Jańa páterler Oral qalasynyń jańadan qurylyp jatqan Aqjaıyq shaǵynaýdanynda ornalasqan. Keıingi jyldary bul jerde kóptegen áleýmettik nysan boı kóterip, ásirese turǵyn úı qurylysy qarqyndy júrip jatyr. Bolashaqta bul aýdanda 70 myńǵa deıin turǵyn bolady dep josparlanǵan.
Jańa qonys ıelerin aımaq basshysy Narıman Tóreǵalıev quttyqtap, páter kiltterin saltanatty túrde tabys etti.
«О́ńir halqyn baspanamen qamtý – memleket saıasatynyń basym baǵyttarynyń biri. 2023 jyldan beri oblysta turǵyn úı qurylysyna 63 mlrd teńge bólinip, 3 698 páter paıdalanýǵa berildi. Keıingi 3 jylda aýdan ortalyqtaryn qospaǵanda tek aýyldarda 1 733 otbasy baspanaly boldy. Jańa baspana – ár otbasy úshin úlken qýanysh, jańa ómirdiń bastaýy. Bul úıler sizderge tek jaıly meken emes, berekeli shańyraq bolsyn!», dedi oblys ákimi Narıman Tóreǵalıev.
Oral qalasy boıynsha turǵyn úı kezeginde 27 myńnan astam azamat tirkelgen. Bıyl áleýmettik osal toptarǵa 200 páter, sondaı-aq nesıelik negizde 1 000 páterdi berý josparlandy. Qazirgi ýaqytta 370 páterdi qamtıtyn 3 kópqabatty turǵyn úıdiń qurylysy aıaqtaldy. Bul páterlerdi kezekte turǵan azamattarǵa berý úshin konkýrs rásimderi júrgizilýde. Budan bólek 248 páterdi qamtıtyn taǵy 2 kópqabatty úıdiń qurylys jumystary bitti.
Narıman Tóreǵalıev óz sózinde Oral qalasyn kógaldandyrý jáne «Taza Qazaqstan» ekologııalyq aksııasynyń mán-mańyzyna toqtalyp ótti.
«Jer aıaǵy keńigen soń tal-terek otyrǵyzyp, kóp bolyp, kógaldandyrý jumysyn qolǵa alamyz. Byltyr bizdiń óńir eldi mekenderinde 242 myń dana aǵash egildi. Bıyl memlekettik orman qory aýmaǵynda 8,8 mln dana aǵash-butaq kóshetin otyrǵyzý josparlanǵan. Munyń bári tabıǵatty aıalaýǵa, qorshaǵan ortany qorǵaýǵa baǵyttalǵan. Degenmen, Prezıdent bastamasymen qolǵa alynǵan «Taza Qazaqstan» tujyrymdamasyn senbilikter ótkizýmen shekteletin bir-eki aılyq naýqan emes, qoǵamdyq mádenıettiń jarqyn kórinisi dep qabyldaǵanymyz abzal», dedi oblys ákimi.
Batys Qazaqstan oblysy
