Bas shyrsha shamdary shýaq shashty

Keshe keshqurym Aqordanyń aldyndaǵy alańda Memleket basshysy Nursultan Nazarbaevtyń qatysýymen elimizdiń Bas jańajyldyq shyrshasyn jaǵý rásimi ótti. Bas shyrshanyń san alýan shamdary jarqyraı janyp, ony qyzyqtaýǵa úsh myńǵa jýyq bala men eresek jınaldy. Bul kúni elorda erekshe nurǵa malynyp, naǵyz merekelik shat­tyq­qa endi. El Táýelsizdiginiń aı­týly belesin aıshyqtaıtyn pannolar, uran sózder kóshelerge ilinip, mereıtoı árin asha tústi. El tilegi maqsattas, múddeles ekenin osydan-aq ańǵarýǵa bolady. Astana turǵyndary men qo­naq­tary aldynda sóılegen só­zin­de Prezıdent Aqorda aldyndaǵy Qazaqstannyń basty alańynda jańajyldyq shyrshany jaǵý sal­tanaty jyldaǵy dástúrge aı­nalǵanyn, Bas shyrsha shamdary janǵannan keıin elimizdiń bar­lyq jerlerinde ornalasqan shyr­shalardyń shamdary birge tu­ta­natynyn atap kórsetti. – Bıylǵy jyl – elimiz úshin erekshe jyl. Ol el Táýel­sizdi­gi­niń 20 jyldyǵyn merekeleý qarsańynda ótip otyr. Bul – bárimiz úshin aıtýly mereıtoı. Jańajyldyq mereke – bul ertegideı kórinetin, armandary or­yn­dalatyn, bolashaqqa jospar qu­ratyn árqashan balalardyń merekesi. Biz sender úshin eńbek ettik, senderdiń baqytty bolýlaryń úshin jumys istedik. Senderdiń mindetteriń – jaqsy oqý, bizdiń uly Otanymyzdyń laıyqty aza­maty bolý. Biz jıyrma jyl­dyq­ty merekeleımiz, tabystardy atap ótemiz. Bolashaqqa jospar qu­ramyz. Al, bizdiń bolasha­ǵy­myz – sendersińder. Senderge, bizdiń balalarymyzǵa men jańa jylda mol baqyt, myqty den­saý­lyq tileımin. Bizdiń elimiz gúl­dene bersin, bizdiń balalarymyz baqytty bolsyn, – dedi Nur­sultan Nazarbaev. Prezıdent barsha qazaqstan­dyq­tarǵa jańa tabystar, zor den­saýlyq, baqyt jáne ıgilik tiledi. Bıiktigi 25 metrdi quraıtyn, 2 myńnan astam oıynshyqtarmen, 925 stroboskoppen, 345 jaryq dıodty qar ushqyndarymen bezendirilgen Bas shyrshanyń sham­da­ry samaladaı jarqyrap, nu­ryn tógýi muń eken, aınala júz­derin aıaz súıip, sýyq sorǵan búl­dirshinderdiń syńǵyrlaǵan kú­mis kúlkilerine, shat-shadyman áýenge tolyp sala berdi. Myń buralǵan bıler sahna sánin keltirdi. Ásem án áýelep, Astana kóginde qa­lyq­tady. Aıaz Ata men Aqshaqardyń qatysýymen teatrlandyrylǵan kó­rinis qoıyldy. Ertegiler keıipkerleri kesh shyraıyn asha tústi. Elbasymen birge Bas shyr­sha­ny jaǵý qurmetine ıe bolǵan ba­lalardyń kóńilderi kóterińki. So­lardyń biri Indıra Sárke­no­va­ny áńgimege tarttyq. J.Jabaev atyndaǵy №4 mektep-gımnazııa­nyń 5 synyp oqýshysy mundaı qyzyqqa alǵash qatysyp otyr­ǵa­nyn, ózin shyn baqytty sezinetinin shattyqpen jetkizdi. Al Astana qalalyq bilim bas­qarmasynyń qyzmetkerleri Táý­el­sizdik merekesine úlken ázir­lik­ter jasap jatqandaryn, búgingi sharaǵa myńdaǵan oqýshylardyń belsene atsalysqandaryn, kóp balaly otbasylardyń, ata-ana­nyń qamqorlyǵynsyz qalǵan bir myńdaı balaǵa Prezıdent syı­ly­ǵy tapsyrylǵanyn atap kór­setti. Maqpal túndi samaladaı jar­qy­ratyp turǵan Bas shyrshamen birge Astanada 30 jańajyldyq shyrsha ornatylyp, shamdary bir sátte jarqyrady. Aqorda aldyn­daǵy alańda ótken jańajyldyq shyrshanyń jaǵylýy merekelik otshashýǵa ulasty. О́mir ESQALI, Sýretterdi túsirgender S.BONDARENKO, B.OTARBAEV.