Kún tártibine beınebaqylaý júıesin keńeıtý máselesi qoıyldy. Qazir oblysta 758 beınebaqylaý kamerasy bar, onyń 329-y jóndeýde, 11-i jol boıynda ornalasqan. Quqyq qorǵaý organdary 10 aqpanǵa deıin barlyq kameralar jumys isteıtinine sendirdi.
2017 jyly beınekameralar arqyly 27 qylmys ashylyp, 16 072 ákimshilik quqyqbuzýshylyq anyqtaldy. Jalpy ótken jyly 142 myńnan astam quqyqbuzýshylyq tirkeldi, onyń 106 myńy jolda júrý erejelerin buzý.
- Jalpy alǵanda 1 mlrd 267 mln teńge aıyppul salyndy, onyń 782 mıllıony tólendi. Jergilikti bıýdjettiń quqyqtyq tártipti qadaǵalaý organdaryn jabdyqtaýǵa baǵyttalǵan qarajaty qaýipsizdikti qamtamasyz etýge jumsalyp jatyr,- dedi IID basshysy Aıan Dúısembaev.
Oblystyq IID jańa shaǵyn aýdandarǵa, qala mańyndaǵy selolyq okrýgterge taǵy da qosymsha 1410 kamera ornatatyn joba daıyndady. Ákimdik bul jobany qarjylandyrý máselesin qarastyryp jatyr.
Atyraý oblysynyń ákimi Nurlan Noǵaev osy baǵyttaǵy jumystardy jandandyrý kerektigi jaıly tapsyrma berip, qalalyq beınebaqylaý júıesin biryńǵaı aqyldy júıege engizý «Sıfrlyq Qazaqstan» baǵdarlamasynyń basty baǵyttarynyń biri ekenin aıtty.
- Jaqynda «bultty» tehnologııalardy qoldanatyn beınekameralar ornatýdy bastaımyz, aýqymdy jumys júredi, - dedi Nurlan Noǵaev. – Bizdiń aldymyzda kameralardy strategııalyq mańyzdy memlekettik organdarǵa, adamdar kóp jınalatyn jerlerge qondyrý mindeti tur. Quqyq qorǵaý organdary kásipkerlermen oıyn-saýyq oryndarynda ishki ister organdarynyń jedel áreket etý ortalyǵyna shyǵatyn kameralar qondyrý jóninde túsindirý jumystaryn júrgizýleri kerek.
Oblys ákimi aımaqtaǵy qylmystyq ahýaldy jaqsartýǵa qatysty quqyq qorǵaý organdary basshylaryna naqty tapsyrmalar berdi.
- Atyraý men Qulsary qalalarynyń turǵyndary úshin taǵy bir másele - kóńil kóteretin oryndar men táýlik boıy isteıtin dúkenderdiń jumysy bolyp otyr. Adamdar túngi ýaqytta shý men qoǵamdyq tártiptiń buzylýyna kóp shaǵym jasaıdy, - dep atap ótti aımaq basshysy. – О́kinishke qaraı, bul oryndardyń ıeleri óz mindetterine nemquraıly qaraıdy jáne jaqyn mańda ornalasqan úılerdiń turǵyndarynyń talaptary men eskertýlerine mán bermeıdi. Men áriptesterime, quqyq qorǵaý organdarynyń basshylaryna osy jaıtqa basa nazar aýdarýdy tapsyramyn.
