Kórme alańynda Qazaqstannyń barlyq óńirinen kelgen 600 taýar óndirýshi óz ónimin usyndy. Bul ótken jylǵy kórsetkishten eki ese derlik artyq.
Saltanatty ashylý rásimine QR Premer-mınıstriniń orynbasary – ulttyq ekonomıka mınıstri Serik Jumanǵarın, memlekettik organdar men bıznes-qoǵamdastyq ókilderi qatysty.
Kórmeniń ashylýynda Serik Jumanǵarın Qazaqstan Respýblıkasynyń Premer-mınıstri Oljas Bektenovtiń úndeýin oqydy.
«Prezıdentimiz Qasym-Jomart Kemeluly Toqaev ekonomıkanyń ósýine tyń serpin berip otyrǵan shaǵyn jáne orta bıznesti damytýǵa árdaıym erekshe kóńil bólip keledi. Memleket tarapynan kásipkerlikti qoldaý men oǵan qolaıly jaǵdaı jasaýǵa, iskerlik belsendilikti keńeıtýge jáne elimizdiń ekonomıkalyq áleýetin nyǵaıtýǵa baǵyttalǵan keshendi sharalar dáıekti túrde júzege asyrylýda», - delingen Oljas Bektenovtiń úndeýde.
Júzege asyrylyp jatqan memlekettik qoldaý sharalarynyń ishinde bıznestiń qarjylandyrýǵa jáne jeńildetilgen nesıeleý quraldaryna qoljetimdiligin keńeıtýge erekshe nazar aýdarylady. 2025 jyly «Damý» qory arqyly bıznesti qoldaýǵa 560 mlrd teńgeden asa qarajat jumsalǵan. Osynyń arqasynda 13 myń ShOB jobasy jalpy somasy 2,2 trln teńgege memlekettik qoldaý sharasymen qamtylyp otyr. Júzege asyrylǵan sharalar nátıjesinde 15 myńǵa jýyq jańa jumys ornyn ashylyp, ónim shyǵarýdyń 27,7 trln teńgege jáne salyq túsiminiń 2 trln teńgege jýyq ósýin qamtamasyz etti.
Ekonomıkanyń naqty sektoryn damytýdyń negizgi tetiginiń biri «Investısııaǵa tapsyrys» baǵdarlamasy dep atalady. Onyń negizgi mindeti – ımportqa táýeldiligi joǵary salalardaǵy jobalardy qoldaý jáne ishki naryq pen eksportqa baǵdarlanǵan jańa óndirister qurý.
Baǵdarlamany júzege asyrýda «Báıterek» holdınginiń ınstıtýttary men «Damý» qoryna basty ról berilgen.
«Kásipkerlerdi qarjylandyrý men qoldaýdyń qoljetimdiligin arttyrý úshin "Damý" qory kepildik berý quraldaryn edáýir keńeıtti. О́ńdeýshi ónerkásip kásiporyndarynyń jabdyqtaryn jańǵyrtý úshin "О́rleý" jáne "О́rleý-lızıng" jeńildikpen nesıeleý baǵdarlamalary arqyly qoldaýdyń naryqtyq tetikterin kúsheıtti. Sondaı-aq "Isker aımaq" baǵdarlamasy júzege asyp jatqan shaǵyn qalalar men aýyldarda mıkro jáne shaǵyn bıznesti keshendi qoldaý baǵdarlamasyn iske qosty. Qordyń óńirlik fılıaldarynyń bazasynda biz "Báıterek" holdınginiń bıznesti qoldaýdyń barlyq baǵdarlamalary boıynsha biryńǵaı front-keńseler qurdyq, al shalǵaı aýdandar úshin mobıldi front-keńse maqsatyndaǵy arnaıy shaǵyn avtobýstar iske qosylady, onda mamandar kásipkerlerge keńes berý úshin shalǵaı aýdandarǵa baratyn bolady», - dep atap ótti «Damý» qorynyń basqarma tóraǵasy Farhat Sársekeev.
2025 jyly «Damý» Qory arqyly bıznesti damytýǵa 560 mlrd teńgeden astam qarjy bólindi. Nátıjesinde jalpy somasy 2,2 trln teńgege 13 myńǵa jýyq joba qoldaý tapty. Osy sharalardyń arqasynda 14 myńnan astam jańa jumys orny qurylyp, 143 myńnan astam jumys orny saqtaldy.
Qıyndyqqa tap bolǵan kásipkerlerdi súıemeldeýge erekshe nazar aýdarylady. Osyǵan baılanysty «Damý» qory janynan «ońaltý ortalyqtary» qurylýda. Onda bıznes turaqtylyǵyn qalpyna keltirý úshin qarjylyq, konsýltasııalyq jáne uıymdastyrýshylyq qoldaý ala alady.
«Ulttyq ónim – 2026» kórmesi EKSPO HKO-da 24 mamyrǵa deıin jalǵasady. Osy kúnder boıy ol B2B-kezdesýler, paneldik sessııalar, sheberlik synyptary men qazaqstandyq bıznestiń jetistikterin kórsetý úshin tıimdi alańǵa aınalady.
