Eńseli oqý ordasy

«Egemen Qazaqstannyń» arnaıy jobasy: Jasampazdyq jemisteri

Jıyrma jyldyń ishinde atqarylǵan ıgi isterdiń arqasynda árbir óńirimiz ózgerip, ómirimiz jaqsaryp keledi. «Egemen Qazaqstan» gazeti osyndaı órkendi ózgeristerdi beıneleıtin materıaldardy turaqty jarııalap turady. Tómende Petropavl joǵary áskerı ýchılıshesinen  fotoreportaj berilip otyr.

EŃSELI  OQÝ  ORDASY

Qazaqstan Respýblıkasynyń Prezıdenti, Respýblıka Qarýly Kúshteriniń Joǵarǵy Bas Qolbasshysy Nursultan Nazarbaev táýel­siz­digimizdiń alǵashqy kúnderinen derbes áskeri­miz­di quryp, qorǵanys salasyn nyǵaıtýǵa erekshe qamqorlyq jasap keledi. Jasampazdyqtyń 20 jylynda jergilikti áskerı mamandar men komandırler korpýsyn jasaqtaý baǵytynda da kóp is tyndyryldy. Osy oraıda Elbasynyń tikeleı qoldaýymen Soltústik Qazaqstan ob­ly­synda Ishki ister mınıstrligi ishki áskerler Petropavl joǵary áskerı ýchılıshesiniń ashy­lýy el ómirindegi aıtýly oqıǵa boldy. Ol 1997 jyly 18 naýryzda boı kóterdi. Qalanyń shetkeri aımaǵynda áskerı ásem qalashyqtyń tur­ǵyzylýyna Úkimet tarapynan zor qarjylyq qoldaý kórsetildi. Sol jyly alǵashqy túlek­terin qabyldady. Qyzyljar óńirine jasaǵan jumys sapary kezinde Memleket basshysy eń­seli bilim ordasyna arnaıy kelip, Jaýyngerlik týdy saltanatty túrde tabys etti. Ishki áskerler quramalaryna sardarlar ázirleıtin birden-bir bilim oshaǵyna 2009 jyly áskerı ınstıtýt mártebesi berildi. Ony ár jyldary general-maıorlar Amangeldi Dúıkenov, Rashıd Fatkýllın, polkovnıkter Murat Qaraǵoıshıev, Sábıt Ahmetov basqaryp, materıaldyq-te­h­nı­kalyq bazanyń nyǵaıýyna, bilikti kadrlarmen tolyqtyrýǵa úlken úles qosty. Qazir polkovnık, áskerı ǵylymdar doktory Jumabek Ahmetov jetekshilik etedi. Búginge deıin ınstıtýt qabyrǵasynan eki myńǵa jýyq ofıserler túlep ushty. Elimizdiń ár qıyrynan kelgen kýrsanttar tórt jyl oqyp, komanda-taktı­kalyq tárbıe jáne áleý­mettik-quqyqtyq jumystar, komanda-tak­tıkalyq raketa-artıllerııalyq, ınjenerlik-tehnıkalyq qam­ta­masyz etý, avtomobıl isteri boıynsha aza­mattyq mamandyqtar alyp shyǵady. Oqytý baǵdarlamasynda «VS» sana­tyndaǵy júr­gizýshiler men elektrondy eseptegish mashınalar operatorlaryn ázirleý jaıy da qaras­tyrylǵan. – Áskerı oqý ornyn ornalastyrýǵa Petropavl qalasynyń tańdap alynýy kezdeısoq emes. Elbasymyzdyń halqymyzdyń tynyshtyǵyn, eldik múddeni jan-jaqty oılastyrǵan, óńirdiń strategııalyq, saıası mán-mańyzyn jete eskergen kóregendik sheshiminiń durystyǵyn ýaqyt­tyń ózi dáleldep berdi. Alǵashqy túlekterimiz El Táýelsizdiginiń 10 jyldyǵy qarsańynda áskerı ómirge joldama aldy. El áskerleri quramyndaǵy áskerı mamandardyń 90 paıyzy – bizdiń ofıserler. Qorǵanys, Tótenshe jaǵdaılar mınıstrlikterinde, UQK Shekara komıtetinde de abyroıly qyzmet atqarýda, – deıdi Jumabek Hatıollauly. Instıtýttyń halyqaralyq arenadaǵy baı­lanysy nyǵaıa túsken. Osynda Qyrǵyzstan men Tájikstannyń ókilderi bilim alady. Reseıdiń Novosibir, Perm, Sankt-Peterbýrg qalalaryndaǵy áskerı ınstıtýttarmen tyǵyz qarym-qatynas ornatqan. 120-ǵa tarta oqytýshylar men ofıserler AQSh, Germanııa, Úndistan, Reseı, taǵy basqa memleketterde biliktilikterin art­tyr­dy, tájirıbelerin jetildirdi. Oqý-ádistemelik semınarlarǵa, ǵylymı konferensııalarǵa qatys­ty. Jeke quram áskerı sherýler men búkiláskerlik keńesterge úzbeı qatysyp, jaqsy qyrynan tanylyp júr. Ofıserler klýby, ardagerler ke­ńesi, jastardyń bastamashyl ortalyǵy ju­mys isteıdi. Áskerı orkestr men ánshiler – res­pýb­lıkalyq konkýrs-baıqaýlardyń jeńimpaz­dary. Sporttyq jetistikter de az emes. Aıbek Qy­ryqbaev djıý-djıtsýden, Abaı Tinalın, Mıras Birimjanov kıkboksıngten, Denıs Kolesnıkov gir kóterýden, Maqsat Núsipov qazaq kúresinen Eýropa, álem chempıondary atandy. Táýelsizdik mereıtoıy qarsańynda kóp­tegen ıgilikti ister qanat jaıa túsken. «Qa­zaqstan – meniń Otanym!» taqyrybynda sharalar jıi ótkizilip turady. Kýrsanttardy oqýǵa qabyl­daý, adaldyqqa ant berý rásimderi, túrli tárbıe saǵattary egemendiktiń qadyr-qasıetin uǵyn­dyrý, eldi, jerdi qaltqysyz súıý, ulttyq qun­dylyqtardy qadirleý, memlekettik tilge degen qushtarlyqty oıatý sekildi patrıottyq tálim-tárbıemen tyǵyz baı­lanysyp jatady. Úlken sheberlikti, eptilikti, kúsh-qýatty talap etetin áskerı-taktıkalyq jattyǵýlar búgingi kýrsanttyń, erteńgi sar­dardyń azamattyq tulǵasyn qalyp­tas­tyrary anyq. ________________________________ Arnaıy betti ázirlegen «Egemen Qazaqstan»  gazetiniń Soltústik Qazaqstan oblysyndaǵy  menshikti tilshisi О́mir ESQALI.