Ardagerler júregindegi «Aqbulaq»

Zerendi baǵytyndaǵy saıajaıda burynǵydaı qalyń kisi joq. Kórshilerimiz de seldirep qal­ǵan. Daǵdarysqa qaramaıtyn qarııalar ǵana. Janymyzdaǵy Jaqsylyq aǵa Baımenov tań qy­lańynan kesh qaraýytqanǵa deıin qybyr-qy­byr­dan bir tynbaıdy. Qolynan kelse «alty so­tyǵyn» ósimdik pen shóp-shalamnyń neshe túri­ne toltyryp qoıǵysy bar. Keı-keıde aǵash shar­baǵyna súıenip, bergi jaqtaǵy bizge aqyl-keńes áńgime aıtady. Onysy el men álem ja­ńa­lyqtaryna oıysyp ketetinin ańǵarmaıdy da... Baıqaımyn, Jaqsy-aǵamnyń jumysy búgin ónińkiremeı júr. «Ahylap» anda-mynda oty­ry­sy kóbeıdi. «Ne boldy?» degenime jóndi jaýap joq. Saǵatyn sońǵy avtobýspen esepteıtin Jákeń kún eńkeımeı shuǵyl jınala bastady. – Oý, qaıda barasyz? – Qurysyn, búgin demalamyn. Erteń de túske deıin kelmeıtin shyǵarmyn. «Aqbulaqqa» kirip shyǵýym kerek, – deıdi júzi synyqtaý aǵam. «Aqbulaqqa» meniń de barǵym keldi. Qala­lyq ardagerler keńesiniń janynan qurylǵan klýb týraly estýim barshylyq. Zeınetkerlikke shyqqanyna eki jyl endi bolǵan Jáke ózin áli jas sanaıtyndyqtan, bul baǵytta kóp áńgime qozǵamaıtyn. Búgingi qylyǵy aǵamyzdyń bul ordaǵa bizden «jasyrynyp» baryp turatynyn áshkerelep qoıǵandaı. Kezekti eńbek demalysynda júrgendikten, «Aqbulaqtyń» esigin asyqpaı qaqqanymda ardagerler keńesiniń tóraǵasy Rústem Sherııazdanov Jákeńdi minberge shaqyrǵan tus eken. «Mun­da qaıdan júrsińdi?» jarq etken jana­ry­men uǵyn­dy­ryp, qoqılanyp qaldy. Biraq, sol zamatta aı­yp­ty bolǵan balanyń keıpine túsip, sonsha­lyq­ty bııazy únmen sóz bastady. Son­da­ǵy­sy, men úsh­in, áńgime etýge de turmaıtyndaı másele bo­lyp kórindi. Qysqasha aıtqanda, saıa­jaı­dyń al­ǵash­qy ónimin jınaǵan aǵamyz al­dyń­ǵy kúni úıi­ne arqalanyp keledi. Ju­mys­bas­tylar bul oqı­ǵa­ǵa jetkilikti mán bere qoı­ma­ǵan. Onyń ústine, ájeptáýir jastaǵy (6 jasta) nemeresi búıiri qa­raýytqan almany bir tistep, laqtyryp jiberipti. Mine, bar másele osy. Biraq, «bolmaıtyndy aı­tady ekensiń» dep qolyn silteı salatyndar kórinbedi. Májilishana tym-tyrys, bólmeni kúz­gi bulttardan da aýyrlaý qalyń oı basyp qalǵandaı edi. Tynyshtyqty klýb jetekshisi Valentına Alek­seevna Solomınanyń qarlyǵyń­qy daýsy buzdy. – Al, ne deısizder? Oblystyq «Kókshetaý» gazetinde 40 jyldan astam qyzmet jasaǵan Kenjetaı Gazızov aǵamyz «Bul bárimizdiń basymyzda bar jaǵdaı. «Kóńil bir atym nasybaıdan qalady» degen bar. Áıtkenmen, urpaq tárbıesiniń bir ushy ózimizge tıetinin eskerýimiz kerek»,-deýi muń eken, qyp-qyzyl pikirtalas