«Jumysshy mamandyqtar jylynda» kórsetilgen qurmetke mekemeniń myńnan astam qyzmetkeri erekshe qýanyp, Aıtjan Baqytjanulyn biraýyzdan quttyqtady. Jumysyna tyńǵylyqty, az sózdi, jas mamandarǵa qamqor, shaqyrtý túskende tún ortasy demeı, aýyr kabelderdi kóligine tıep alyp, alys jolǵa júrip ketetin Aıtjan aǵany ujymdastary qatty syılaıdy.
Oqshaýlaýshy mamandyǵy ońaı emes. Qys kúnderi elsizdegi joǵary kerneýli jelilerdegi ótkizgish symdar qatyp qalsa nemese qysqa tuıyqtalýdan jaryq óshse, aýdandaǵylar Aıtjan kabelshini izdeıdi. Onyń ústine, keıingi jyldary aýa raıy qubylmaly bolyp, elektr baǵanalarynda muz qatýynan apatty jaǵdaılar jıilep ketti. Elektr jelileriniń tozýy da kúrdeli máselege aınalǵan. Aqtóbe oblysyndaǵy eldi mekenderdiń arasy tym alshaq, keı aýdandarǵa jetý úshin 7–8 saǵat ýaqyt ketedi. Kóktaıǵaq pen boranda júrý qansha qıyn bolsa da, mamandar apatty jaǵdaıdy tez retteýge tyrysady. О́ıtkeni jaryqtyń óshýi aýrýhanalar men mektepter, balabaqshalar men kommýnaldyq mekemelerdiń jumysyn toqtatyp tastaıdy. Mundaı kezde joǵary kerneýli kabelderdi birneshe elektr mamany jumylyp júrip almastyrady. Kóktaıǵaq pen muzda baǵanaǵa kóterilgende qaýipsizdik erejelerin qatań saqtaý qajet. Sondyqtan da mundaı jaýapty iske Aıtjan sııaqty tájirıbeli mamandar jumyldyrylady.
Keıipkerimiz Muǵaljar aýdanynyń Ashysaı aýylynda dúnıege kelgen. Mektep bitirgen soń aýylda traktorshy-mehanızator bolyp eńbek jolyn bastap, 1984–1986 jyldary áskerı boryshyn ótep qaıtady. Tórt jyldan soń aýdan ortalyǵy Qandyaǵash qalasyndaǵy elektr jelileri mekemesine júrgizýshi bolyp aýysady. Birer jyldan soń mekemeniń elektr slesari bolyp taǵaıyndalyp, kúrdeli qurylǵylarmen jumys isteýdi, apatty jaǵdaılardy joıý tásilderin meńgeredi.
– Energetıka mamandyǵy tájirıbemen keledi. Bul jumys adam minezin shyńdaıdy, tózimdilikke baýlıdy. Erekshe yjdaǵattylyq qajet. Sebebi elektr ótkizgishterin, tozǵan symdardy sapalysyna almastyryp turmasa, kez kelgen ýaqytta órt shyǵýy yqtımal. Biz shaqyrtýǵa barǵanda eń áýeli jelilerdiń jaǵdaıyn tekserip alyp, sodan keıin ǵana aqaýlardy jóndeýge kirisemiz. Qaýipsizdik erejelerin saqtamaýdyń, qysqa tuıyqtalýdyń kesirinen shyqqan órtter qanshama adamnyń ómirin jalmady. Sondyqtan elektr júıelerine óte abaı bolý kerek. Tozǵan jelilerdi kezeń-kezeńimen jańalap otyrý mańyzdy, – deıdi maman.
«Energosıstema» JShS Muǵaljar elektr jelileri ýchaskesinde júrgizýshi bolyp eńbek ete júrip, ol 2022 jyly Aqtóbe qalasyndaǵy bas keńsege aýysty. Sodan beri Oqshaýlaý, qorǵaý jáne synaý qyzmetiniń 5-razrıadty kabelshi-júrgizýshisi laýazymynda qyzmet atqarady.
Otbasynda syıly, aǵaıyn-týysqa qamqor ákeniń ul-qyzy búginde ár salada eńbek etip júr. Úsh nemeresi bar.
– Balalarym energetıka salasyn tańdamady. Qyzym Almaty qalasynda turady. Ulym Baýyrjan – sportshy, Qazaqstan boks federasııasynyń halyqaralyq dárejedegi tóreshisi. Jubaıymnyń jeke kásibi bar, tiginshilikpen aınalysady, – deıdi keıipkerimiz.
Aıtjan Ysqaq keıingi tolqyn jastarǵa bilgenin úıretýden, mol tájirıbesin bólisýden jalyqpaıdy. Energetıka mekemesi qazir jas mamandarmen tolyǵyp jatyr. Ujymǵa kelgen jas ınjenerler men kolledj bitirgen mamandar Aıtjan aǵasynan aqyl suraýdan tartynbaıdy. Ol joǵary kerneý kezinde qaýipsizdik erejelerin saqtaýdy, baǵanalarǵa arnaıy bekitkishtermen shyǵý tásilderin úıretip, janynda júrgen jastardy syrttaı baqylap turady. Qatesi bolsa, birden eskertedi. Onyń alǵashqy shákirtteri de qazir tájirıbeli mamanǵa aınaldy. Soǵan qaramastan ustazdyq pen azamattyqty qatar alyp júrgen qarapaıym eńbekkerdiń áli de úıreteri kóp.
Aqtóbe oblysy
