Konstıtýsııa men saılaý týraly zańnamaǵa sáıkes, Qazaqstan Respýblıkasynyń jasy on segizge tolǵan azamattary, tegine, áleýmettik, laýazymdyq jáne múliktik jaǵdaıyna, jynysyna, násiline, ultyna, tiline, dinge kózqarasyna, nanymyna, turǵylyqty jerine nemese kez kelgen ózge jaǵdaıattarǵa qaramastan, saılaýda daýys berýge qatysýǵa quqyly.
Árbir saılaýshy osy quqyǵyn iske asyra alýy úshin ákimdikter saılaýshylar tizimin jasaıdy. Bul rette ákimdikterdiń laýazymdy adamdary olardyń durystyǵy úshin jaýapty bolady.
Saılaý taǵaıyndalǵan sátten bastap azamattar turǵylyqty jeri boıynsha ákimdikke baryp, saılaýshy retinde tirkelýge quqyly.
Naqtyly saılaý ýchaskesinde azamatty saılaýshylar tizimine engizý úshin onyń osy saılaý ýchaskesiniń aýmaǵynda turǵylyqty jeri boıynsha tirkelý faktisi negiz bolady.
Azamattyń turǵylyqty jeri boıynsha tirkelýin naqtylaıtyn qujat azamattardy tirkeý kitaby (buryn ol «úı kitaby» dep atalatyn) bolyp tabylady.
Eger saılaýshyǵa saılaýdan keminde otyz kún buryn saılaý kúni óziniń tirkelgen orny boıynsha daýys berýge arnalǵan úı-jaıǵa kelý múmkindigi bolmaıtyny belgili bolsa, onyń óziniń bolatyn jeri boıynsha jergilikti atqarýshy organǵa ózin tıisti saılaýshylar tizimine engizý jóninde jazbasha ótinish berýge quqyǵy bar.
Jataqhanalarda turatyn kúndizgi bólimderde oqıtyn stýdentter men aspıranttar saılaýshylar tizimine jataqhananyń ornalasqan jeri boıynsha engiziledi.
Ásker bólimderindegi saılaýshy áskerı qyzmetshilerdiń, sondaı-aq ásker bólimderi ornalasqan jerlerde turatyn olardyń otbasy músheleri men basqa saılaýshylardyń tizimi ásker bólimderiniń komandırleri bergen málimetter negizinde jasalady.
Eger saılaýshy ýaqytsha bolý oryndarynda, mysaly: demalys úılerinde, sanatorıılerde nemese vahtalyq jumysta bolsa, onda saılaýshylardyń tizimderi sol mekemelerdiń basshylary bergen derekter negizinde jasalady. Bul tizimder daýys berýge bir kún qalǵanda mindetti túrde naqtylanýǵa tıis.
Shet memleketterge jeke shaqyrýlar boıynsha, qyzmettik, iskerlik jáne týrıstik saparmen kelgen Qazaqstan Respýblıkasynyń azamattary ýchaskelik saılaý komıssııasyna ótinish jasaǵan jaǵdaıda jáne olardyń Qazaqstan Respýblıkasy azamatynyń jaramdy pasporty bolsa, shet memleketterdegi saılaý ýchaskelerinde saılaýshylar tizimine engiziledi.
2011 jylǵy 30 jeltoqsannan bastap árbir saılaýshy saılaý ýchaskelerinde saılaýshylar tizimindegi ózi týraly derekterdi teksere alady.
Saılaýshynyń aty-jóni tizimde bolmaı shyqsa nemese ol týraly derekterde jańsaqtyqtardyń bar ekeni anyqtalsa, saılaýshy tıisti qujattardyń negizinde ózin tizimge engizýdi nemese qajetti túzetýler jasaýdy talap etýge quqyly. Bas tartylǵan jaǵdaıda saılaýshynyń sotqa shaǵymdanýǵa quqyǵy bar.
Qurmetti saılaýshylar!
Saılaýshylar tiziminiń dáldigi men durystyǵy kóp jaǵdaıda sizderdiń ózderińizge baılanysty. Belsendi ári jaýapkershilikti bolyńyzdar!
Qazaqstan Respýblıkasynyń Ortalyq saılaý komıssııasy.
