«Bul Aýǵanstan úshin ǵana emes, eldegi beıbitshilik pen damýdy qalpyna keltirýge atsalysyp jatqan halyqaralyq qoǵamdastyqqa qarsy jasalǵan qanquıly jáne óreskel áreket. Qazaqstan tarapy jaýapkershilikti sezine otyryp, Aýǵanstandaǵy terrorızm máselesin túbegeıli sheshý úshin jedel sharalar qabyldaý qajet ekenin málimdeıdi», delingen Syrtqy ister mınıstrligi taratqan málimdemede.
Qazaqstan tarapy Aýǵanstandaǵy barlyq saıası kúshterdi tatýlasý boıynsha kelissózder júrgizýge shaqyrady. Sonymen qatar BUU Qaýipsizdik Keńesiniń Tóraǵasy retinde eldegi jaǵdaıdy turaqtandyrýǵa, terrorızmdi joıýǵa jáne qalpyna keltirýge jan-jaqty járdem kórsetetini aıtylǵan.
«BUU Qaýipsizdik Keńesi Tóraǵasynyń qańtarda qabyldaǵan málimdemesi halyqaralyq qoǵamdastyqty eldegi saıası jaǵdaıdy turaqtandyrý maqsatynda Aýǵanstanǵa qoldaý kórsetýge shaqyrady. Qaza bolǵandardyń týystary men jaqyndaryna kóńil aıtamyz, sondaı-aq jaraqat alǵandardyń tez arada saýyǵyp ketýin tileımiz», delingen mınıstrliktiń málimdemesinde.
Senbi kúni Kabýldaǵy «Interkontınental» qonaq úıine qarýly basbuzarlar basyp kirip, 20-dan astam adamdy jaıratyp salǵan. Oqıǵany «Talıban» terrorıstik uıymy óz moınyna alyp otyr. Qaza tapqandar arasynda qazaqstandyq bir azamat bar. Baqılyq bolǵan otandasymyzdyń otbasy men týǵan-týystaryna qaıǵyryp kóńil aıtamyz.
