Oblystyq kásipkerlik jáne ındýstrııalyq-ınnovasııalyq damý basqarmasynyń basshysy Aıqyn Eleýsizovtiń aıtýynsha, salada 120 myńnan astam adam jumyspen qamtylǵan. Biraq ótken jyly Atyraý qalasy men Jylyoı, Inder aýdandarynda shaǵyn jáne orta bıznes salasynda jumyspen qamtý kórsetkishinde biraz tómendeý baıqaldy, basqarma basshysy muny óndiristiń avtomattandyrylýy men keıbir mekemelerde qyzmetkerler sanynyń qysqarýymen baılanystyrady.
Alystaǵy aýyl halqynyń kásip ashyp, zamanǵa saı talaptanýyna «Bıznestiń jol kartasy-2020» memlekettik baǵdarlamasynyń kómegi kóp bolyp otyr. Baǵdarlama júzege asyryla bastaǵan 2010 jyldan beri Atyraýda 976 bıznes-joba qoldaý taýyp, 5564 jańa jumys orny ashyldy. Alaıda Inder, Qyzylqoǵa, Isataı aýdandarynyń turǵyndary baǵdarlama ıgiligin kórýge áli de asyǵar emes. Ekinshi deńgeıli bankterdiń kásipkerlerdiń kepil múlkin tym arzanǵa baǵalaýy da aýyl sharýashylyǵy jobalarynyń nesıe alýyna kedergi keltirýde.
«Sońǵy bes jylda aýyl kásipkerlerin qoldaýǵa jergilikti bıýdjetten 1 157 mln teńge qarajat qaraldy. Sonyń nátıjesinde 242 bıznes nysany ashylyp, 500-den astam jumys orny quryldy. Byltyrdyń ózinde 67 joba maquldandy», deıdi Aıqyn Eleýsizov.
Qazir bıznes bastaımyn degen adamǵa memleket tarapynan kómektiń san túri bar. Oblystyq kásipkerler palatasynyń basshysy Asylbek Jákıev byltyr 265 kásipkerlik sýbektisi qarjylandyrylyp, jańadan 200 bıznes orny ashylǵanyn aıtady. «Bastaý bıznes» jobasyna oblysta 750 adam qatysqan. Alaıda kásipkerlik negizderin oqyǵan 750 adamnyń 130-y ǵana naqty is bastapty. Oblys ákimi Nurlan Noǵaev Isataı aýdanyna jumys sapary barysynda ótkizgen kóshpeli májiliste osy máselege nazar aýdardy. «Nátıjeli jumyspen qamtýdy jáne jappaı kásipkerlikti damytý» baǵdarlamasy aıasynda Atyraý oblysynda 2017 jyly nesıeleýge 927 mln teńge, kepildikti qamtamasyz etýge 97,6 mln teńge, «Bastaý bıznes» baǵdarlamasyn júzege asyrýǵa 51 mln teńge bólingen. Aımaq basshysy bıznesti qoldaýǵa baǵyttalǵan memlekettik baǵdarlamalardy júzege asyrý kezinde oqytylǵan adamdardyń sanyna emes, onyń nátıjesine, tıimdiligine nazar aýdarý kerektigin aıtty.
– 750 aýyl turǵynynyń bıznes týraly bilim alǵany jaqsy, biraq solardyń ishinen tek 130-y ǵana kásip ashqany onyń tıimdiligi tómen bolǵanyn kórsetedi. Adamdardyń yntasyn, bızneske beıimdiligin eskerý kerek. Qyzylqoǵa aýdanynda 253 adam oqytýdan ótken, naqty is bastaǵany – 22 adam. Qalǵandary nelikten tys qalyp qoıdy? Kásipker bolǵylary keletin taǵy da 231 adamǵa qandaı kómek kórsete alamyz? Barlyq jaýapty organdar osy baǵytta jumys isteýi kerek, – dedi Nurlan Noǵaev.
Qazir aımaqta 20 myńǵa jýyq adam jumyssyz retinde tirkeýde tur. Qolda bar múmkindik pen memlekettiń kómegin paıdalanyp, is bastaımyn degen azamattarǵa kásipker ataný asa qıyn emes. Bastysy – nıet.
Baqytgúl BABASh,
«Egemen Qazaqstan»
Atyraý oblysy
