2015 jyly dızel otynynyń quny – 82,0 teńge, 2016 jyly – 95,4 teńge, 2017 jyly – 140,7 teńge bolsa, bıyl ol 156 teńgege jetken nemese 2015 jylmen salystyrǵanda 1,9 ese ósken. Bul jaǵdaı Aqmola, Shyǵys Qazaqstan, Qostanaı jáne Qaraǵandy oblystarynda ósimdik sharýashylyǵy men mal sharýashylyǵy ónimderiniń edáýir qymbattaýyna soqtyryp, osy óńirlerdegi kóptegen aýylsharýashylyq taýar óndirýshileriniń qarjylyq jaǵdaıyn qıyndata tústi. Saıyp kelgende bulardyń aýyl sharýashylyǵy ónimderin óndirýdegi shyǵyndarynda janar-jaǵarmaı materıaldarynyń úlesi 25 %-ǵa deıin jetti. Mundaı jaǵdaı elimizdiń basqa óńirlerinde de oryn alyp otyr.
Qalyptasqan jaǵdaı aýylsharýashylyq ónimderiniń básekege qabilettiligin tómendetýde. Árıne, aǵymdaǵy jyly Úkimet kóktemgi egis jumystaryn júrgizý úshin dızel otynyn zaýyttardan alǵanda 1 lıtriniń baǵasyn 130 teńge deńgeıinde ustaýdy belgilegen, biraq ony óńirlerge jetkizýdi eskersek, baǵa orta eseppen 150 teńgege deıin kóterilip otyr.
Aýyl sharýashylyǵy taýarlaryn óndirýshilerge agrotehnıkalyq is-sharalardy ýaqtyly júrgizý, sonymen birge ónimniń ishki jáne syrtqy naryqtardaǵy básekege qabilettiligin arttyrý úshin bul baǵa tıimsiz bolyp tabylady.
Osyǵan baılanysty, biz Premer-Mınıstr Baqytjan Saǵyntaevtan dızeldi otynǵa belgilengen baǵany qaıta qarap, ony 25–30%-ǵa deıin tómendetý týraly máseleni qarastyrýdy suradyq. Bul saýalǵa palatadaǵy «Nur Otan» partııasy fraksııasynyń músheleri N.Sabılıanov pen S.Zvolskıı de qol qoıdy. Úkimet basshysy bizdiń usynysymyzdy oń shesher degen úmittemiz.
Jeksenbaı DÚISEBAEV,
Májilis depýtaty
