Foto: syrtqy ister mınıstrligi
Armenııa tarapymen Qazaqstan azamattarynyń Iran – Armenııa shekarasynan kedergisiz ótýin qamtamasyz etý máselesi kelisildi. Qajet bolǵan jaǵdaıda azamattar Armenııa aýmaǵy arqyly evakýasııalanady. Armenııanyń syrtqy saıası vedomstvosynyń basshylyǵymen turaqty baılanys ornatylǵan.
Osyǵan uqsas kelissózder Ázerbaıjan tarapymen de júrgizildi. Ázerbaıjan evakýasııalaý isinde qoldaý kórsetýge daıyn ekenin bildirdi. Alaıda eldiń qurlyqtaǵy shekara beketterinde ótkizý tártibi shekteýli bolǵandyqtan, shekaradan ótý úshin arnaıy ruqsat talap etiledi. Eki azamattyń ótinishi negizinde Qazaqstan Respýblıkasynyń Ázerbaıjandaǵy elshiligi Irannan «Djýlfa» baqylaý-ótkizý pýnkti (Nahchyvan) arqyly kirýge jedel ruqsat aldy.
Túrikmenstan tarapy da otandastarymyzdy evakýasııalaý maqsatynda memlekettik shekaradan ótkizýge járdem kórsetýge daıyn ekenin rastady.
Bul baǵyttaǵy jumystar jalǵasyp jatyr. Qosymsha aqparat Syrtqy ister mınıstrliginiń jáne sheteldegi mekemelerdiń resmı aqparattyq resýrstarynda jarııalanady.
Jedel aqparat taratý úshin Syrtqy ister mınıstrligi zamanaýı sıfrlyq múmkindikterdi, sonyń ishinde Kaspi ınfraqurylymyn paıdalandy. Kompanııamen birlesip habarlama taratý júıesi iske qosylyp, óńirdegi azamattardyń mobıldi qurylǵylaryna resmı aqparat pen túsindirmeler ýaqytyly jetkizilip jatyr.
«О́ńirdegi ahýal tolyq turaqtalǵanǵa deıin azamattardy sabyr saqtaýǵa, jergilikti bılik organdarynyń talaptary men usynystaryn oryndaýǵa, qaýipti aımaqtardan aýlaq bolýǵa jáne ýaqytsha shekteýlerge túsinistikpen qaraýǵa shaqyramyz. Jańa málimetter túsken jaǵdaıda qosymsha habarlanady. Osyǵan baılanysty Syrtqy ister mınıstrliginiń jáne sheteldegi mekemelerdiń resmı aqparattaryn únemi qadaǵalap otyrýdy suraımyz», delingen mınıstrlik habarlamasynda.
Iran sheteldik stýdentterdiń elden shyǵý tártibin jeńildetti
