Qazaqstan halyqaralyq deńgeıde moıyndalǵan epızootııalyq qolaılylyq júıesin júıeli túrde nyǵaıtyp keledi. Bul elimizdiń veterınarııalyq qaýipsizdik deńgeıiniń joǵary ekenin jáne atalǵan salada júrgizilip jatqan reformalardyń tıimdiligin aıqyn kórsetedi.
Qazaqstan Úkimeti júzege asyryp otyrǵan júıeli sharalar men veterınarııalyq qyzmetti jańǵyrtý nátıjesinde janýarlardyń asa qaýipti aýrýlarynyń aldyn alý jáne olardy baqylaý baǵytynda eleýli jetistikterge qol jetkizildi.
2025 jyly elimizdiń ońtústik-shyǵys óńirlerinde aýsyl aýrýy boıynsha, sondaı-aq joǵary patogendi qus tumaýy, afrıkalyq shoshqa obasy, klassıkalyq shoshqa obasy jáne afrıkalyq jylqy obasy boıynsha qaýipsiz el mártebesin qalpyna keltirý jáne halyqaralyq deńgeıde moıyndatý baǵytynda aýqymdy jumystar atqaryldy.
Qol jetkizilgen nátıjeler otandyq ónimderdiń eksporttyq áleýetin aıtarlyqtaı keńeıtip, jańa sheteldik naryqtarǵa jol ashty.
Atap aıtqanda, Qytaı Qazaqstannan soıysqa arnalǵan iri qara maldy, iri qara terilerin jáne qus etin ımporttaýǵa ruqsat berdi. Ázerbaıjan túıe, iri jáne usaq mal eti, qus eti, sút ónimderi, bal jáne balyq ónimderin ákelýge múmkindik ashty. Mońǵolııa tiri usaq mal ımportyn bastaýǵa kelisim berdi. Irak soıysqa arnalǵan iri jáne usaq mal jetkizilimderin maquldady. Grýzııa soıysqa arnalǵan iri qara maldy, sondaı-aq soıysqa jáne ósirýge arnalǵan usaq maldy ımporttaýǵa ruqsat etti. Iran tuıaqty janýarlardyń terisi men júnine óz naryǵyn ashsa, Eýropalyq odaq elderi qazaqstandyq bal ónimderin qabyldaı bastady.
Eki jylǵa sozylǵan keshendi jumys nátıjesinde, 2026 jylǵy 22 mamyrda Dúnıejúzilik janýarlar densaýlyǵy uıymyna múshe 183 eldiń delegattary biraýyzdan Qazaqstanǵa vaksınasııa júrgiziletin aýsyldan taza aımaq mártebesin berý týraly sheshim qabyldady. Resmı sertıfıkat Qazaqstan delegasııasyna Parıj qalasynda ótken uıymnyń 93-shi Bas sessııasy barysynda tabystaldy.
Osylaısha, búginde Qazaqstannyń búkil aýmaǵy aýsyl aýrýynan vaksınasııa arqyly qorǵalǵan ári halyqaralyq deńgeıde moıyndalǵan qaýipsiz aımaqtarmen qamtylǵan. Qazaqstan Ortalyq jáne Shyǵys Azııada mundaı mártebege ıe bolǵan jalǵyz memleket.
Bul — veterınarııalyq qaýipsizdikti qamtamasyz etý, eldiń bıologııalyq qorǵanysyn kúsheıtý jáne agroónerkásiptik keshenniń eksporttyq áleýetin damytý baǵytyndaǵy syndarly memlekettik saıasattyń jarqyn nátıjesi.
Qazaqstannyń Aýyl sharýashylyǵy mınıstrligi veterınarııalyq qaýipsizdikti odan ári nyǵaıtý, eksport geografııasyn keńeıtý jáne otandyq aýyl sharýashylyǵy ónimderiniń álemdik naryqtaǵy básekege qabilettiligin arttyrý jumystaryn jalǵastyrady.
