Udaıy qamqorlyq úshin aq alǵys

Memleket basshysy Nursultan Nazarbaevtyń atyna el óńirlerindegi kolledjder men kásiptik lıseıler dırektorlar keńesi tóraǵalarynan hat keldi, dep habarlady Qazaqstan Respýblıkasy Prezıdentiniń baspasóz qyzmeti. Hat avtorlary Qazaqstannyń tehnıkalyq jáne kásiptik bilim berý uıymdary atynan Prezıdentke elimizdegi ǵylym men bilimdi damytý máselesinde kór­set­ken udaıy qamqorlyǵy úshin alǵystaryn bildiredi. Hatta eldiń tehnıkalyq jáne kásiptik bilim berý júıesi edáýir ózgeristerge túskeni atap ótilgen. Memleket qazaqstandyq jas­tar­dyń anaǵurlym sapaly tehnı­ka­lyq jáne kásibı bilim alyp shy­ǵyp, eńbek naryǵyna beıimdelýi úshin qajetti jaǵdaıdy jasaýda. Postkeńestik keńistikte Qazaq­stan bilim salasynda, álemdik bilim berý júıesine kirigýde re­formalardy tereńdete júrgizýde jáne qarqynyn arttyrýda alǵash­qy orynda keledi. Bilim berý me­kemeleriniń sany artýda, kásiptik lıseıler ashylýda, Astana, Al­ma­ty, Aqtóbe, Shymkent qala­la­rynda álemdik deńgeıdegi kolledjder qurylysy josparlanýda. Hat avtorlary Prezıdenttiń tapsyrmasynda mamandarǵa su­ranysty anyqtaıtyn, óndiristik tájirıbeni uıymdastyrýǵa, sheberler men oqytýshylardy ón­diriste taǵylymdamadan ótkizýge, túlekterdi jumysqa ornalas­ty­rý­ǵa naqty kómekter kórsetetin ulttyq, salalyq jáne óńirlik keńester, «Kásipker» Holdıngi» AQ qurý, bilim berý memlekettik baǵdarlamasyn iske asyrý máse­leleri kórinis tapqanyn atap ótken. Memleket basshysynyń tehnıkalyq jáne kásibı bilim berý júıesine kórsetken únemi qoldaýynyń arqasynda bilim berý mekemeleriniń ınnovasııalyq qyzmeti jan­danyp, tek áleý­mettik seriktestik nazaryn ǵana emes, sondaı-aq sheteldik ınvestorlar naza­ryn aýdarýda. «Qurmetti Nursultan Ábish­uly! Tehnıkalyq jáne kásiptik bilim berý qyzmetkerleri Sizdiń úlken saıası bıikterdegi jetistikke toly eńbek jolyńyz metal­lýrg mamandyǵy boıynsha ju­mysqa aralasýdan bastaý aldy. Sizdiń eńbektegi ómirbaıanyńyz jastar úshin zor úlgi-ónege bo­lyp tabylady. Kez kelgen eldiń ekonomıkasynyń damýyndaǵy ne­gizgi nárse adam eńbegi bolǵan jáne bolyp ta qala beredi. Eń­bektiń mánin, eńbek adamyn ulyqtaý maqsatynda biz 2012 jyldy «Eńbek adamynyń jyly» dep jarııalaýdy usynamyz. Biz Sizdi elimizdegi tehnıkalyq jáne kásibı bilim berý júıesiniń úlken áleýeti, myqty shyǵar­mashylyq baǵyty, patrıottyq rýhy bar dep sendiremiz. Biz Qazaqstandy ındýstrııalandyrý, ınnovasııalyq ekonomıka úshin, bolashaǵy mol kásibı ma­mandardy daıarlaý úshin barlyq kúsh-jigerimizdi jumsaı­myz jáne Sizdiń senimińizdi aqtaımyz!», delingen hatta. Hat avtorlary arasynda – Balqııa Pishenova, Ysqaq Nur­muhanbetov, Jantileý Azıshanov, Aqnur Eslıamova, Baǵdagúl Jar­maǵambetova, Jaqsybaı Qa­sym­bek, Halıdolla Taıpanov, Shal­qyma Qurmanalına, Zeken Rahımov, Serikbol Shatınov, Sa­tybaldy Baıǵabylov, Hamıtjan Orymbaev, Nurlan Aq­dáý­letov, Anna Ýshakova, Qabylqaq Qa­penov, Jeńis Ábilmájın, Jeńis Babjanov, Erkin Sat­qanbaev bar.