Memlekettilik merekesi bizge toı toılaý úshin emes, oı oılaý úshin kerek.
Elbasymyz osylaı dedi. Táýelsizdiktiń jıyrma jyldyǵyn zerdege salý, onyń tarıh úshin qyp-qysqa, biraq bizdiń eldigimiz úshin baıtaq shejiresinen taǵylym alý bárinen de mańyzdy ekenin aıtty.
Bul kezeńde Qazaqstan ǵasyrlarǵa teńesetin ǵajaıyp joldy júrip ótti. Bul jolda bári de boldy: burynnan qalyptasqan sharýashylyq baılanystary úzilip, shyǵarǵan ónimderin ótkize almaı daǵdarǵan kásiporyndar, alty aılap aılyq, jyldap zeınetaqy ala almaı, egemendiktiń eleń-alańyndaǵy eńseni ezer qıyndyqtardan qajyǵan jurt, keńbalaq kúıde júrgen qazaqtyń bazar psıhologııasyna boı úırete almaı asyp-sasýy, ala qapshyq arqalap, otbasyn asyraǵan áıelder, jekeshelendirý jantalasy, naryq jaǵdaıynda ómir súrýge beıimdelýdiń bastapqy qadamdary, ekonomıkalyq reformalardyń alǵashqy nátıjelerin berýi, áleýmettik salanyń eńse tikteýi, halyqtyń kóńil-kúıiniń qalpyna túsýi, eldiń erteńine senimniń ornyǵýy, ınvestısııalardyń kele bastaýy, jasampazdyq jumystyń jolǵa qoıylýy, eldiń ál-aýqatynyń artýy, Astananyń salynýy, qalada da, dalada da qurylystyń qarqyn alýy, óz óndirisimizdiń órkendeýi, memleketimizdiń Batysqa da, Shyǵysqa da birdeı tanylyp, birdeı qurmettelýi, búkil túrki áleminen, búkil musylman jurtynan, búkil TMD keńistiginen tuńǵysh ret Eýropa tórine kóterilip, tóbebılik jasaý, Astana Sammıtin ótkizý, Islam Yntymaqtastyǵy Uıymyna tóraǵalyq etý...
Iá, tarıh saǵatynyń tili syrt ete qalǵandaı qysqa kezeńde Qazaqstan osyndaı jasampazdyq joldan ótti. Bizdiń bul uly joldaǵy kóshimizdi búginde dúıim dúnıe tanıtyn, moıyndaıtyn, qurmetteıtin Prezıdentimiz Nursultan Nazarbaev biliktilikpen, baıyptylyqpen bastaı bildi. Elim degen Erge kámil sengen, kámil sengen soń eki tizgin, bir shylbyrdy qolyna berik bergen El de tarıh synyna laıyqty shydap shyqty. Eldigin, keńdigin, dalalyq danalyǵyn tanytty.
Mine, toı tabaldyryǵyna da taqap qaldyq. Endi jıyrma kúnnen keıin memleketimizdiń mereıli merekesin atap ótemiz. Osyǵan oraı elde JULDYZDY JIYRMA KÚN jarııalanyp otyr.
Olarǵa:
«Meniń Qazaqstanym» (26 qarasha),
«Atameken» (27 qarasha),
«Ata Zań» (28 qarasha),
«Beıbitshilik beldeýi» (29 qarasha),
«Kelisim» (30 qarasha),
«Azamattyq qoǵam» (1 jeltoqsan),
«Dástúr» (2 jeltoqsan),
«Bolashaq» (3 jeltoqsan),
«Sergektik» (4 jeltoqsan),
«Ǵylym» (5 jeltoqsan),
«Mádenıet» (6 jeltoqsan),
«Altyn teńge» (7 jeltoqsan),
«Shańyraq» (8 jeltoqsan),
«Aýyl» (9 jeltoqsan),
«Astana» (10 jeltoqsan),
«Bilim» (11 jeltoqsan),
«Densaýlyq» (12 jeltoqsan),
«Serpin» (13 jeltoqsan),
«Memlekettik til» (14 jeltoqsan),
«Otan» (15 jeltoqsan)
degen ataýlar berilgen. El gazeti «Egemen Qazaqstan» osy juldyzdy jıyrma kúnniń bárine de aıqarma better arnap, olardyń mán-mańyzyn ashyp kórsetetin bolady.
