Tóraǵalyqqa qaıta saılandy

Keshe Parlament Senatynyń kezekti otyrysy bolyp, onda palata bıýrosy usynǵan kún tártibi qaralmas buryn uıymdyq máseleler qaraldy. Ony Senat Tóraǵasynyń orynbasary Aleksandr Sýdın ashyp, júrgizip otyrdy. Ol alǵashqy sózdi otyrysqa qatysyp otyrǵan Prezıdent Ákimshiliginiń Basshysy Aslan Mýsınge berdi.

Aslan Esbolaıuly óziniń Senatqa Prezıdent Nursultan Nazarbaevtyń  tapsyrmasymen kel­genin aıtty. Qazaqstan Res­pýb­lıkasy Konstıtýsııasynyń 50-baby 2-tarmaǵyna sáıkes, merzimderi aıaqtalǵan Senat de­pýtattarynyń ornyna Prezıdent Jarlyǵymen basqa depýtattar taǵaıyndaldy. Sonyń ishinde Muhtar Altynbaev, Berik Imashev, Qaırat Mámı jáne Baýyr­jan Muhamedjanov qaıtadan, al Ikram Adyrbekov, Erlan Nyǵ­ma­týlın jáne Lıýdmıla Poltorabatko jańadan taǵaıyndaldy, dedi. Sondaı-aq Aslan Mýsın óki­letti merzimderi aıaqtalǵan Nurlyǵaıym Joldasbaeva, Mu­hambet Kópeı jáne Qýanysh Sultanovqa memlekettik qyzmet­tegi uzaq jylǵy jemisti eńbek­te­ri úshin Elbasynyń atynan alǵys aıtatynyn jetkizdi. Odan ári Prezıdent Ákimshiliginiń Basshy­sy Parlament jáne onyń depý­tat­tarynyń mártebesi týraly Konstıtýsııalyq zańnyń 9-ba­by­na sáıkes Elbasy N.Nazarbaev Senat Tóraǵasy qyzmetine Qaı­rat Mámıdiń kandıdatýrasyn usy­natynyn jarııalap, depýtat­tardyń qoldaýlaryn ótindi.

Senatorlar, reglamentke sáı­kes, aldymen sanaq komıssııasyn saılap, odan soń usynylǵan kan­dıdatýrany daýys berý bıýlletenine engizip, jasyryn daýys berý tártibimen saılaý ótkizdi. Saılaýdan keıin sóz alǵan sanaq komıssııasynyń tóraǵasy Bolat Jylqyshıev Qaırat Mámıdiń biraýyzdan saılanǵanyn jarııa­la­dy. Tóraǵalyq oryndyqqa otyr­ǵan soń Q.Mámı ózine senim kórsetken Elbasyǵa jáne qoldaý bildirgen áriptesterine alǵysyn aıtyp, aldaǵy ýaqytta da abyroı bıiginen kórinýge jumys isteıtinin jetkizdi. Al ókilettik merzimderi aıaqtalǵan M.Kópeı, Q.Sul­tanov jáne N.Joldasbaeva al­dy­men úlken senim kórsetip, ózderin senatorlyqqa taǵaıyndaǵan El­ba­syna, sosyn birlese jumys istegen áriptesterine, apparat qyz­metkerlerine rızashylyqtaryn bildirip, senatorlarmen qosh­tasty.

Senat Tóraǵasy Q.Mámı óki­lettigi aıaqtalǵan M.Kópeıdiń or­nyna Senat Tóraǵasynyń oryn­ba­sarlyǵyna Qaırat Ishanovtyń kandıdatýrasyn usyndy. Reglamentke sáıkes, ashyq daýys berý tártibimen saılanatyn oryn­ba­sarlyq qyzmetke Q.Ishanov biraýyzdan saılandy.

Osydan keıin depýtattar kún tártibindegi máselelerdi qaraýǵa kiristi. Aldymen Májilis maqul­daǵan Qazaqstan men Belarýs Úkimetteri arasyndaǵy azamat­tyq qorǵanys, tótenshe jaǵdaı­lardyń aldyn alý jáne olardy joıý salasyndaǵy yntymaq­tas­tyq týraly kelisimdi ratıfıkasııalaý týraly zań jobasy qa­raldy. Bul týraly Tótenshe jaǵ­daılar mınıstri V.Bojko jáne senator Ǵ.Qasymov baıandady. Zań biraýyzdan qabyldandy.  Kelesi másele Májilis maqul­daǵan mádenı qundylyqtardy zańsyz ákelýge, áketýge jáne olarǵa menshik quqyǵyn berýge tyıym salý men olardyń aldyn alýǵa baǵyttalǵan sharalar tý­raly konvensııany ratıfıkasııalaý týraly zańnyń jobasy jó­ninde boldy. Bul másele boı­yn­sha negizgi baıandamany jasaǵan Mádenıet mınıstri M. Qul-Muhammedke de, qosymsha baıandama jasaǵan senator J.Erǵa­lıevke de eshqandaı suraq bolmaı, zań biraýyzdan qabyl­dandy.

Úshinshi jáne tórtinshi máse­leler Keden odaǵyna qatysty shart pen kelisimdi ratıfıkasııalaý týraly zań jobalaryna ar­nal­dy. Alǵashqysy Keden oda­ǵyna múshe memleketterdiń keden zańnamasyn buzǵany úshin qyl­mystyq jáne ákimshilik jaýapkershilikke tartý erekshelikteri tý­raly shartty, ekinshisi osy ister boıynsha quqyqtyq kómek jáne ózara is-qımyl týraly kelisimdi ratıfıkasııalaýdy qarastyrady. Negizgi baıandamany jasaǵan Qar­jy mınıstri B.Jámishevke bir­qatar suraqtar bolǵanymen, zań biraýyzdan qabyldandy.

Odan keıingi másele eki oqy­lymnan ótip, birqatar ózgeris­terimen Májiliske qaıtarylǵan «Neke (erli-zaıyptylyq) jáne otbasy týraly» Kodeks jobasyna arnaldy. Májilistiń ýaqytsha bolmaýy kezinde onyń fýnk­sııa­syn Senat atqarýyna baıla­nys­ty usynylǵan Kodeks ózgeris­terimen tolyq qabyldandy. Keıbir zańnamalyq aktilerge memlekettik áleýmettik tapsyrys má­seleleri boıynsha ózgerister men tolyqtyrýlar engizý týraly zań jobasy men «Notarıat týraly» zań jobasy da Májiliske qaı­tarylǵan bolatyn. Endi olar da usynylǵan ózgeristerimen tolyq­taı qabyldandy.

Otyrys sońynan depýtat­tar­dyń ortalyq organdarǵa jol­daı­tyn saýaldary jarııalandy.