bastaldy da ketti. Kókshelik qarııalardyń tereńdigine, máse­le­ni mańyz bere tolǵaıtyndyǵyna qaıran qalýǵa bolady. Ne aıtylmady deısiz. Saıajaıdyń tóńi­re­ginde kóp másele bar eken. Ol otbasynyń myz­ǵymastyǵyn, jarastyǵyn nyǵaıtýǵa, eńbek uǵymyn ulyqtaýǵa qyzmet etedi. Bul oraıda aıyptylardy únemi aınaladan izdeý, orynsyz kinámshildik tanytý durys emes. Onyń aqyry týysqandaryńnyń saıajaıdan múldem bas tartýyna alyp keletindigi týraly mysaldar keltirildi. Urpaqtar kelispeýshiligi men araz­dy­ǵy da osydan qylańdaıtyn jaǵdaılar kezdesedi eken. Munda kez kelgen jastaǵy adamnyń minez-qulyǵy, ózin ustaı bilýi, sóz saptaýy, shydamdylyǵy synǵa túsetini aıtyldy. Jurt arasynda «halyqaralyq taqyryptaǵy lektor» atanyp ketken J.Ǵabdýlkafeev aq­sa­qal: «Saıajaıdy qarttardyń ýaqyt ótkizý orny, kúnkóris kózi deýimiz birjaqty túsinik, deıdi. Bul qoǵam ıgiligine, odan asyryp aıtsaq, jas urpaqty eńbekke, tirshilik qundylyqtaryn aı­qyn­daýǵa baǵyttalǵan qyzmet. Saıajaılardyń qırap, balalardyń, tipti orta jastaǵylardyń oǵan aıaq baspaıtyndyǵy bılik basyn­da­ǵy­lar­dy qatty oılantýy qajet». Onyńyz ras, deıdi Marııa Nekrasova apaı. Bizdiń úıge kelgen qonaqtardyń biri men pisirgen qýyrylǵan orama qyryqqabatty maqta­ǵan­da tóbem kókke jetip qaldy. Biraq, saıajaıda ósi­rilgendigine senińkiremeı, «bazardan ala salmadyńyz ba» dep janashyrlyq tanytqandaı boldy. Búgingi adamdarǵa qaıran qalýdyń qajeti joq. Balalar da, jastar da saıajaıǵa bar­ǵysy, kómekteskisi keledi, kóbisi onda bar­ǵan. Áıtkenmen, kóńil qynjyltarlyq jaǵdaı­lar­dyń teris yqpalyn kórip júrsizder. Avtobýstar qozǵalys kestesin saqtamaıdy, kerekti aıaldamańa syǵylysyp, júregiń qaǵyp, silikpeń shyǵyp salbyrap túsesiń. Jolaqysynyń jeńil­digi de joǵaldy. Kooperatıvterdiń basshylary shybyq basyn syndyrýdy qoıdy. Tonaýdan, búldirýden kóz ashpaısyń. Saıajaıda bir aýyq demalýdyń ornyna qapalanyp, dińkelep qaıta­syń. Azyq-túlik baǵasyn turaqtandyramyz deıtin jergilikti bılik oryndary muny bilmeıdi emes. Men qalalyq ákimdikke arnaıy hat ázirlep, shuǵyl betburys jasaýdy talap etý týraly usynys aıtqym keledi. Dý-dýdyń arty dereý hattama toltyryp, usynysty resimdeýmen aıaqtaldy. Otyrys aqy­ryn-aqyryn kúndelikti tirshilik aýanyna arna bura bastady. Osydan týra 11 jyl buryn qurylǵan kóp salaly «Aqbulaq» klýbynyń ozat tájirıbesi 2003 jyldan beri respýblıka kóleminde keńinen nasıhattalyp keledi. Búgingi basqosý úlgili istiń bir sáti ǵana. Jaqsylyq aǵamnyń júzi jaınap turdy. Baqbergen AMALBEK, Kókshetaý.