Jarysqa álemniń 96 elinen 600-den astam sportshy qatysady dep josparlanyp otyr. Álem kýboginiń kezeńi erler men áıelder arasynda jekeleı jáne komandalyq syndar boıynsha uıymdastyrylady.
Álem kýbogi kezeńinde el namysyn erler quramasy sapynda shpagadan Rýslan Qurbanov, Elmır Álimjanov, Erlik Sertaı, Kırıll Prohodov jáne Vadım Sharlaımov qorǵaıdy.
Qazaqstannyń Ulttyq Semserlesý Federasııasynyń málimdeýinshe, mundaı deńgeıdegi jarystardy Marrakesh pen Býenos-Aıres qalalary ótkizgen. Al BAÁ, Germanııa, Shveısarııa jáne Kanada Álem kýbogi kezeńderin turaqty túrde qabyldap keledi. Bıyl Qazaqstan alǵash ret qabyldaýshy elderdiń elıtalyq tizimine qosyldy.
Tarıhı jetistik: Qazaqstan semserlesýden álem chempıonatynda qola júlde jeńip aldy
«Men semserlesýmen alǵash aınalysa bastaǵan kezde Álem kýboginiń bir kezeńi Qazaqstanda ótedi degendi elestete de almaǵan edim. Biz úshin mundaı týrnırler árdaıym alys elderde – Italııa, Fransııa, Vengrııa sekildi semserlesý dástúri qalyptasqan memleketterde ótetin, álemniń úzdik sportshylary sonda jınalatyn. Búgin biz Álem kýboginiń mańyzdy kezeńderiniń birin óz elimizde qabyldap otyrmyz. Bul – el úshin de, qazaq semserlesýi úshin de zor maqtanysh. Mundaı iri jarystar jaıdan-jaı senip tapsyrylmaıdy. Mundaı sheshim bizdiń deńgeıimizdiń moıyndalǵanyn bildiredi. Sondyqtan biz, sportshylar úshin, tek shetelde ǵana emes, óz jerimizde de sol deńgeıge saı óner kórsetý – úlken jaýapkershilik», dedi semserlesýden ulttyq quramanyń sportshysy Rýslan Qurbanov.
