AQSh-tyń «Los-Andjeles Gelaksı» klýbynyń shabýylshysy Zlatan Ibragımovıch jergilikti telearnanyń baǵdarlamasynda bıylǵy álem chempıonatyna qatysýǵa nıetti ekenin aıtty.
«Iá, men álem chempıonatyna baramyn. Basqa eshteńe aıta almaımyn. Taǵy bir nárse aıta keteıin, bul álem chempıonaty mensiz ótse, onda ol álem chempıonaty bolmaıdy», deıdi Ibragımovıch.
Zlatan 2001-2016 jyldar aralyǵynda Shvesııa quramasy sapynda dop tepken. 15 jyldyń ishinde 36 jastaǵy shabýylshy 62 gol soǵyp, qurama komanda sapynda eń kóp gol soqqan shabýylshy retinde kósh bastap tur.
Alty aıǵa saıystan shettetildi
Meksıkalyq boksshy Saýl Alvares dopıng qoldandy degen aıyppen sporttan 6 aıǵa shettetildi. Bul týraly Nevada shtatynyń atletıkalyq komıssııasy (NSAC) habarlady.
Keshegi dopıng daýyna baılanysty atletıkalyq komıssııasynyń otyrysyna «Kanelo» men onyń komandasy qatysqan joq. Biraq boksshynyń komandasynyń atynan bul jıynǵa advokaty qatysty. Nátıjesinde, onyń tyıym salynǵan dári qoldanǵandyǵy anyqtaldy. Sóıtip Alvares 6 aı sporttan shettetilip, oǵan osy ýaqyt aralyǵynda jekpe-jek ótkizýge tyıym saldy. Jaza merzimi 17 aqpannan bastap eseptelip, 17 tamyz kúni aıaqtalady.
Roland Garros-qa qatyspaıdy
Shveısarııalyq tennısshi Rodjer Federer bıyl 27 mamyr jáne 10 maýsym aralyǵynda «Úlken dýlyǵa» sanatyna enetin tennısten Fransııa ashyq chempıonatyna qatyspaıdy. Bul týraly Roland Garros týrnıriniń resmı saıty habarlady.
Federer osy maýsymda topyraq tósenishte ótetin barlyq týrnırge qatysýdan bas tartqan. Resmı saıttyń málimetine qaraǵanda, bıylǵy jarysqa álem reıtıngindegi TOP-30 tennısshiniń barlyǵy qatysady. Atap aıtar bolsaq, tizimde álemniń birinshi nómirli tennısshi Rafael Nadal, shveısarııalyq Sten Vavrınka jáne brıtanııalyq Endı Marreı bar.
Bıylǵy Roland Garros týrnıriniń júlde qory – 39 197 000 eýro. Bul byltyrǵyǵa qaraǵanda 3,2 mıllıon eýroǵa kóp. Erler jáne qyzdar arasyndaǵy jekeleı synnyń jeńimpazdary 2,2 mıllıon syıaqy alady.
Daıyndaǵan
Álı BITО́RE,
«Egemen Qazaqstan»
