Foto: Akorda.kz
Memleket basshysy Qazaqstan halqynyń jáne jeke óziniń atynan Sı Szınpındi Qytaı Halyq Respýblıkasynyń Tóraǵasy laýazymyna qaıta saılanýymen quttyqtady.
Qazaqstan Prezıdenti bul oqıǵany eldiń ulttyq múddesin ilgeriletý isine zor úles qosqan Sı Szınpınge Qytaı halqynyń joǵary baǵasy retinde atap ótti.
– Qytaı Sizdiń basshylyǵyńyzben ortasha aýqatty qoǵam qurý jolynda budan da bıik shyńdardy baǵyndyratynyna senimdimin. Keleshekte Qazaqstan men Qytaıdyń túrli salalardaǵy strategııalyq áriptestigi qarqyndy damı beretinine jáne halyqtarymyzdyń dostyǵy odan ári nyǵaıa túsetinine esh kúmánim joq. Osyǵan oraı ózara senim men túsinistikke negizdelgen bizdiń jeke dostyǵymyzdyń mańyzy erekshe. Aramyzdaǵy qarym-qatynastarymyz ben birlesken jumysymyz keleshekte Astana men Pekınniń jemisti yntymaqtastyǵynyń berik tiregi bolatynyna kámil senemin, – delingen jedelhatta.
Nursultan Nazarbaev Sı Szınpınge zor densaýlyq, baq-bereke tilep, dostas Qytaı halqynyń órkendeýi men damýyna nıettestik bildirdi.
