Jıyn barysynda Qoǵamdyq densaýlyq saqtaý komıteti tóraǵasynyń orynbasary Berik Sharıpov BAQ-ta Batys jáne Shyǵys Qazaqstan oblystarynda dári-dármekpen qamtamasyz etýdegi kidiris máselesi kóterilgenin jetkizdi.
«Qazirgi tańda qazaqstandyqtardy ambýlatorlyq dári-dármekpen qamtamasyz etý úshin tizimge engizilgen barlyǵy 494 dárilik zattar men medısınalyq maqsattaǵy buıymdardyń 430 ataýy satyp alyndy. Biryńǵaı dıstrıbıýtor tizimi boıynsha stasıonarlyq jáne ambýlatorlyq dári-dármekpen qamtamasyz etýdiń jalpy kóleminiń 95 paıyzy ambýlatorlyq jáne stasıonarlyq dári-dármekpen qamtamasyz etý úshin barlyǵy 1040 dana satyp alyndy. Áli de 66 preparat satyp alynǵan joq. Biraq olarǵa shekti baǵalar qaıta qarastyrylyp, satyp alý qaıtadan jarııalandy», dedi spıker.
Sonymen qatar ol Batys Qazaqstandaǵy jaǵdaı boıynsha baıandama jasap, qazir BQO-da ambýlatorlyq ta, stasıonarlyq ta dári-dármekpen qamtamasyz etý úshin dárilik zattardyń barlyq qajetti qorlary bar ekenin jetkizdi.
«Qańtar jáne aqpan aılaryna qajettilik boıynsha satyp alynǵan preparattar tolyq kólemde jóneltildi. Qazir naýryz aıyna qajettilikti dárihana pýnktterine jóneltý jalǵasýda. Sol jerden dáriler pasıentterge beriledi. Qazirgi ýaqytta 2018 jyldyń alǵashqy úsh aıynda ambýlatorlyq dári-dármekpen qamtamasyz etýge jalpy somasy 606,1 mln teńgeni quraıtyn 246 dárilik zattar jáne medısınalyq maqsattaǵy buıymdar ataýy tústi. Bul soma oblystyń dárilik zattarǵa suranysynyń jalpy kóleminiń 63 paıyzyn quraıdy. Sonyń ishinde qant dıabetin emdeý úshin aımaqqa 34 mln teńge turatyn dári-dármekter jóneltildi», dep atap ótti ol.
Raýan QAIDAR,
«Egemen Qazaqstan»
