Memleket basshysy usynǵan bes bastamanyń alǵashqysy – elimizdiń ár otbasyna baspana alýǵa múmkindik beredi. Turǵyn úıge qoljetimdilik – búgingi kúnniń ótkir máselesi. Atyraý oblysynda ótken jyly 624,1 myń sharshy metr turǵyn úı paıdalanýǵa berildi, bul aldyńǵy jylmen salystyrǵanda 11,7 %-ǵa artyq. Qazir aımaqtaǵy memlekettik turǵyn úı qorynan turǵyn úıge muqtaj azamattar sany 24,7 myń adam bolyp otyr. Onyń 19,4 myńy – Atyraý qalasynyń úlesinde. Bul munaıly óńirde turǵyn úı qurylysy boıynsha aýqymdy mindetterdiń turǵanyn jáne atqarylatyn sharalardyń kóp ekenin kórsetedi. Aımaqta turǵyn úı qurylysynyń qarqyn alýymen kásipkerlik nysandarynyń qatary kóbeıip, jańadan jumys oryndary ashylady, adamdardyń baspanaly bolý múmkindigi artyp, demografııalyq saıasatqa da oń yqpalyn tıgizedi.
Halyqqa arnaǵan Elbasy Úndeýiniń ekinshi bastamasynda jalaqysy tómen jumysshylardyń eńbekaqysyn kóbeıtý úshin olardyń salyq júktemesin 10 esege azaıtý kózdelgen. Munyń ózi halyqtyń áleýmettik jaǵynan álsiz toptaryna jatatyn bóliginiń turmys jaǵdaıyn jaqsartýǵa baǵyttalǵan qoldaý dep túsingen jón.
Úshinshi bastama halyqtyń joǵary bilim alýyna jaǵdaı jasaý, sapaly mamandyq ıelerin daıyndaý men stýdentterdiń jataqhanadaǵy jaǵdaıyn jaqsartýǵa baǵyttalǵan. Ásirese stýdentterge arnalǵan qosymsha granttar kólemin ulǵaıtý jáne olardy jataqhanamen qamtamasyz etý ózekti máseleniń biri bolatyn. Prezıdent bastamasynda keler oqý jylynda memleketten qosymsha 20 myń grant bólýdi tapsyrdy. Munda eń aldymen ınjenerler, aqparattyq tehnologııa, nanotehnologııa salasynyń mamandaryn daıyndaýǵa basa nazar aýdarylady. Bul bastama Tórtinshi ónerkásiptik revolıýsııa jaǵdaıynda jańa ekonomıkaǵa qajet mamandar daıyndaýǵa múmkindik beredi. Bul da jastarǵa memleket tarapynan jasalatyn qamqorlyqtyń aıqyn kórinisi.
Joǵary bilim alýdyń qoljetimdiligi men sapasyn arttyrý baǵytynda oblysta josparly jumystar jasalyp ta jatyr. Qazir aımaqtaǵy úsh joǵary oqý ornynda 12 myń stýdent bilim alady. 1,6 myń stýdent jataqhanamen qamtylǵan. Al 312 stýdenttiń jataqhanamen qamtamasyz etý jónindegi suranysyn qanaǵattandyrýǵa múmkindik bolmaı otyr. О́tken jyly jergilikti bıýdjet esebinen bólingen bilim berý grantyna 750 úmitker qatysyp, irikteý nátıjesinde 222 stýdent bilim berý grantyna ıe boldy.
Aıta ketý kerek, oblystyń 25 tehnıkalyq jáne kásiptik bilim berý oshaqtarynda 17 myńnan astam stýdent oqıdy. On kolledjde jataqhana bar. Eki myńǵa jýyq stýdent jaldamaly páterlerde turady. Stýdentterdiń turmys jaǵdaıynyń tómendigi olardyń bilim alý sapasymen qatar densaýlyǵyna da áser etedi. Osy máseleni sheshý úshin D.Nurpeıisova atyndaǵy mýzykalyq kolledjdiń 100 oryndyq jataqhanasynyń jáne Aqqystaý aýylynda 100 oryndyq jataqhanasy bar 320 oryndyq kásiptik tehnıkalyq kolledjdiń qurylysy júrýde. Bes tehnıkalyq jáne kásiptik oqý ornynyń jataqhanasy qurylysynyń qajetti qujattamalary jasaqtaldy. Bıyl «Teńizshevroıl» JShS «Igilik» baǵdarlamasy arqyly Atyraý qalasynda agrotehnıkalyq kolledjge 150, energetıka jáne qurylys kolledjine 100 oryndyq jataqhana qurylysyn salý josparlanýda.
Halyqqa jarııa etilgen Úndeýdegi tórtinshi bastama shaǵyn nesıe berý máselesine arnalǵan. Bıyl «Bıýdjettiń jol kartasy-2020» baǵdarlamasy boıynsha bıýdjetten 1 980 mln teńge bólindi, qosymsha respýblıkalyq bıýdjetten 590 mln teńge qarastyrylýda. «Jappaı kásipkerlikti damytý» aıasynda qaladaǵy kásipkerlerdi nesıeleýge 253 mln teńge bólinip, 24 joba qarjylandyryldy. Aýyl kásipkerlerin qoldaý maqsatynda da óńirlik baǵdarlama bar.
Elbasy Úndeýinde atap kórsetkendeı, bul – eldiń ıgiligine arnalǵan utymdy ári optımıstik joba. «О́rkendegen Qazaqstan – bul, eń aldymen memleketi ózin qorǵap, qoldaıtynyn, qamqorlyq jasaıtynyn sezinetin, tıisinshe elin jan-júregimen súıetin, patrıottyq tanytatyn ózderine senimdi adamdardyń mekeni dep sanaımyn» dedi Nursultan Nazarbaev.
Oblystyń barlyq deńgeıdegi depýtattary da óz qyzmetterinde Elbasy bastamalaryn baıandy etýge bar kúsh-jigerin salyp, memleket tarapynan jasalǵaly jatqan osy qamqorlyqtardy halyqqa keńinen nasıhattaýda belsendilik tanytady degen senimdemin. Osyndaı aýqymdy áleýmettik jobalardy elimizdiń tynyshtyǵy men birligi turaqty bolǵan jaǵdaıda ǵana iske asyrýǵa bolady.
О́mirzaq ZINÝLLIN,
Atyraý oblystyq máslıhatynyń hatshysy
