Kórmede T.Júrgenov atyndaǵy Qazaq ulttyq óner akademııasynyń mektep-ınternat, kolledj, sondaı-aq Keskindeme, músin jáne dızaın fakýltetiniń professor-oqytýshylary men stýdentteriniń ár alýan taqyryptaǵy eńbekteri kópshilik nazaryna usynyldy. Bul mańyzdy is-sharanyń maqsaty men mazmuny jaıynda О́ner akademııasynyń Tárbıe isi jónindegi prorektory Shyńǵys Qulbekuly:
– Joldaýda aıtylǵan rýhanı qundylyqtardy óner tilimen nasıhattaýdy maqsat tuttyq. Barsha adamzatqa ortaq óner tilimen jetkize bilý – úlken jaýapkershilik. Álemge tanymal sýretshilerimizdiń kórmesi tek el ishimen shektelip qalmaıdy. Italııada, Fransııada osyndaı kórme ótkizemiz. Aıta keter jaıt, kórmege barlyq jerde birdeı dál Almatydaǵydaı jaǵdaı jasala bermeıdi, – dedi.
Jyl saıyn metropolıten aýmaǵynda otyzǵa jýyq túrli mádenı-kópshilik is-shara ótkiziledi. Keskindeme, músin jáne dızaın fakýltetiniń dekany, Qazaqstannyń eńbek sińirgen qaıratkeri, professor Baýyrjan Nurbekuly kórmeni mýzeıde emes, jol torabynda ótkizýdiń ózindik artyqshylyǵy bar ekenin tilge tıek etti.
– Kórmege qoıylǵan óner týyndylary san túrli taqyryptardy qamtydy. Qazir aqparattyń, jarnamanyń zamany. Qarbalas tirshilikten qoly bosamaıtyn qala turǵyndarynda ýaqyt tapshy. Metropolıtende kórme ótkizgendegi maqsatymyz – myń qatparly jer astymen jol júretin jolaýshylarǵa erekshe kóńil kúı syılaý. «Bulaq kórseń, kózin ash» degendeı, jas talanttardy elge tanytý. Kórmege eldigimizdi tanytatyn, ereksheligimizdi aıqyndaıtyn tańdaýly kartınalar qoıyldy. «Astana – ardaǵym» baıqaýynda úzdik dep tanylǵan tańdaýly týyndylardyń deni – bizdiń shákirtterdiń eńbegi. Atap aıtqanda, Qazaqstannyń «100 jańa esim» jobasynda úzdik dep tanylǵan Anar Ábjanovanyń jumystary bir tóbe. Onyń shyǵarmashylyǵynyń basty ereksheligi – taqyryptarynyń san túrliligi, alýan tústi boıaýdy qubylta biletindigi. Ol 2001 jyldan beri respýblıkalyq, halyqaralyq kórmelerge qatysyp júr. Halyqaralyq óner báıgesiniń júldegeri. Týyndylary Qazaqstan, Italııa, Shveısarııa, Fransııa, Túrkııa, AQSh, Japonııada jeke kolleksııalarda saqtalǵan. Onyń Lývr mýzeıine qoıylǵan eńbekteri álem sýretshilerin tańǵaldyrǵan. Bizdiń talantty sýretshilerimizdiń árqaısysynyń orny bólek. Ásirese jastardyń beıneleý ónerin tyń taqyryptarda damytyp jatqandyǵy qýantady. Bolashaqtyń tizgini jastardyń qolynda, – dedi ol oıyn túıindep.
Almatyda kórme ataýly jıi ótedi. Biraq bul kórmeniń artyqshylyǵy – kórkemónerdiń barlyq salasyn qamtýǵa baǵyttalǵandyǵynda. Keskindeme jáne músin kafedrasynyń meńgerýshisi, professor, Kórkemsýret akademııasynyń akademıgi Bolat Turǵymbaevtyń aıtýynsha, tarıhı taqyryptaǵy kórmelerdi ótkizýdiń mańyzy zor.
– Kórme Astananyń 20 jyldyǵyna arnaldy. Kópshilik nazaryna keıingi 5-6 jyl kóleminde salynǵan kartınalar, músinderdi usyndyq. Sýret, músin óneriniń ár baǵytyn qamtydyq. Biri Astananyń kórinisterin, endi biri Elbasynyń bet-beınesin arqaý etti. О́ner óz zamanymen birge damıdy. Qazirgi jastar ınternet arqyly sheteldegi jańalyqtardan jan-jaqty habardar. Bir qýantarlyǵy, qazirgi jastar jańasha oılaıdy. Shákirtterimizdiń jańashyldyqqa umtylysy erekshe, – deıdi ol.
Kórmedegi eń ǵajap degen taqyryptyq týyndynyń biri – «Elbasy» kartınasy. Sýretshi Dáýren Beknazar kartınaǵa búgingi kezeńdi ǵana emes, bederli bolashaqty da beınelegen. «Kartınada táýelsiz el ómiriniń eń jarqyn sátterin qamtýǵa tyrystym. О́tken tarıhty beıneleýmen qatar Elbasynyń bolashaq úshin jasaǵan josparlaryn da áspettedim. Keleshek urpaq úshin jasalǵan jumystardy nasıhattasam deımin. Táýelsizdiktiń árbir jyly tarıh. Maqsatym – Elbasynyń tulǵasyn jan-jaqty etip kórsetý. Sondyqtan kartınanyń ataýyn «Elbasy» dep atadym. Prezıdent beınesiniń tóńiregine Astananyń eń sáýletti ǵımarattarynyń bárin bir kartınaǵa syıdyrý árıne múmkin emes» deıdi «Elbasy» kartınasynyń avtory.
Metropolıtende Astananyń 20 jyldyǵyna oraı uıymdastyrylǵan ádemi bir shýaq shashqan kerim kórmeniń yqylas tanytar keıpi kóz arbaı beredi.
Aıaldamaǵa toqtaǵan elektrovoz sálden soń kelesi stansaǵa qaraı jóńkıdi. Almalyǵa kelgen jolaýshyǵa qushaǵyn aıqara ashqan Astanaǵa arnalǵan ǵajap kórme ózine eliktirip alady. О́nerli jastardyń áspetti shyǵarmalary yntyqtyra túsedi. Aldyńyzda Astananyń araı shashqan aıshyqty kórinisteri kóz arbaıdy eken.
...Kóz aldyńyzda araı shashqan altyn aıdarly Astana.
Saparbaı PARMANQUL,
«Egemen Qazaqstan»
ALMATY
