Foto: Akorda.kz
Kezdesýge Reseı Federasııasynyń Syrtqy ister mınıstri Sergeı Lavrov, Túrkııa Respýblıkasynyń Syrtqy ister mınıstri Mevlıýt Chavýshoǵly, Iran Islam Respýblıkasynyń Syrtqy ister mınıstri Mohammad Djavad Zarıf qatysty.
Áńgimelesý barysynda taraptar Astana alańy formatynda Sırııadaǵy qaqtyǵysty toqtatý jónindegi kelissózderdiń nátıjeleri men perspektıvalaryn talqylady.
Memleket basshysy Astana prosesi arqyly oq atpaý jóninde birqatar ýaǵdalastyqqa qol jetkizilgenin atap ótti.
– Sırııa daǵdarysy biz úshin de, óńirimiz úshin de ózekti bolyp otyr. Urys qımyldary saldarynan 400 myń adam, sonyń ishinde balalar, áıelder men qarttar qaza tapty. Bul qaqtyǵys búkil óńirde qolaısyz ahýal týǵyzdy. Degenmen, Astana prosesi Sırııadaǵy soǵys pen qantógisti tezirek toqtatýǵa degen úmitti uıalatty. Astana kelissózderi Jeneva prosesin jandandyrdy, – dedi Qazaqstan Prezıdenti.
Nursultan Nazarbaev óńirde bitimgershilik ornatý jónindegi BUU Qaýipsizdik Keńesiniń qararyn Qazaqstannyń qoldaǵanyn aıtty.
Reseı Syrtqy ister mınıstri Sergeı Lavrov Astanada kelissóz alańyn usynǵany úshin Qazaqstan Prezıdentine alǵys aıtyp, Sırııadaǵy qaqtyǵysty sheshý joldaryn izdestirýdiń mańyzdylyǵyn atap ótti.
– Shyǵys Gýtada sońǵy eki kúnde 20 myńǵa jýyq beıbit turǵyn osy aýmaqtan shyǵýǵa múmkindik aldy. Biz qazir Birikken Ulttar Uıymymen birlesip, olardy ýaqytsha qonystanǵan jerinen óz úılerine oralǵanǵa deıin qajetti zattarmen qamtamasyz etý máselesin sheship jatyrmyz, – dedi Reseı Syrtqy ister mınıstri.
S.Lavrov Astana kelissózderi Sırııadaǵy qaqtyǵysty retteý joldaryn izdestirýge septigin tıgizgenin atap ótti.
– Astana barsha jurt moıyndaǵan proseske bastamashylyq etti. Eń bastysy, Astanadaǵy kelissózder Sırııa qaqtyǵysy aıasynda barlyq baǵyttaǵy kúsh-jigerdi jumyldyra bildi. Bul degenimiz – terrorızmge qarsy kúres júrgizý, deeskalasııa aımaqtaryn qurý. Urys qımyldaryn toqtatý rejimi zorlyq-zombylyq deńgeıin aıtarlyqtaı tómendetýge múmkindik berdi. Sondaı-aq, bul gýmanıtarlyq máselelerdi tıimdirek sheshý degen sóz, – dedi Reseı Syrtqy ister mınıstri.
Sergeı Lavrov kelissózderdiń joǵary deńgeıde uıymdastyrylǵanyna toqtalyp, Astana alańynyń qolaıly saıası ahýal qalyptastyrý isindegi mańyzdylyǵyn aıtty.
– Janjaldasýshy taraptardy bitistirýge baǵyttalǵan Astananyń berik ustanymy jáne kelisimge kelý joldaryn tabýdy kózdeıtin Qazaqstannyń syrtqy saıasaty bizge tıimdi jumys isteýge septigin tıgizýde, – dedi Reseıdiń Syrtqy ister mınıstri.
Túrkııanyń syrtqy saıasat vedomstvosynyń basshysy M.Chavýshoǵly Astana prosesiniń tıimdiligine toqtalyp, kelissóz júrgizýdiń osy formatyn qoldaıtynyn atap ótti.
– Astanadaǵy kelissózderdiń bastalǵanyna da bir jyldan asty. Biz osy prosess barysynda úlken jetistikterge jetip, alǵa jyljı aldyq. Keshe Astanada senim sharalary jónindegi jumys toby birinshi ret kezdesý ótkizdi. Onda kepilge alynǵandar men tutqyndardy ózara almasý máselesi qarastyryldy. Astana alańyna tán osyndaı qarqyndy saqtap qalǵymyz keledi. Biz bul prosesti ilgeriletýge tyń serpin bere aldyq, – dedi Túrkııanyń Syrtqy ister mınıstri.
Sonymen qatar M.Chavýshoǵly Sırııadaǵy qaqtyǵystyń saıası sheshimin izdeý qajettigin aıtty.
Irannyń Syrtqy ister mınıstri Mohammad Djavad Zarıf Shyǵys Gýtadaǵy problemalardyń bar ekenine qaramastan, taraptar Sırııadaǵy qaqtyǵys pen zorlyq-zombylyq deńgeıin tómendetkenin atap ótti.
– Shyǵys Gýtada jaǵdaıdyń ýshyqqanyna qaramastan, keıbir gýmanıtarlyq máselelerdi sheshe otyryp, ahýaldy birshama jumsarttyq. Sırııadaǵy beıbit turǵyndar qorǵaýǵa alyndy. Biz keshe taraptar arasynda senim sharalaryn nyǵaıtý jónindegi jumystardy bastadyq, – dedi Irannyń Syrtqy ister mınıstri.
Mohammad Djavad Zarıf Sırııadaǵy daǵdarysty retteýdiń saıası joldary men ustanymdaryn qalyptastyrý isinde Astana alańynyń mańyzy erekshe ekenin atap ótti.
