Qalamgerdiń ekinshi tynysy

О́miri keıingilerge ónege bolarlyq taǵdyrly tulǵalar týraly sóz taýsylmaq emes. Tózimdilik pen eńbekqorlyqty jalaý etip, adaldyq pen shynshyldyqty shyǵarmashylyq izdenisterine arqaý etken qazaqtyń qabyrǵaly qalamgeri, ádebıettanýshy ǵalym, qaıratker tulǵa Nemat Kelimbetovtiń endi, mine, ekinshi ómiri bastaldy desek te bolǵandaı. Aldymen Abaı atyndaǵy Ulttyq pedagogıkalyq ýnıversıtetinde Nemat Kelimbetovke arnalǵan halyqaralyq ǵylymı-teorııalyq konferensııaǵa ótti. Oǵan óz ádebıetshi ǵalym­dary­myzben qatar, sheteldik ǵalym­dar da qatysty. Olardyń ara­synda ádebıetshiniń shyǵarma­laryn túrik tiline tárjimalaǵan Ábdýaqap Qara, qytaı tiline aýdarǵan Beıjiń qalasyndaǵy Ulttar baspasynyń qyzmetkeri Aıqyn Ábikenuly da bar. О́zi kóp jyldar eńbek etken atal­mysh ýnıversıtette Nemat Kelimbetovtiń ǵylymdaǵy súbeli eńbekteri ǵana emes, kisiligi, ómir­men kúresi, táýelsizdik tarıhyna, ádebıetine qosqan úlesi de keńinen sóz boldy. Nemat Kelimbetovti eske alý keshke qaraı M.Áýezov atyndaǵy akademııalyq drama teatrynda jalǵasyn tapty. Teatrda ótken keshtiń uıym­das­tyrýshylary da, kórermenderi de qazaq ulttyq óner akade­mııa­synyń stýdentteri boldy. Aldy­men jastar aldyna Qazaq drama­ teatrynyń jetekshisi Esmuqan Obaev shyǵyp, Nemat Kelimbetovke arnalǵan ıgi sharalardy qysqasha saralap ótti. – Kózi tirisinde Kelimbetov qol arbasymen kelip, ár spektakldi kórýshi edi. Ol keıinnen dramatýrgııaǵa da óz úlesin qosty. Teatrǵa kelgende óz shy­ǵar­malaryndaǵy keıip­kerlerdiń «tirilgenin» spektaklden kórip, qýanyp otyratyn, – dedi ol. Osydan keıin jastar aldyna jazýshy Smaǵul Elýbaı shyǵyp Nemat Kelimbetovtiń kesek tul­ǵasyn sózben somdady. Stýdentterdi shynaıy da taǵy­lymdy taǵdyr úlgisimen uıyta bilgen Smaǵul Elýbaıdyń esteligi T.Júrgenov atyndaǵy Ult­tyq óner akademııasy qoıǵan teatr­landyrylǵan kóriniske ulasty. Munan keıin Nemat Kelimbetov jaıly derekti fılm kór­setildi. Rýhy kúshti adam jaıly bul derekti dúnıeniń de ta­ǵlym alar tusy kóp. Stýdentter Nemat Kelimbetovpen dos-jaran bol­ǵan rýhanı ba­ýyry, Qazaq­stan­nyń halyq ártisi Sábıt Oraz­baevtyń esteligin fılm­nen tyń­dap, ózimen zalda birge otyrdy. Sonymen eske alý keshi onyń   shyǵarmasy boıynsha qoıylǵan «Úmit úzgim kelmeıdi» spektak­li­­niń úzindisimen aıaqtaldy. Iá, taǵdyrly qalamgerdiń naǵyz ómiri endi bastalǵandaı. Aınash ESALI, Almaty.