Jumys sapary barysynda birqatar óndiristik nysandarǵa barý josparlanyp otyr, olardy mysalǵa ala otyryp, QR Premer-Mınıstrine óńirde ındýstrııalyq-ınnovasııalyq damý, «Nurly Jer», agroónerkásiptik keshendi damytý sekildi memlekettik baǵdarlamalardyń iske asyrylý qarqyny týraly baıandalady, sondaı-aq Indýstrııa 4.0 elementterin engizý nátıjeleri usynylady.
Kestedegi negizgi is-sharalar — bıznes ókilderimen, oblystyń jumys aktıvimen, aýyl sharýashylyǵy taýaryn óndirýshilermen, densaýlyq saqtaý qyzmetkerlerimen jáne stýdent jastarmen kezdesýler bolady.
Atap aıtqanda, «Jabaı ata» JShS jáne «Saryaǵash jer syıy» JShS agroónerkásiptik kásiporyndaryn aralaý qorytyndysy boıynsha Baqytjan Saǵyntaev aýyl sharýashylyǵy taýarlaryn óndirýshilermen AО́K memlekettik baǵdarlamasyn jáne Prezıdenttiń «Shaǵyn nesıe berýdi kóbeıtý» tórtinshi áleýmettik bastamasyn iske asyrý máselelerin talqylaıdy.
Oblystyq klınıkalyq aýrýhananyń jańartylǵan ınfraqurylymymen tanysqannan keıin ótetin dóńgelek ústelde óńirdiń densaýlyq saqtaý júıesin jańǵyrtý jáne salany qaıta retteý sharalary, MJÁ jáne jeke qyzmetter sektoryn damytý máseleleri egjeı-tegjeıli qaralady.
Shymkenttiń JOO-lary men kolledjderiniń basshylyǵy men stýdentteri, stýdenttik uıymdardyń kóshbasshylary QR Premer-Mınıstri Baqytjan Saǵyntaevpen Prezıdenttiń bes áleýmettik bastamasyn iske asyrý aıasynda joǵary bilimniń qoljetimdiligi men sapasyn arttyrý, stýdentterdiń jataqhanada turý jaǵdaılaryn jaqsartý jónindegi jańa quraldardy talqylaıdy.
Sapar sońynda oblystyń jumys aktıvteri men bıznes ókilderimen kezdesý ótedi. Kún tártibinde: óńirdi áleýmettik-ekonomıkalyq damytý máseleleri, onyń ishinde ınvestısııalar tartý, ShOB damytý, ındýstrııalandyrý, tehnologııalyq jańǵyrtý jáne Indýstrııa 4.0, sıfrlandyrý, jumys oryndaryn ashý jáne ózin-ózi jumyspen qamtyǵandardy resimdeý máseleleri.
