Astanada ótken bul jıyndy ashqan ári júrgizip otyrǵan Ortalyq Azııa óńirindegi Etnosaralyq jáne konfessııaaralyq qatynastardy zertteý ortalyǵynyń basshysy, QHA Ǵylymı-sarapshylyq keńesiniń tóraǵasy Aıgúl Sádýaqasova Elbasynyń bes bastamasy halyqtyń ál-aýqatyn áleýmettik jobalar arqyly jaqsartýdyń basty qazyǵy bolǵanyn aıtyp, bul eldiń damý baǵdaryna tyń serpin bergenin atap ótti. Sondaı-aq ol mundaı aýqymdy áleýmettik jobalardy júzege asyrýǵa QHA Ǵylymı-sarapshylyq keńesi de ún qosyp, memlekettiń halyq aldyndaǵy mindettemelerin utymdy oryndaý baǵytyndaǵy sharalardy talqylaýdy maqsat etkenin jetkizdi.
Budan keıin Qazaqstan halqy Assambleıasy Hatshylyǵynyń sektor meńgerýshisi Azat Joldybaev sóz sóılep, memlekettik mańyzdy baǵdarlamalardyń iske asyrylýyna Assambleıa da ózindik úlesin qosyp kele jatqanyn atap ótti. Ol Elbasy Nursultan Nazarbaevtyń Assambleıanyń rólin kúsheıtip, etnosaralyq qarym-qatynastardy retteý úshin «Qazaqstan halqy Assambleıasy týraly» zańǵa ózgerister men tolyqtyrýlar engizý týraly tapsyrma bergenin eske alyp, osyǵan baılanysty zań jobasy kúni keshe Májilistiń alǵashqy oqylymynda maquldanǵanyn jetkizdi.
Jıynda «Atameken» ulttyq kásipkerler palatasy departamentiniń dırektory Baýyrjan Orazǵalıev Prezıdenttiń bes áleýmettik bastamasynyń biri – shaǵyn nesıe berýdi kóbeıtý máselesine toqtaldy. Ol 2017 jyly jalpy somasy 32 mıllıard teńge bolatyn 7200 shaǵyn nesıe berilgenin atap ótip, sońǵy jyldary kásibin ashqysy kelgen jandarǵa memleket tarapynan qoldaý kóbeıip jatqanyn atady. Jastarǵa kásipkerliktiń qyr-syryn úıretip, bilim sapasyn arttyrý úshin Ulttyq kásipkerler palatasy Bilim jáne ǵylym mınıstrligimen birlesip, 2 myńǵa jýyq oqý baǵdarlamasyn zertteýdi bastapty. Qazirgi tańda sonyń 700-ge jýyǵy jan-jaqty zerttelip, tıisti usynystar berilgen. Aldaǵy ýaqytta bilim sapasyn arttyrýǵa arnalǵan baǵdarlamalarǵa halyqaralyq sarapshylardy tartý máselesi de kózdelip otyr.
Budan keıin «Bastaý Bıznes» jobasy týraly aıtqan B.Orazǵalıev bul baǵdarlama negizinen áleýmettik jaǵdaıy tómen jáne ózin-ózi jumyspen qamtyp júrgen azamattarǵa arnalǵanyn atap ótti.
«Bastaýǵa», ásirese aýyl turǵyndarynyń qyzyǵýshylyǵy joǵary eken. Osy baǵdarlamadan ótken azamattardyń 60 paıyzy óz isin ashýǵa degen yntasy oıanyp, kásipkerlikpen aınalysýǵa qulshyna kirisetin kórinedi. Bul bizdiń boljamymyzdan birneshe ese kóp kórsetkish. Endi bıyl qosymsha 20 mıllıard teńge bólip, shaǵyn nesıelerdiń jalpy somasyn 62 mıllıard teńgege jetetin bolsa, bul násibin kásipten tapqysy keletinderge úlken kómek, deıdi B.Orazǵalıev.
Ǵylymı-sarapshylyq keńestiń otyrysynda Prezıdenttiń basqa da áleýmettik bastamalary talqylanyp, qatysýshylar jobalardy júzege asyrýǵa baılanysty oılaryn ortaǵa saldy.
Qymbat TOQTAMURAT,
«Egemen Qazaqstan»
