Bıyl – Buqar jyraýdyń 350 jyldyq mereıtoıy. Áıgili jyraýdyń óz zamanyndaǵy ózekti degen máseleniń bárin nazardan tys qaldyrmaı, olardyń sheshimin tabýǵa umtylǵan qaıratker tulǵa ekendigi belgili. Qaraǵandylyq sýretshi Aıbek Begalın bolsa, óziniń týyndysynda jyraýdy osy qyrynan tanytýǵa kúsh salǵan.
Jalpy, kórmede portrettik janr jurt nazaryna keńinen usynyldy. Qazybek bı, Qurmanǵazy, Abaı Qunanbaev, Shashýbaı Qoshqarbaev, Kúlásh Baıseıitova, Qanysh Sátbaev jáne Oljas Súleımenov syndy alash asyldarynyń keneptegi keskinderi jurt nazaryn ózine aýdarmaı qoımady.
Kórmege kelýshiler qylqalamnyń aıtýly sheberleri Ábilhan Qasteevtiń, Qanafııa Teljanovtyń, Gúlfaırýs Ismaılovanyń, Hamza Kıkımovtiń jáne basqa da sýretshilerdiń týyndylarymen jaqynyraq tanysty.
Bul mádenı sharada Mıngısh Ábilqasov, Murat Qalqabaev, Júrsin Balkenov sııaqty sheberlerdiń adam balasynyń uǵymyn álemdi taný fılosofııasymen ushyrastyratyn metafora jáne sımvol tiline súıengen týyndylary tórden oryn tapty.
Sondaı-aq elimizdi ındýstrııalandyrý taqyrybyn qylqalamnyń kómegimen ashqan Májıt Baıtenov, Mıhaıl Podlesnyı, Vladımır Kım syndy sýretshilerdiń eńbekteri de talǵamy bıik kelýshiler tarapynan laıyqty baǵasyn aldy.
Sonymen qatar kórme aıasynda «Uly dalanyń uly tulǵalary: Qazybek bı jáne Buqar jyraý» atty mýzeı sabaǵy ótti. Oǵan mektep oqýshylary men BAQ ókilderi qatysty.
Qaırat ÁBILDA,
«Egemen Qazaqstan»
QARAǴANDY
