Úkimettiń baspasóz ortalyǵynda uıymdastyrylǵan jıynda Energetıka mınıstrliginiń ótken jylǵy damý qorytyndylary jáne aldaǵy josparlary týraly aıtylǵan bolatyn. Mınıstr onda Pavlodar munaı-hımııa zaýytynda jańǵyrtý jobasy júzege asyrylǵanyn, sondaı-aq Atyraý munaı óńdeý zaýytyn jańǵyrtý jobalarynyń qurylysy aıaqtalǵanyn, qazirgi ýaqytta zaýytta iske qosý-jóndeý jumystary júrip jatqanyn atap ótti.
«2017 jyly otyn-energetıka sektorynyń salalary rekordtyq kórsetkishterge qol jetkizdi deýge bolady», dedi mınıstr.
Q.Bozymbaevtyń aıtýynsha, ótken jylda gaz óndirý kólemi shamamen 53 mlrd tekshe metr nemese jospardyń 110 paıyzyn quraǵan. Oǵan qosa 2017 jyly 102,3 mlrd kVsaǵ elektr energııasy, 106,7 mln tonna kómir óndirilgen. 2017 jyldyń qorytyndysy boıynsha gazdandyrý deńgeıi – 47,38 paıyz.
Brıfıngte Q.Bozymbaev Memleket basshysynyń Joldaýda belgilegen mindetterin eskere otyryp, 2018 jylǵa josparlar týraly da aıtyp berdi. Mınıstrdiń aıtýynsha, Prezıdenttiń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýyna sáıkes Energetıka mınıstrliginiń negizgi taktıkalyq mindetteriniń biri resýrstyq áleýetti odan ári damytý bolyp tabylady. Ol úshin basty qural – Jer jáne jer qoınaýyn paıdalaný týraly kodeks, onyń normalary 2018 jylǵy shildeden bastap kúshine enedi. Qazir zańǵa sáıkes barlyq normatıvtik-quqyqtyq baza pysyqtalýda.
«Jer qoınaýyn paıdalaný salasynda salyq saıasaty jetildirildi. Bıylǵy jyldyń 1 qańtarynan bastap jańa Salyq kodeksi kúshine endi. Kodeksterdi qabyldaý jáne barlyq qarastyrylǵan normalardy iske asyrý munaı-gaz kesheniniń strategııalyq mańyzyn saqtap qalýǵa múmkindik beredi», dedi mınıstr. Sonymen qatar ol bıyl suıyltylǵan munaı gazy naryǵynda shektik baǵany memlekettik retteýden kezeń-kezeńmen shyǵarý úshin elektrondy saýda alańyn engizý josparlanǵanyn atap ótti. Bul baǵa belgileý jáne suıyltylǵan munaı gazyn bólý tetigin jetildirýge múmkindik bermek. Qajetti zańnamalyq normalar 2018 jylǵy jeltoqsanǵa deıin pysyqtalady.
«Astanany gazdandyrý máselesi óte ózekti, sondyqtan qarjylandyrý úlgisi men kózin pysyqtaý jalǵasady. Munaı-gaz salasynda polıpropılen óndirisi jobasy boıynsha qurylys jumystary bastalady, dedi mınıstr.
Elektr energetıkasy salasynda «100 naqty qadam» Ult josparynyń 51-qadamynda senimdilik pen energııamen qamtamasyz etý syzbasyn jeńildetý maqsatynda óńirlerde energııa jetkizýshi uıymdardy irilendirý qarastyrylǵan.
Bul rette Q.Bozymbaev 2018 jyly 15 energııa jetkizýshi uıym óz qyzmetterin toqtatýy tıistigin, jalpy energııa jetkizýshi uıymdardyń sany 2022 jylǵa qaraı 30 paıyzǵa, ıaǵnı 160-tan 110-ǵa deıin qysqarady dep kútilýde ekendigin atap ótti.
Málimetke súıensek, «Nurly jol» baǵdarlamasy aıasynda Semeı – Aqtoǵaı – Taldyqorǵan – Almaty oramyndaǵy Shúlbi GES-niń 500 kV jelisi qurylysynyń II kezeńi aıaqtalady. Osylaısha «Soltústik – Shyǵys – Ońtústik» óńiraralyq jobasy 2018 jyldyń sońyna qaraı tolyǵymen iske qosylady. Joba ShQO men Almaty oblysynyń elektr energııasy tapshylyǵyn qamtýǵa jáne energetıkalyq táýelsizdikti nyǵaıtýǵa baǵyttalǵan.
Dınara BITIK,
«Egemen Qazaqstan»
