan turatyn delegasııasynyń Aýǵanstanǵa baryp kelgenin atap ótti. Bir aıta keterligi, 7 jyldan keıin alǵash ret uıymdastyrylǵan bul saparǵa BUU Qaýipsizdik Keńesiniń qańtardaǵy tóraǵasy - Qazaqstan bastamashy boldy.
Daıyndaǵan
Gúlnur QÝANYShBEKQYZY,
«Egemen Qazaqstan»
