Jıyndy ashqan «Atameken» UKP Tóralqasynyń tóraǵasy Qanat Sharlapaev komıtet eldiń taý-ken metallýrgııasy keshenin biriktiretinin, bul salada 200 000-nan astam adam eńbek etetinin atap ótti. Onyń aıtýynsha, naqty sektorda jumys isteıtin eńbek adamdary úshin eń bastysy – turaqtylyq pen erteńgi kúnge degen senim.
Salany damytý ornyqty retteý saıasatyn, túsinikti ári ashyq erejelerdi jáne memleketpen úzdiksiz dıalogti talap etedi. Bul óz kezeginde júrgizilip jatqan reformalardyń sapasyna tikeleı baılanysty. Q.Sharlapaev bıznes qaýymdastyǵynyń toptasýy men Negizgi zań jobasynda jetildirilip jatqan normalarǵa baıyppen qaraýdyń mańyzyn atap ótti.
«Sot sheshimimen ǵana»: Turǵyn úı quqyǵyna kepildikti konstıtýsııalyq deńgeıde kúsheıtý usynyldy
Komıtet tóraǵasy Nıkolaı Radostoves memlekettegi júıeli jańǵyrtý úderisine toqtaldy.
«El basshylyǵy qolǵa alyp otyrǵan bastamalar – ózgeris úshin ózgeris emes. Bul – memleketti jańǵyrtýǵa, ádiletti ári básekege qabiletti ekonomıkany qalyptastyrýǵa qajetti qadamdar», dedi ol.
N.Radostovestiń aıtýynsha, Qazaqstan sońǵy jyldary turaqty ósim kórsetip keledi, ekonomıkanyń damý qarqyny shamamen 6%-dy quraıdy. Jas ári táýelsiz memleket úshin ınstıtýttardy nyǵaıtyp, uzaq merzimdi ilgerileýge negiz qalaıtyn reformalardy jalǵastyrý mańyzdy.
Onyń pikirinshe, usynylyp otyrǵan ózgeristerdiń basty ereksheligi – adamǵa basymdyq berilýi. Azamattyń quqyǵy, múmkindigi men bastamasy memlekettik saıasattyń ózegine aınalmaq. Jańa Konstıtýsııa jobasy ashyq, zamanaýı ári damýǵa baǵdarlanǵan memleket qalyptastyrýdy kózdeıdi.
«Men saıası júıeniń jańasha qurylymǵa kóshkenin kóremin – zamanaýı, ınstıtýsıonaldyq, damyǵan elderde burynnan qalyptasqan qaǵıdattarǵa súıenetin júıe. Bul – baǵdarlamalar básekesi, jaýapkershilik jáne qoǵamǵa túsinikti erejeler. Qoǵamdyq-saıası ómir jekelegen tulǵalardyń ambısııasyna emes, eleýli qoldaýǵa ıe baǵdarlamalarǵa negizdelýi tıis. Ashyq pikirtalas pen partııalyq baǵdarlamalar ózara yqpaldastyqtyń jáne damýdyń tiregine aınalýy qajet. Ekonomıkalyq, áleýmettik jáne saıası strategııany qalaı qurý kerektigi jóninde syndarly dıalog óristetýimiz kerek. Mundaı ózgeristerdi qoldaý qajet dep sanaımyn», dedi komıtet tóraǵasy.
Jańa Konstıtýsııada ótpeli kezeńniń barlyq rásimderi naqty jazylady
Respýblıkalyq baǵaly metaldar óndirýshiler qaýymdastyǵynyń atqarýshy dırektory Qanat Baıtov Konstıtýsııalyq reformanyń saıası jańǵyrý ǵana emes, ınvestısııalyq turaqtylyq faktory ekenin atap ótti.
«Konstıtýsııalyq reforma el ekonomıkasynyń qalaı damıtynyna, bıznes pen ınvestorlar úshin erejelerdiń qanshalyqty aıqyn ári ornyqty bolatynyna tikeleı baılanysty», dedi ol.
K.Baıtovtyń aıtýynsha, joba kirispesinde jáne negizgi qaǵıdattarynda zań ústemdigi, jeke menshikti qorǵaý jáne memleket, bıznes pen qoǵam múddeleriniń teńgerimi aıqyn kórinis tapqan. Taý-ken metallýrgııasy kesheni úshin bul – turaqty jumys pen damýdyń basty sharttary.
«Taý-ken metallýrgııa kesheni – aýqymdy qarjy talap etetin, ınvestısııalyq sıkli uzaq jobalarǵa negizdelgen sala. Sondyqtan Konstıtýsııada menshik quqyǵyn, zańdylyqty jáne kásipkerlikti qorǵaý kepildikteriniń kúsheıtilýi biz úshin aıryqsha mańyzdy. Bul ınvestorlar senimin arttyryp, jumys jaǵdaıyn boljamdy etedi», dedi K.Baıtov.
Ol sot júıesiniń róli men zań ústemdigi qaǵıdatynyń mańyzyn da erekshe atap ótti. Quqyqtyq jáne retteýshilik táýekelderdiń azaıýy iri ınvestısııalyq jobalardy iske qosý men qarjylandyrý tartýǵa tikeleı áser etedi.
«Konstıtýsııalyq reformalardyń áleýmettik-ekonomıkalyq áseri ornyqty damý ustanymymen tyǵyz baılanysty. Bul – jańa jumys oryndaryn ashý, óńirlerdi damytý, qosylǵan qundy arttyrý jáne zamanaýı tehnologııalardy engizý. Osy baǵyttardyń barlyǵynda taý-ken metallýrgııasy kesheni dástúrli túrde mańyzdy ról atqarady. Sonymen birge bolashaq urpaq aldyndaǵy jaýapkershilik qaǵıdaty jer qoınaýyn utymdy ári jaýapty paıdalanýǵa negiz bolady, salany jańǵyrtýǵa jáne ekologııalyq tıimdi sheshimderdi artyq retteýsiz engizýge serpin beredi», dep túıindedi Qanat Baıtov.
Jıynǵa qatysýshylar Konstıtýsııalyq reformany qoldaıtyndaryn bildirip, sala ókilderin qoǵamdyq talqylaýǵa belsendi qatysýǵa shaqyrdy.
Endi mindet emes, quqyq: Jańa Konstıtýsııa jobasynda Quryltaıǵa qatysty norma naqtylandy
