Foto: istockphoto.com
О́tken aptada AQSh Azamattyq jáne ımmıgrasııalyq qyzmetiniń (USCIS) ókili elde ýaqytsha turyp jatqan jáne turaqty turýǵa ruqsat (grın-karta) alǵysy keletin shetel azamattary tótenshe jaǵdaılardy qospaǵanda, ótinish berý úshin óz elderine oralýy tıis ekenin málimdegen bolatyn.
Bul talap ondaǵan jyldar boıy qalyptasqan tájirıbeni ózgertýi múmkin edi. Buǵan deıin týystary nemese jumys berýshileri demeýshilik jasaǵan ımmıgranttar grın-karta rásimdeý kezeńinde AQSh aýmaǵynda qala alatyn.
Alaıda bul málimdeme ımmıgranttar men jumys berýshiler arasynda alańdaýshylyq týǵyzyp, kóptegen syn aıtyldy. Osyǵan baılanysty AQSh Ishki qaýipsizdik mınıstrligi qosymsha túsinikteme berdi.
Mınıstrliktiń habarlaýynsha, jańa talaptar joǵary bilikti mamandarǵa, AQSh-tyń ulttyq múddelerine qyzmet etetin azamattarǵa jáne el ekonomıkasyna paıda ákeletin tulǵalarǵa qoldanylmaıdy.
The New York Times basylymynyń jazýynsha, alǵashqy málimdemeden keıin ımmıgrasııalyq zańgerlerge alańdaǵan klıentterden kóptegen qońyraýlar túsken. Olar bul bastama Donald Tramp ákimshiliginiń zańdy ımmıgrasııany shekteýge baǵyttalǵan kezekti qadamy bolýy múmkin dep qaýiptengen.
Bostondyq ımmıgrasııalyq advokat Elızabet Goss bastapqy talapty «adamdardy elden ketýge májbúrleýdiń taǵy bir tásili» dep baǵalaǵan.
Sonymen qatar Ishki qaýipsizdik mınıstrligi keıbir ótinish berýshilerge qujat rásimdeý prosesin sheteldegi AQSh elshilikteri nemese konsýldyqtarynda bastaý qajet bolýy múmkin ekenin atap ótti. Degenmen bul ózgerister qazirgi zańdy turaqty turǵyndardyń mártebesine áser etpeıdi.
