Konferensııaǵa oblystyń ár aýmaǵynan qonaqtar keldi. Jıyn aldynda batyrdyń tiri kezinde jazylyp alynǵan qundy taspa kórsetildi. «Soǵysta men namysty eshqashan esten shyǵarmadym. Barlaýshy retinde barlyq tapsyrmany oryndadym. Oryndamaǵan kezim joq», - dep sóılegen qart sarbazdyń aıbarly júzi talaıdy tánti etti.
Mıhaıl Abdolov Qyzyl Armııa qatarynda 1938 jyly shaqyrylǵan. Uly Otan soǵysyna bastan-aıaq qatysqan maıdanger barlaýshy bolǵan. 78-shi atqyshtar dıvızııasy sapynda Brıansk ormandaryn jaryp ótken joryqtarǵa, Mojaısk tasjoly boıyndaǵy áıgili shaıqastarǵa, III Ýkraın maıdanynda, Orlov mańyndaǵy jan alyp, jan berisken urysqa qatysqan. 74-shi atqyshtar dıvızııasy barlaýshylar rotasy barlaýshylar bólimshesiniń komandıri Abdolovtyń erligin jaý da moıyndapty. 1944 jyly 7 qarashaǵa qaraǵan túni Dýnaı ózeniniń oń jaǵalaýyndaǵy jaý plasdarmyn barlap jáne basyp alý jóninde shuǵyl tapsyrmany oryndaǵan Abdolov toby nemistiń 12 jaýyngeri men ýnter-ofıserin tutqyndaǵan. Bular jetkizgen «til» óte qundy málimetter beripti. Osy urysta Abdolovtyń ózi 11 fashısti óltirip, tórteýin tutqyndaǵan.
Konferensııada sóz alǵandar M.Abdolovtyń jaýdyń tórt ushaǵyn, qarý-jaraq qoımasyn joıýdaǵy erlikterin de áserli áńgimelep ótti. Marqum beıbit ómirde de óte tentek, erkin oıly azamat boldy. О́mirden ótkenshe shaǵyn aýylda turdy. Oral qalasyna, tipti aýdan ortalyǵyna shaqyrǵan usynystardan bas tartypty.
Osy konferensııada Jánibek aýdandyq «Shuǵyla» gazetiniń redaktory, II dúnıejúzilik soǵys taqyrybyn júıeli zerttep júrgen Ahmedııar Batyrhanov osy kezge deıin kópshilikke belgisiz derekter áli de kóp ekenin aıtady. Mysaly ol Reseı Qorǵanys mınıstrliginiń ortalyq arhıvi qorynan buryn-sońdy aıtylmaǵan 17 qazaq ushqyshyn, Sovet Odaǵynyń Batyry ataǵyna, úlken nagradalarǵa usynylyp, biraq marapattalmaı qalǵan jaýyngerler týraly kóp derek tapqan. Sonyń ishinde dál osy Aqjaıyq aýdanynan maıdanǵan alynyp, nemis tutqynynda bolǵan, súıekteri jat jerde qalǵan 26 sarbaz jaıynda aıtyp berdi.
Aıta ketý kerek, Aqjaıyq aýdanynda ólke tarıhyn túgendeýge, tarıhı tulǵalardy halyq jadynda jańǵyrtýǵa baǵyttalǵan jumystar júıeli jasalyp keledi. Osyǵan deıin aýyl-aýyldyń shejiresine, aıtýly tulǵalarǵa, Uly Otan soǵysyna qatysýshylarǵa arnalyp birneshe kitap shyǵaryldy. Ortalyqtandyrylǵan kitaphanalar júıesi bul basylymdardy keńinen nasıhattap keledi.
Aýdan Alash qozǵalysynyń 100 jyldyǵyna «Aqjaıyqtaǵy Alash izderi», «Aqjaıyqtyq Alash arystary» atty kitaptar shyǵardy. Jerles aqyn, ǵalym, maıdanger Saǵynǵalı Seıitovtiń 100 jyldyǵy da ótken kúzde mándi, mazmundy ótti.
Qazbek QUTTYMURATULY,
«Egemen Qazaqstan»
Batys Qazaqstan oblysy
Sýretterdi túsirgen Nurbek IHSAN
