Ádebıetshiniń artynda qalǵan murasyn muqııat jıyp otyrǵan Kúlásh jeńgeıge habarlasyp, qoljazba jýrnaldardy bir kórýdi ótine surap edik, alaıda jolymyz bolmady. Sosyn Almatydaǵy Ulttyq kitaphanadaǵy sırek qorda saqtalǵan «Sadaq» jýrnalynyń 1916 jylǵy №20, №21, №22 sandaryn da sholyp shyqtyq. Úsheýinde de «Ǵalııa» medresesi kitaphanasynyń móri joq eken. Keıin Ýfa qalasyna baryp, sondaǵy Ahmet Zákı Ýálıdı atyndaǵy Bashqurtstan Ulttyq kitaphanasynyń sırek kitaptar men qoljazbalar qoryna kirdik. Sırek qordyń meńgerýshisi Flıýr Sıbagatovtan «Ǵalııa» medresesi kitaphanasynda saqtalǵan basylymdar men kitaptardy suradyq. Ol az ýaqytta aldymyzǵa kóp kitapty úıip qoıdy. Sol kitaptardyń kópshiliginiń betinen biz izdegen mór tabyla ketti. Bir ǵana mór ar-qyly birneshe málimetke qanyq boldyq.
«Ǵalııa» medresesiniń óz kitaphanasy jumys istegen. Shákirtter oqýdan qoly qalt etkende osy kitaphanaǵa baryp, kitap, gazet-jýrnal oqyp turǵan. Kitaphanada orys, tatar ádebıetterimen qatar, arab, túrik tilderindegi kitaptar da bolǵan.
Tatar tarıhshysy Lılııa Týzbekovanyń jazýynsha, «Ǵalııa» kitaphanasynyń meńgerýshisi qyzmetin medrese shákirtteri atqarǵan. Olar jyl saıyn óz arasynan kitaphana meńgerýshisin saılap otyrǵan. Kitaphana meńgerýshisi aıyna 25 som kóleminde jalaqy alǵan. Derekterde 1914–1916 jyldary Magdan Magdeev, 1916–1917 jyldary Saıfı Qudash kitaphana meńgerýshisi qyzmetin atqarǵany aıtylady. Soǵan qaraǵanda kitaphana
1914 jyly ashylyp, medrese jabylǵan 1917 jylǵa deıin qyzmet etken sekildi.
Kitaphana tańǵy 9-dan túngi saǵat 11-ge deıin jumys istegen. Shákirtter gazet-jýrnaldardy oqyǵany úshin meńgerýshige 20 tıyn kóleminde aqy tóledi. Sondaı-aq «Ǵalııanyń» shákirtteri ótkizgen ádebı, mýzykalyq saýyq keshterinen túsken qarajattyń da belgili bir bóligi kitaphana qajetine jumsaldy.
Sonymen qatar oqý zalyna «Ǵalııanyń» shákirtteri shyǵarǵan «Parlaq», «Sadaq», «Nárýa» sekildi qoljazba jýrnaldar da qoıylyp, bir betine kitaphananyń móri basyldy. «Ǵalııadaǵy» qazaq shákirtteri shyǵarǵan «Sadaq» qoljazba jýrnalynyń árbir jańa nómiri osy kitaphananyń oqý zalynan tabyldy. Shákirtter jýrnaldy sol jerge baryp oqyp, aqparat aldy. Sol sebepti «Sadaq» bizge qanshalyqty qymbat bolsa, osy qoljazba jýrnaldy oqyrmanǵa usynyp turǵan kitaphananyń da orny alabóten.
Búginde Ýfa qalasynda «Ǵalııa» medresesiniń ǵımaraty ál kúnge syny buzylmaı tur. Alaıda medrese kitaphanasy saqtalmaǵan. Kezinde kitaphananyń tórinde turǵan keıbir kitaptar ǵana Bashqurtstan Ulttyq kitaphanasynyń sırek kitaptar qoryna ótkizilgen. Kópshiliginiń betinde «Ǵalııa» kitaphanasynyń móri bar. Olardyń «Ǵalııanyń» bir jádigeri ekenin rastap turǵan da sol móri ǵana.
