«Egemen Qazaqstannyń» arnaıy jobasy: Jasampazdyq jemisteri
Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi. «Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady.
Tómende Shyǵys Qazaqstan oblysynyń Tarbaǵataı aýdanyndaǵy Kókjyra aýylynan fotoreportaj berilip otyr.
Apat aıtyp kelmeıdi. Barys jyly kendi altaılyqtardyń esinde uzaq ýaqyt saqtalar. Qar mólsheri jyldaǵydan tórt-bes ese qalyń túsip, qatty aıaz, kóktemde kún kúrt jylyǵan kezde Tarbaǵataı aýdanynyń Kókjyra, Jantekeı, Kóktúbek, Oıshilik, Shorǵa, Qyzylkesik, Zaısan aýdanynyń Tasbastaý, Kúrshim aýdanynyń Maraldy, Kúrshimde 540 úı qırap, 1300 úıdi sý alyp, jaramsyz bolyp qaldy. Tórt myńnan astam iri qara, 19 myńnan astam qoı-eshki, 650 jylqy opat boldy. Osynaý syn sátte zardap shekken aýdannyń turǵyndary sabyrlylyq saqtap, Elbasy men Úkimetten, óńir basshysy B.Saparbaevtan úmit kútti.
Úmit aldamady. Eń aldymen, Elbasy N.Nazarbaev tıisti mınıstrlikter men oblys basshysyn jınap alyp, shuǵyl jıyn ótkizdi. Ol syn sátte kómek kórsetetinderin, qazirdiń ózinde alǵashqy transhtyń ketkenin málim etti. Premer-Mınıstrdiń birinshi orynbasary О́mirzaq Shókeev, Tótenshe jaǵdaılar mınıstri V.Bojko, taǵy basqalar birneshe aýdandaǵy sý basqan aýyldardy óz kózderimen kórip qaıtty. Tehnıka, qajetti jabdyqtar, ýaqytsha turatyn shatyrlar jetkizildi. Oblys ákimi B.Saparbaev bel sheshpeı, etigimen sý keship, aýdandardy aralap, qoldan kelgen kómekterin jasady. Qala ákimi, shtab bastyǵy Islam Ábishev te apat aımaǵynan shyqpaı, syn sátte qıyndyqtardy aýyl turǵyndarymen birge bólisti.
Arada tórt-bes aıdan keıin qıyndyqtardyń bári artta qaldy. О́tken jyldyń qyrkúıeginde Elbasy N.Nazarbaev Tarbaǵataı aýdanynyń Kókjyra aýylyna kelip, jańadan salynǵan turǵyn úılerdi aralap kórdi, aýyl turǵyndarymen emen-jarqyn áńgimelesti. Eń aldymen sizderdi jańa úılerge qonystanýlaryńyzben quttyqtaımyn. Biz dalada qaldyrmaımyz dep ýáde bergenbiz, sony oryndadyq. Al maldy eki paıyz jeńildikpen alasyzdar, endi myna sándi úılerdiń janynan standart talabyna saı qora-qopsy salyńyzdar, úı mańy aǵashqa malynyp tursyn. Men kópshiliktiń aldynda oblys ákimi Berdibek Máshbekulyna alǵysymdy aıtqym keledi. Ol ózine tapsyrylǵan isti abyroımen atqaryp shyqty, syn sátte sizdermen birge boldy, dedi Elbasy sol kezdesýde.
Elbasyna Sosıalıstik Eńbek Eri Qazybek Demeýbaev aýyl turǵyndary atynan alǵys bildirdi. Dárigerlik ambýlatorııanyń bas dárigeri Jámish Bıǵazına zaman talabyna saı jabdyqtalǵan dárigerlik jabdyqtardy kórsetti. Budan keıin Elbasy N.Nazarbaev Ǵ.Omarovtyń úıine kirip, dám tatty. Aýyl turǵyndarymen eskertkish sýretke túsken soń Nursultan Ábishuly qurylysshylar men syn sátte erlik kórsetken azamattarǵa alǵysyn bildirdi.
Jaqynda Kókjyra aýylynda bolýdyń sáti tústi. Aıta ketý kerek, Kókjyrada – 210, Jántikeıde – 191, Kóktúbekte – 24, Oıshilikte – 8, Shorǵada – 7 turǵyn úı, birneshe kópir salynyp, joldar jóndeldi. Barlyǵy atalmysh aýyldarda 443 turǵyn úı boı kóterdi. Úı bolǵanda qandaı, sándi de sapaly, qora-qopsylar standartqa saı úıdiń artynda salynǵan. Aǵashtar otyrǵyzylyp, asfalt tóselgen úılerde, kóshelerde elektr shamdary samaladaı jarqyraıdy.
Aýyl turǵyndarynyń Elbasyna alǵysy sheksiz – deıdi Tarbaǵataı aýdanynyń ákimi Erlan Tekeshev. 600 oryndyq orta mektepti «Elhon» fırmasy sapaly etip salyp berdi. Sonymen birge, jaýapkershiligi shekteýli seriktestiginiń jetekshisi (PMK «Qurylys»), bas merdiger, jergilikti jerdiń týmasy Qaırat Nábıevke alǵysymyz erekshe. Ol osyndaǵy qurylystyń negizin salyp berdi. Poshta úıi, ákimshilik ǵımaraty, mektep janyndaǵy botanıkalyq saıabaq ta kóz tartady. Jylyjaı taıaý kúnderi iske qosylmaq. Mádenıet úıin salyp berý de oıda bar. Qazir Kókjyra eski, jańa aýyl bolyp ekige bólinip otyr. Bolashaqta barlyǵy osy jerge qonys aýdarmaq. Sóz reti kelgende aıtý kerek, ótken jyly Kendi Altaıda jańadan úsh aýyl boı kóterdi. Úshinshisi, oralmandarǵa arnalǵan jańa aýyl. Qazir ol jerde bes júzge tarta turǵyn úı, mektep, áleýmettik ǵımarattar bar.
