Aqmola oblystyq Densaýlyq saqtaý basqarmasynyń basshysy Ermek Narımannyń málimdeýinshe, ajalmen arpalysqan naýqastardyń denesin 70-85 paıyzǵa deıin aýyr kúıik shalǵan. Aq halatty abzal jandardyń bar kúsh-jigerin salyp, reanımasııalyq sharalar júrgizgenine qaramastan, jaraqattyń tym aýyrlyǵynan olardy aman alyp qalý múmkin bolmady.
«Keshe Shýchınsk aýdandyq aýrýhanasynda aýyr jaraqat alǵan bir naýqastan aıyryldyq. Búgin, ókinishke qaraı, denesiniń 85 paıyzy kúıgen taǵy bir pasıentimiz kóz jumdy. Dárigerler qoldan kelgenniń bárin jasady, biraq asqynýlardyń tym aýyrlyǵy áser etti. Qaza bolǵandardyń jaqyndaryna qaıǵyryp kóńil aıtamyz», dedi Ermek Narıman.
Esterińizge sala keteıik, 26 aqpan kúni dámhanadaǵy gaz ballonynyń jarylys boldy. Qazirgi ýaqytta 6 naýqas Shýchınsk pen oblystyq aýrýhananyń jansaqtaý bóliminde jatyr. Taǵy bes adam sanavıasııamen Astanadaǵy Ulttyq shuǵyl medısına ortalyǵyna jetkizilgen. 8 turǵyn aýdandyq aýrýhanada ambýlatorlyq em alýda.
